بەردىبەك ساپارباەۆ جىبەك جولى اۋىلىنىڭ وقۋشىلارىمەن كەزدەستى

ۆيتسە-پرەمەر مەن اقمولا وبلىسىنىڭ اكىمى ەرمەك مارجىقپاەۆ جىبەك جولى اۋىلىندا بولىپ, ي.قۇتپان ۇلى اتىنداعى ورتا مەكتەپتە وتكەن العاشقى قوڭىراۋ سالتاناتىنا قاتىستى. ۇستازدار قاۋىمى مەن وقۋشىلاردى جانە ولاردىڭ اتا-انالارىن ءبىلىم كۇنىمەن قۇتتىقتادى.

«كەز كەلگەن مەملەكەتتىڭ دامۋى ازاماتتارىنىڭ ءبىلىمى, مادەنيەتى جانە تاربيەسىنە بايلانىستى. سول سەبەپتى, مەملەكەت باسشىلىعى تاراپىنان الەۋمەتتىك سالاعا ەرەكشە كوڭىل بولىنۋدە. وزدەرىڭىز كۋا بولىپ وتىرعانداي, ەلىمىزدە قازىرگى زاماڭعى مەكتەپتەر, بالاباقشالار, اۋرۋحانالار, تەاترلار جانە سپورت نىساندارى كوپتەپ سالىنۋدا. مۇنىڭ بارلىعى قازاقستاننىڭ الەمدىك قاۋىمداستىقتا لايىقتى ورىننان كورىنۋىنە  باعىتتالعان», - دەدى  بەردىبەك ساپارباەۆ.

ي.قۇتپان ۇلى اتىنداعى ورتا مەكتەپتىڭ ىرگەسى 2011 جىلى قالانعان. ءبىلىم ورداسىندا 68 ۇستاز 1 مىڭنان استام وقۋشىنى ءبىلىم نارىمەن سۋسىنداتۋدا. بيىل مەكتەپكە وبلىستىق بيۋدجەتتەن 158 ميلليون تەڭگە قارجى ءبولىنىپ,  كۇردەلى جوندەۋ جۇمىستارى جۇرگىزىلگەن. جاڭا وقۋ جىلىندا 137 بالا اتالمىش مەكتەپ تابالدىرىعىن العاش اتتادى.

ايتا كەتەيىك,  بۇگىندە اقمولا وبلىسىندا 614 مەكتەپكە دەيىنگى ءبىلىم بەرۋ ۇيىمى جۇمىس ىستەيدى, ولاردا 38 مىڭعا جۋىق بالا تاربيەلەنۋدە. 2019 جىلدىڭ 1 قىركۇيەگىنەن باستاپ ەلباسىنىڭ تاپسىرماسى بويىنشا بالالاردى ەرتە دامىتۋ باعدارلاماسى ەنگىزىلۋدە. بۇگىنگى تاڭدا 3-6 جاستاعى بالالاردى مەكتەپكە دەيىنگى بىلىممەن قامتۋ 99 پايىزدى قۇراپ وتىر. بارلىق مەملەكەتتىك بالاباقشالاردا اعىمداعى جوندەۋ جۇمىستارى جۇرگىزىلدى.

وبلىستا 557 مەملەكەتتىك مەكتەپ جۇمىس ىستەيدى, وعان 124 مىڭنان استام بالانى قابىلداۋ جوسپارلانىپ وتىر. ونىڭ 16 مىڭنان استامى – ءبىرىنشى سىنىپقا باراتىن بۇلدىرشىندەر. بۇل وتكەن جىلمەن سالىستىرعاندا 1 مىڭعا ارتىق.

سونىمەن قاتار,  ۆيتسە-پرەمەر وسى اۋىلداعى كوپبالالى قۇداباەۆتاردىڭ وتباسىندا بولدى.  اتالمىش وتباسى كامەلەتتىك جاسقا تولماعان ءتورت بالا تاربيەلەپ وتىر. تابىسى از بولعاندىقتان بيىلعى ءساۋىر ايىندا بۇل وتباسىنا ايىنا 101 مىڭ تەڭگە كولەمىندە اتاۋلى الەۋمەتتىك كومەك تاعايىندالدى. مەملەكەتتەن العان اقشالاي كومەكتى وتاعاسى ازامات قۇداباەۆ شاعىن بيزنەس – تەحنيكالىق بايقاۋ ستانساسىن اشۋعا باعىتتاماقشى. ال زايىبى گۇلنۇر «ەڭبەك» باعدارلاماسى بويىنشا ارنايى كۋرستان ءوتىپ, ۇيىندە نان ونىمدەرىن ءپىسىرىپ ساتادى.

بۇدان بولەك,  بەردىبەك ساپارباەۆ جىبەك جولى اۋىلىنداعى دارىگەرلىك امبۋلاتوريا,  «بوبەك» بوبەكجايى,  «دجاميليا» جشس جيھاز فابريكاسىنىڭ جۇمىسىمەن تانىستى.