بۇل – وسكەمەندە اشىلعان 12-ءىنشى قازاق مەكتەبى.
بۇگىن, 1 قىركۇيەك – ءبىلىم كۇنىندە وسكەمەندەگى جىبەك ماتالار ىقشاماۋدانىندا №48 مەكتەپ-قوسىمشا ءبىلىم بەرۋ ورتالىعى اشىلدى. ءبىلىم ورداسىنىڭ اشىلۋ سالتاناتىنا وبلىس اكىمى دانيال احمەتوۆ قاتىستى.
«بۇل مەكتەپتىڭ باسقا مەكتەپتەردەن وزگەشەلىگى, اتى ايتىپ تۇرعانداي بالالارعا قوسىمشا ءبىلىم الۋعا مۇمكىندىك بار. ياعني وقۋشىلار وزدەرى قالاعان ۇيىرمەلەرىنە قاتىسىپ, تەگىن قوسىمشا ساباققا بارادى. مۇنداي جۇيە قالاداعى ەكى مەكتەپتە بار. قازاق مەكتەپتەرى اراسىندا العاش رەت اشىپ وتىرمىز. اتا-انالار بالالارىن بىزگە قىزىعۋشىلىقپەن اكەلىپ جاتىر. مۇعالىمدەر جەتكىلىكتى. ۇستازداردىڭ جالپى سانى – 100. ونىڭ ىشىندە جوعارى كاتەگوريالى مۇعالىمدەر سانى - 17. 1 كاتەگوريالى مۇعالىمدەر سانى – 22, 2 كاتەگوريالى مۇعالىمدەر سانى - 22. ياعني مۇعالىمدەردىڭ 57 پروتسەنتى جوعارى ءبىلىمدى. جاس مۇعالىمدەر سانى – 18. قۋانىشتىسى, 3 جاس ماماندى جۇمىسقا قابىلدادىق. ۇشەۋى دە ەر مۇعالىم. سونىڭ ەكەۋىنە تامىز كونفەرەنتسياسىندا پاتەر كىلتى بەرىلدى. وسىلايشا قۋانىش ۇستىنە قۋانىش ەسەلەنىپ جاتقان جايىمىز بار» دەيدى جاڭا مەكتەپتىڭ ديرەكتورى شىنار ماجينوۆا.
ورايى كەلگەندە ايتا كەتەيىك, بۇل – وسكەمەندە اشىلعان 12-ءىنشى قازاق مەكتەبى. قالا اكىمىنىڭ ورىنباسارى سەرىك جەڭىس ۇلىنىڭ ايتۋىنشا, قازىرگى ۋاقىتتا احمەر اۋىلىندا 1000 جانە سوگرادا 600 ورىندىق جاڭا مەكتەپ سالىنىپ جاتىر. دەمەك, جىل سوڭىنا دەيىن وسكەمەندە 2600 ورىندىق ءۇش قازاق مەكتەبى پايدالانۋعا بەرىلەدى.
وسكەمەن
سۋرەتتەردى تۇسىرگەن تىلەۋبەك شاياحمەت