بۇل جونىندە «Nur Otan» پارتياسى قوف ساياسي كەڭەسىنىڭ كەڭەيتىلگەن وتىرىسىندا ايتىلدى. جيىندا پارتيا بەلسەندىلەرىن توپتاستىرۋ, جەمقورلىقپەن كۇرەستى كۇشەيتۋ, بيلىكتىڭ بارلىق دەڭگەيىندە پارتيا جاۋاپكەرشىلىگىن ارتتىرۋ جانە اقپاراتتىق ساياساتتى قايتا قاراۋ سياقتى ماڭىزدى ماسەلەلەر تالقىعا سالىندى. بۇگىندە نۇروتاندىقتاردىڭ قوستانايداعى قاتارى 66 مىڭنان اسىپ, ولار 416 باستاۋىش پارتيا ۇيىمىنىڭ باسىن بىرىكتىرىپ وتىر. كەڭەس بارىسىندا پارتيالىقتار تۇرعىندار تاراپىنان تۇسكەن تۇيتكىلدى ماسەلەلەردى شەشۋ جولدارىن ۇسىنىپ, پارتيا جۇمىسىن جانداندىرۋدا وزدەرىنىڭ ورامدى ويلارىن ورتاعا سالدى.
«جىل باسىنان بەرى قوعامدىق قابىلداۋ بولىمىنە 3539 ازامات جۇگىندى. وتىنىشتەردىڭ جالپى سانىنان 47,3 پايىزى وڭ شەشىمىن تاپتى, قالعان 52,7 پايىز وتىنىشتەر بويىنشا كەڭەستىك كومەك كورسەتىلدى. بۇل باعىتتاعى جۇمىستار ودان ءارى جالعاسا بەرمەك» دەدى Nur Otan پارتياسى قوف توراعاسىنىڭ ءبىرىنشى ورىنباسارى جاڭاباي بيسەمباەۆ. سونداي-اق, Nur Otan پارتياسىنىڭ ساياسي كەڭەسىندە العاشقى جارتىجىلدىقتا اتقارىلعان جۇمىستار ايتىلدى. بۇل دەپۋتاتتىق فراكتسيانىڭ قىزمەتى, جەمقورلىقتىڭ الدىن-الۋ شارالارى, پارتيالىق باقىلاۋ مەن كوميسسيا وتىرىستارىنىڭ قورىتىندىلارى بولاتىن.
«جەمقورلىقپەن كۇرەس ىسىنە, اسىرەسە, جاستاردى تارتۋدىڭ ماڭىزى وتە زور. بۇل تۇرعىدا ءبىزدىڭ ءبىلىم وردامىزدا اۋقىمدى ىستەر تاپ ايتقاندا, «ادالدىق الاڭى», «ادال ۇستاز», «ادال جاستار» جوبالارى اتقارىلۋدا. سىبايلاس جەمقورلىق – قوعام ءومىرىنىڭ بار سالاسىنا تامىر جايعان ىندەت. ونىمەن كۇرەسۋگە جاستاردى دا مەيلىنشە تارتۋدامىز» دەدى قوستاناي وبلىستىق ءماسليحاتىنىڭ دەپۋتاتى, قمۋ رەكتورى الما دوسجانوۆا.
ءماسليحات دەپۋتاتتارىنىڭ حالىقپەن كەرى بايلانىسى ودان ءارى كۇشەيە تۇسپەك. الەۋمەتتىك جەلىلەردە ازاماتتاردىڭ ارىز-تالاپتارى مەن ماسەلەلەرىن تىنداپ شەشۋدە جەدەلدىلىك تانىتۋ ماقساتىندا ونى جاڭا ءادىس-ءتاسىل تۇرعىسىنان ۇيىمداستىرۋ كوزدەلىپ وتىر. وبلىس اكىمى, Nur Otan پارتياسى قوف توراعاسى ارحيمەد مۇحامبەتوۆ ەلباسى انىقتاپ بەرگەن 7 باعىت ارقىلى پارتيا جۇمىسىن قايتا جانداندىرۋ اياسىندا جاستارعا, اسىرەسە, اۋىل جاستارىنا جاعداي جاساۋ, اۋىلدىق جەرلەردەن جۇمىس ورىندارىن اشۋ, كوپ بالالى انا, مۇمكىندىگى شەكتەۋلى ازاماتتار, باسقا دا الەۋمەتتىك توپتارعا ناقتى كومەك كورسەتۋ بويىنشا جۇيەلى جۇمىس اتقارۋ كەرەكتىگىن اتاپ ايتتى.
«قازىر ەلىمىزدە جان-جاقتى جاڭعىرۋ باعدارلاماسى جۇزەگە اسىرىلۋدا. ونىڭ باستى ماقساتى – قازاقستاننىڭ الەمنىڭ ەڭ دامىعان وتىز ەلىنىڭ قاتارىنا قوسىلۋىن قامتاماسىز ەتۋ. وسى رەتتە Nur Otan پارتياسى ەلباسىنىڭ ساياسي تىرەگى رەتىندە جاڭعىرۋدىڭ نەگىزگى قوزعاۋشى كۇشىنە اينالۋى ءتيىس» دەدى ارحيمەد بەگەجان ۇلى.
قوستاناي