پرەمەر-ءمينيستردىڭ توراعالىعىمەن وتكەن ۇكىمەت وتىرىسىندا مەملەكەت باسشىسىنىڭ «سىندارلى قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ نەگىزى» جولداۋىن ىسكە اسىرۋ شارالارى قارالدى. بيۋدجەتتىك-قارجى باعىتى بويىنشا پرەمەر-ءمينيستردىڭ ءبىرىنشى ورىنباسارى – قارجى ءمينيسترى ءاليحان سمايىلوۆتىڭ بايانداماسى تىڭدالدى. بۇل تۋرالى primeminister.kz حابارلادى.
قازاقستان پرەزيدەنتى ق. توقاەۆ ءوز جولداۋىندا 2025 جىلعا قاراي جالپى ىشكى ءونىمنىڭ جىل سايىنعى ءوسۋىن كەمىندە 5% ەتىپ تۇراقتى قامتاماسىز ەتۋگە مۇمكىندىك بەرەتىن قۇرىلىمدىق وزگەرىستەردى ىسكە اسىرۋ قاجەتتىگى تۋرالى اتاپ ءوتتى.
ءا. سمايىلوۆتىڭ ايتۋىنشا, بۇل ءۇشىن ۇكىمەت ەكونوميكانى ءارتاراپتاندىرۋ جونىندەگى جۇمىستى جالعاستىرادى جانە مەملەكەتتىك ورگانداردىڭ دا, كۆازيمەملەكەتتىك سەكتوردىڭ دا قىزمەتىنە فۋنكتسيونالدىق تالداۋ جۇرگىزۋدى جانداندىرادى. سونداي-اق, قازاقستاندىق جانە شەتەلدىك ساراپشىلاردىڭ زەرتتەۋلەرى مۇقيات تالداناتىن بولادى.
سونىمەن قاتار, مەملەكەت باسشىسى جولداۋدا مەملەكەتتىك قىزمەتكەرلەردىڭ جۇمىسىنىڭ تيىمدىلىگىن ارتتىرۋ ماقساتىندا ولاردىڭ قاتارىنا داعدىلاردى مەڭگەرگەن جاس مامانداردى تارتۋ قاجەت ەكەنىن اتاپ ءوتتى.
«2020 جىلدان باستاپ مەملەكەتتىك قىزمەتشىلەر سانىن بىرتىندەپ قىسقارتۋعا باعىتتالعان جۇمىس جۇرگىزىلەدى, ال بوساتىلعان قاراجات نەعۇرلىم پايدالى قىزمەتكەرلەردى ماتەريالدىق ىنتالاندىرۋعا جۇمسالاتىن بولادى. 2024 جىلعا قاراي مەملەكەتتىك قىزمەتشىلەر مەن ۇلتتىق كومپانيالار قىزمەتكەرلەرىنىڭ سانى 25%-عا قىسقاراتىن بولادى», — دەدى ءا. سمايىلوۆ.
قر پرەمەر-ءمينيسترىنىڭ ءبىرىنشى ورىنباسارى – قارجى ءمينيسترىنىڭ ايتۋىنشا, باسىم مىندەتتەردىڭ ءبىرى — كۆازيمەملەكەتتىك سەكتوردان قايتارىمدى ارتتىرۋ.
«ۇلتتىق ءال-اۋقات قورىنىڭ وتكەن 14 جىلداعى حالىقتىڭ ءال-اۋقاتىنىڭ وسۋىنە ناقتى ۇلەسى باعالاناتىن بولادى. ۇكىمەت ەسەپ كوميتەتىمەن بىرگە ءۇش ايلىق مەرزىمدە مەملەكەتتىك حولدينگتەر مەن ۇلتتىق كومپانيالاردىڭ تيىمدىلىگىنە تالداۋ جۇرگىزەدى», — دەپ ناقتىلادى ءا. سمايىلوۆ.
جۇمىسسىزدىقتى ازايتۋ جانە اۋىل حالقىنىڭ ءومىر ءسۇرۋ دەڭگەيىن كوتەرۋ شەڭبەرىندە ۇلتتىق قوردان 100 ملرد تەڭگەگە جۋىق قاراجات ءبولىندى. وسى جىلدىڭ سوڭىنا دەيىن ميكرو جانە شاعىن بيزنەس كومپانيالارىن ولاردىڭ نەگىزگى قىزمەتىنەن ءۇش جىل مەرزىمگە سالىق تولەۋدەن بوساتۋ جونىندەگى زاڭنامالىق نەگىز ازىرلەنەتىن بولادى. 2020 جىلدىڭ قاڭتارىنان باستاپ شاعىن جانە ورتا بيزنەس سۋبەكتىلەرىن تەكسەرۋگە ءۇش جىلدىق تىيىم سالۋ كۇشىنە ەنەدى.
سونىمەن قاتار, قر قارجى مينيسترلىگى مەملەكەتتىك ساتىپ الۋ ماسەلەلەرى بويىنشا زاڭ جوباسىن ازىرلەدى, ول دا شاعىن بيزنەستى ىنتالاندىرۋعا باعىتتالعان.
«قولما-قول اقشاسىز تولەمدەردى ىنتالاندىرۋ, كولەڭكەلى ەكونوميكاعا قارسى ءىس-قيمىل جونىندەگى جۇمىس كۇشەيتىلەدى, كاپيتالداردى شىعارۋمەن, سالىق تولەۋدەن باس تارتۋمەن كۇرەس كۇشەيتىلەدى. جاقىندا ەكونوميكالىق تەرگەۋ قىزمەتىنىڭ جۇمىسى قايتا قالىپتاستىرىلدى جانە وڭتايلاندىرىلدى», — دەدى ءا. سمايىلوۆ.
مەملەكەت باسشىسى جولداۋ اياسىندا سالىق جۇيەسىن ۇلتتىق تابىستى بارىنشا ءادىل بولۋگە نازار اۋدارا وتىرىپ, جاڭعىرتۋدى تاپسىردى. بۇل ءۇشىن ۇكىمەت كومپانيالار ءۇشىن ادامي كاپيتالعا, ەڭبەك ونىمدىلىگىن ارتتىرۋعا, تەحنيكالىق قايتا جاراقتاندىرۋعا, ەكسپورتقا ينۆەستيتسيا سالۋعا ىنتالاندىراتىن اعىمداعى سالىق جۇيەسىنىڭ ساپاسىن ارتتىرۋ جونىندە شارالار قابىلدايدى. سالىق كودەكسىندە كوزدەلمەگەن تولەمدەرگە, الىمدارعا تىيىم سالىنادى.
ماڭىزدى مىندەتتەردىڭ ءبىرى – بيۋدجەتتىڭ جانە ۇلتتىق قوردىڭ قاراجاتىن پايدالانۋدىڭ تيىمدىلىگىن ارتتىرۋ. وسىعان بايلانىستى, ۇلتتىق بانكپەن بىرلەسىپ اعىمداعى جىلدىڭ سوڭىنا دەيىن ۇلتتىق قوردى ينۆەستيتسيالاۋ جانە پايدالانۋ ساپاسىن ارتتىرۋ جونىندە ناقتى ۇسىنىستار ازىرلەنەتىن بولادى.
«حالىقتى الەۋمەتتىك قولداۋدى كۇشەيتۋ ءۇشىن بارلىق ءتيىمسىز شىعىستاردى قىسقارتۋ جانە بيۋدجەت كىرىستەرىن ارتتىرۋ ەسەبىنەن بۇدان ءارى رەزەرۆتەر ىزدەستىرىلەتىن بولادى», — دەدى ءا. سمايىلوۆ.
قارجى مينيسترلىگى كەدەندىك اكىمشىلەندىرۋدى جاقسارتۋ جانە كۇشەيتۋ جونىندەگى كەشەندى جۇمىستى جالعاستىرادى. مەملەكەتتىك ساتىپ الۋ جۇيەسى بۇدان ءارى جەتىلدىرىلەتىن بولادى.
ء«تيىستى زاڭ جوباسى ازىرلەندى, ول ادال باسەكەلەستىكتى ىنتالاندىرۋعا, سىبايلاس جەمقورلىق تاۋەكەلدەرىن تومەندەتۋگە, سونداي-اق تاۋارلاردىڭ, جۇمىستاردىڭ, كورسەتىلەتىن قىزمەتتەردىڭ ساپاسىن جانە ءونىم بەرۋشىلەردىڭ بىلىكتىلىگىن ارتتىرۋعا باعىتتالعان. وسىنىڭ بارلىعى بيۋدجەتكە قوسىمشا تابىس الۋعا مۇمكىندىك بەرەدى», — دەدى ءا. سمايىلوۆ.
بۇل رەتتە شىعىنداردى وڭتايلاندىرۋ جانە اكتيۆتەردى ينۆەستيتسيالىق باسقارۋدىڭ ساپاسىن جاقسارتۋ ماقساتىندا ۇكىمەتكە بىرىڭعاي الەۋمەتتىك قور قۇرۋ جانە ءبىر الەۋمەتتىك تولەم ەنگىزۋ جولىمەن الەۋمەتتىك قامتاماسىز ەتۋدىڭ بيۋدجەتتەن تىس جۇيەسىن شوعىرلاندىرۋ ماسەلەسىن زەردەلەۋ تاپسىرىلدى.
«جاقىن ارادا اتالعان جۇمىستى پىسىقتايمىز. سونداي-اق جەرگىلىكتى بيۋدجەتتەردى قالىپتاستىرۋعا حالىقتى ناقتى تارتا وتىرىپ, بارلىق دەڭگەيلەردە بيۋدجەت پروتسەسىن ۇيىمداستىرۋ قۇرىلاتىن بولادى. اۋداندىق, قالالىق جانە اۋىلدىق بيلىك دەڭگەيلەرى جەرگىلىكتى ماڭىزى بار مىندەتتەردى شەشۋدە ەكونوميكالىق جاعىنان نەعۇرلىم دەربەس بولۋى ءۇشىن ءتيىستى زاڭنامالىق اكتىلەر قابىلداناتىن بولادى», — دەدى ءا. سمايىلوۆ.
جالپى, جولداۋدا كورسەتىلگەن تاپسىرمالاردى ىسكە اسىرۋ جانە ورىنداۋ بويىنشا ءتيىستى ءىس-قيمىل جوسپارى ازىرلەنەتىن بولادى.