بۇگىن الماتى وبلىسىنداعى ءۇش مەكتەپكە قازاق زيالىلارىنىڭ ەسىمى بەرىلدى, دەپ حابارلايدى قازاقپارات ءتىلشىسى.
اتاپ ايتقاندا, پانفيلوۆ اۋدانىنداعى «كوكتال ورتا مەكتەبى» مەملەكەت جانە قوعام قايراتكەرى دىنمۇحامەد قوناەۆتىڭ ەسىمىمەن اتالدى. بۇرىنعى ا. لۋناچارسكي اتىنداعى مەكتەپ-گيمنازيا داڭقتى قولباسشى, كەڭەس وداعىنىڭ باتىرى باۋىرجان مومىش ۇلىنىڭ ەسىمىمەن اتالسا, ءساتجول ورتا مەكتەبىنە الاش كوسەمى ءاليحان بوكەيحانوۆتىڭ ەسىمى بەرىلىپ, رەسمي تۇردە اشىلۋ سالتاناتى ءوتتى.
«وسى كۇنگە دەيىن اۋدانىمىزدا بىرقاتار ەلدى مەكەن مەن كوشە اتاۋلارى وزگەرتىلسە, سونىڭ ىشىندەگى ەڭ قۋانتارلىعى ءۇش ءبىلىم ورداسىنا قازاق زيالىلارى ەسىمىنىڭ بەرىلۋى», - دەيدى اۋدان اكىمىنىڭ ورىنباسارى شۋحرات قۇربانوۆ.
ءبىرىنشى سىنىپقا نەمەرەسىن اكەلگەن كۇليمان اپا نەمەرەسىنىڭ قازاق زيالىلارى سىندى ەل باسقاراتىن ازامات بولۋىن تىلەيدى. جاڭا وقۋ جىلىندا ديماش, ءاليحان, باۋىرجانداي ۇلى ادامداردىڭ ەسىمىن مەكتەپكە بەرۋ بالالارىمىزعا ۇلكەن تاربيە مەن ونەگە ەكەنىن ايتىپ, ريزاشىلىعىن ءبىلدىردى.
«بىردە ديماش اتامىز جاركەنت-اراساندا دەمالىپ, قايتىپ بارا جاتقاندا كوكتال اۋىلىنىڭ ءبىر توپ وقۋشىسى اتامىزدىڭ كولىگىن توقتاتىپ, اۋىلعا مەكتەپ سالىپ بەرۋىن ءوتىنىپتى. ديماش اتامىز بالالارعا بەرگەن ۋادەسىن ورىنداپ, 1976 جىلى كوكتال ورتا مەكتەبى بوي كوتەرگەن. مىنە, وسى مەكتەپكە دىنمۇحاممەد قوناەۆ اتامىزدىڭ ەسىمىن بەرۋ وتە قۇپتارلىق ءىس»,- دەيدى كەزىندە پانفيلوۆ اۋدانىنىڭ ءبىرىنشى حاتشىسى بولعان عالىم تۋعانباەۆ. ايتا كەتۋ كەرەك, جاڭا وقۋ جىلى قارساڭىندا پانفيلوۆ اۋدانىندا 50 مەكتەپ ەسىگىن اشسا, 2800-دەن استام ءبۇلدىرشىن مەكتەپ تابالدىرىعىن جاڭادان اتتادى.