بۇل تۋرالى مەملەكەت باسشىسى پارلامەنت پالاتالارىنىڭ بىرلەسكەن وتىرىسىندا قازاقستان حالقىنا جولداۋىندا ايتتى.
«ەلىمىزدىڭ ءاربىر تۇرعىنى وڭ وزگەرىستى سەزىنۋى تيىس. مەن مەملەكەتتىك ورگانداردان جۇمىستى جەدەل اتقارىپ, ناقتى ناتيجەگە قول جەتكىزۋدى تالاپ ەتەمىن. رەفورمانى تەك رەفورما ۇشىن جۇرگىزۋگە جول بەرىلمەيدى. ءاربىر مينيستردە جانە اكىمدە ناتيجەلى جۇمىستىڭ نەگىزگى كورسەتكىشتەرىنىڭ تىزىمى بولۋى ءتيىس. سول ارقىلى ولاردىڭ ناقتى ماقساتقا قول جەتكىزۋ دەڭگەيى انىقتالادى. ۇكىمەت مۇشەلەرىنە, مەملەكەتتىك ورگاندار مەن وڭىرلەردىڭ, مەملەكەتتىك كومپانيالاردىڭ جانە مەكەمەلەردىڭ باسشىلارىنا ءتيىستى رەفورمانىڭ جۇزەگە اسىرىلۋى ۇشىن دەربەس جاۋاپكەرشىلىك جۇكتەلەدى. وسىعان بايلانىستى, جاقىندا تيىستى جارلىققا قول قويدىم. بۇل جارلىقتىڭ اياسىندا ەلدەگى احۋال, سونىڭ ىشىندە ايماقتارداعى حالىقتىڭ جاعدايى ساۋالناما نەگىزىندە ناقتى باعالاناتىن بولادى», دەدى پرەزيدەنت.
سونداي-اق مەملەكەت باسشىسى ۇكىمەتتىڭ الەۋمەتتىك جانە ەكونوميكالىق ساياساتقا جاۋاپتى قۇرىلىمدارى قوعامنىڭ قاجەتتىلىكتەرىنە سايكەس الدىن-الا ناقتى جۇمىس جۇرگىزۋى قاجەت. بۇل ءۇشىن باقىلاۋ, تالداۋ جانە بولجاۋ جۇيەسىن نەعۇرلىم كۇشەيتۋ كەرەك ەكەنىن اتاپ ءوتتى.
«سوندىقتان دەپۋتاتتارىمىزدىڭ وتىنىشىنە وراي پارلامەنت جانىنان زاڭنامانى زەردەلەۋ جانە ساراپتاۋ ينستيتۋتىن قۇرۋ جونىندە تاپسىرما بەرەمىن.اتالعان قۇرىلىم زاڭدارىمىزدىڭ ساپاسىن ارتتىرۋعا ىقپال ەتۋى ءتيىس»,- دەدى مەملەكەت باسشىسى.