ماڭعىستاۋ وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا 2017-2018 جىلدارى ماڭعىستاۋ وبلىسى اكىمىنىڭ ءبىرىنشى ورىنباسارى قىزمەتىن اتقارعان س.امانعاليەۆكە قاتىستى قر قىلمىستىق كودەكسىنىڭ 366-بابى 4 بولىگىمەن كەلىپ تۇسكەن قىلمىستىق ءىس بويىنشا سوت ۇكىمى جاريالاندى. بۇل تۋرالى ماڭعىستاۋ وبلىستىق سوتىنىڭ ءباسپاسوز قىزمەتى حابارلادى.
س.امانعاليەۆ مەملەكەتتىك قىزمەتكە جانە مەملەكەتتىك باسقارۋ قىزمەتىنە قارسى اسا اۋىر كولەمدە سىبايلاس جەمقورلىق قىلمىسىن جاسادى دەگەن كۇدىك بويىنشا 05.11.2018 جىلى سوت سانكتسياسىمەن قاماۋعا الىنعان.
ياعني, ول 3.11.2018 جىلى ساعات 18.40 شاماسىندا اقتاۋ قالاسىنداعى حالىقارالىق اۋەجاي تەرريتورياسىندا سىبايلاس جەمقورلىققا قارسى ۇلتتىق بيۋرو قىزمەتكەرلەرىنە ۇستالىپ, س.امانعاليەۆتان 115 000 ەۋرو كولەمىندە اقشالاي قاراجات تابىلعان.
سوت ۇكىمىمەن س.امانعاليەۆ قر قىلمىستىق كودەكسىنىڭ 366-بابى 4 بولىگىمەن كىنالى دەپ تانىلىپ, بەلگىلى ءبىر لاۋازىمداردى اتقارۋ نەمەسە بەلگىلى ءبىر قىزمەتپەن اينالىسۋ قۇقىعىنان ءومىر بويىنا ايىرا وتىرىپ, 10 جىل مەرزىمگە باس بوستاندىعىنان ايىرۋ جازاسى تاعايىندالدى.
سوت قر قىلمىستىق كودەكسىنىڭ 49-بابى 2 بولىگىنە ساي, قر پرەزيدەنتىنە س.امانعاليەۆتى «قۇرمەت» وردەنى ناگراداسىنان ايىرۋ تۋرالى ۇسىنىس ەنگىزدى.
قىلمىس ورنىندا الىنعان 115 000 ەۋرو كولەمىندەگى اقشالاي قاراجات مەملەكەت كىرىسىنە الىندى.
سوت ۇكىمى زاڭدى كۇشىنە ەنگەن جوق.
ماڭعىستاۋ وبلىسى