ۋكراينالىق ءازىل سۋرەتتەر سالۋ ءىسىنىڭ بەلگىلى شەبەرى اناتولي بابيچ اقتوبەگە يۆەنت اگەنتتىكتەرىنىڭ ءبىرىنىڭ شاقىرۋى بويىنشا كەلگەن ەدى. «اپاما دا بارايىن, قويىمدى دا قارايىن» دەگەندەي, ول قازاقستاندىق قالادا كورپوراتيۆتىك ءىس-شارالارعا قاتىسۋعا دا, سونىمەن بىرگە ءوز قالاۋلارى بويىنشا اقتوبەلىكتەردىڭ ازىلگە قۇرىلعان سۋرەتتەرىن تەگىن سالىپ بەرۋگە دە ۋاقىت تاپتى.
كاريكاتۋرا جانرىن وڭدى-سولدى ويناتاتىن سۋرەتشى بولا تۇرا ا.بابيچ ءوزىن ءارتىس, شوۋ جۇرگىزۋشىسى دەپ ەسەپتەۋگە بەيىم تۇراتىنىن بايقادىق. از-كەم ءتىل قاتىسۋ بارىسىندا ول دوستىق ازىلگە قۇرىلعان سۋرەتتەردى بەس مينۋتتىڭ ىشىندە سالاتىنىن ايتتى. اقتوبەگە كەلگەندە بۇل رەكوردىن 2 مين 30 سەكۋندقا دەيىن ازايتىپتى. بۇل, ارينە ەر ادامنىڭ ءازىل سۋرەتىن سالعانداعى ۋاقىت.
ال ەندى ونىڭ الدىندا ادەمى قىز-كەلىنشەكتەر وتىرسا, اتالعان ءۇردىس 15-20 مينۋتقا دەيىن سوزىلادى ەكەن. كەيدە ونىڭ بوياۋىن ابدەن قانىقتىرىپ بەرۋى ءۇشىن 4 ساعات ۋاقىتىن دا سارپ ەتەتىن كورىنەدى.
ءبىر كورپوراتيۆتى كەشتە ا.بابيچ ەلۋ ادامنىڭ ءازىل سۋرەتىن دوپشا دومالاتىپ تاستايتىن بولسا, اقتوبەدە بۇل رەكوردىن تاعى دا جاڭارتىپ, وسى ۋاقىتتىڭ ىشىندە 60 ءازىل سۋرەت سالىپتى. سونىمەن بىرگە ۋكراينالىق سۋرەتشى اقتوبەگە كەلگەندە جەرگىلىكتى بيلىك وكىلدەرىنىڭ ءازىل سۋرەتتەرىن سالۋدىڭ دا ىڭعايىن كەلتىرىپتى. سونىڭ ءبىرى اقتوبە قالاسى اكىمىنىڭ ورىنباسارى ايگۇل ارىنعازيەۆا دەسەك, سۋرەتشى ونىڭ سۋرەتىن سالۋ ءۇشىن قالالىق اكىمدىك عيماراتىنىڭ قارسى بەتىندەگى الاڭقايعا شاقىرىپتى. ءازىل سۋرەت قولىنا تيگەندە ۆيتسە-مەر وعان رەنجىمەي, كەرىسىنشە فرانتسۋز اكتريساسىنا ۇقساتىپ جىبەرگەنى ءۇشىن ريزاشىلىعىن جەتكىزگەن.
اقتوبەلىكتەر ۋكراينالىق مەيمانعا كادىمگى قازاقشا ەت اسىپ, قوناقجايلىق كورسەتتى ءارى بۇل تاعامدى قولمەن, ياعني بەس ساۋساقپەن الىپ جەۋ كەرەكتىگىن ايتقان كەزدە اناتولي بۇل تىلەكتى بىردەن قۇپ كورگەنى دە ايتۋعا تۇرارلىق.
كەزدەسۋ سوڭىندا ۋكراينالىق ءازىل سۋرەتتەر سالۋ ءىسىنىڭ مايتالمانى سوڭعى كەزدە مايلى بوياۋلارمەن سالىناتىن تابيعات كورىنىستەرى مەن ناتيۋرمورت سەكىلدى كلاسسيكالىق سيپاتتاعى سۋرەتتەردى سالۋعا پاتشا كوڭىلى اۋىپ جۇرگەنىن جەتكىزدى.
اقتوبە