جىل اياعىنا دەيىن 4 ميلليارد تەڭگەگە زاماناۋي تەحنولوگيالارعا نەگىزدەلگەن مەديتسينالىق قوندىرعىلار ساتىپ الۋ جوسپارلانسا, سولاردىڭ بىرقاتارى جەتكىزىلدى.
بۇل قاراجات بىلتىرعىدان ءۇش ەسە كوپ. رەسمي مالىمەتكە سۇيەنسەك, 9000 سولتۇستىكقازاقستاندىقتىڭ اعزاسىندا قاتەرلى ىسىك بار. ناۋقاستار بۇدان بىلاي فينليانديادان جەتكىزىلگەن 140 ميلليون تەڭگەلىك سوڭعى ۇلگىدەگى تسيفرلىق مامموگرافتىڭ كومەگىنە سۇيەنە الادى. بۇل اپپارات ارقىلى ءسۇت بەزىنىڭ قاتەرلى ىسىگىن باستاپقى كەزەڭدە انىقتاي الادى. كەسەل ەرتە تابىلسا, ەمدەۋ دە, ساۋىعىپ كەتۋ دە جەڭىل تۇسپەك. بۇرىنعى ۋلترادىبىستىق اپپاراتپەن ءسۇت بەزىنىڭ جاڭادان پايدا بولعان ىسىگىن ايىرۋ قيىن-تۇعىن.
ونكولوگيالىق ديسپانسەردىڭ باس دارىگەرىنىڭ ورىنباسارى ولەگ دۋدياكتىڭ ايتۋىنشا راك اۋرۋىنىڭ تارالۋى جونىنەن وبلىس كورسەتكىشى جوعارى. ونىڭ ىشىندە ءسۇت بەزىنىڭ قاتەرلى ىسىگى كەڭىنەن تارالعان. ەسەپتە ەكىمىنان استام ايەل ەسەپكە الىنسا, 113-ءى بيىل انىقتالىپتى. قوندىرعىنىڭ كوپ ارتىقشىلىقتارىنىڭ بىرىنە ءسۇت بەزىنىڭ ءاربىر ميلليمەترىن زەرتتەيتىن «گوموسينتەز» فۋنكتسياسىن اتاۋعا بولادى.
ايماق باسشىسى قۇمار اقساقالوۆ وبلىستىق ەرەسەكتەر اۋرۋحاناسىنا ورناتىلعان زاماناۋي كومپيۋتەرلىك توموگرافتىڭ دا جۇمىسىمەن تانىستى. ونىڭ قۇنى 347 ميلليون تەڭگەبولسا, 250 ميلليونى جەرگىلىكتى قازىنادان بولىنگەن. ادامنىڭ باسىن, اسقازانىن, بۋىندارىن, ءبىر سوزبەن ايتقاندا, ىشكى قۇرىلىس كەسەلدەرىن وتە دالدىكپەن بىردەن انىقتاپ بەرەدى. جانە دە ءبىر عاجابى, اقش-تان اكەلىنگەن قۇرىلعىنىڭ دياگنوستيكالىق قورىتىندىسىن الەمنىڭ كەز كەلگەن جەرىنە جولداۋعا بولادى. ونندا ورنالاسقان سەرۆەرلىك نۇسقاداعى ستانسا ارقىلى ءۇش مامان ءبىر مەزگىلدە زەرت جۇرگىزە الادى. اۋرۋحانا دارىگەرى يۆان لەيمان ماگنيتتىك-رەزونانستىق توموگرافتىڭ ابدەن ەسكىرگەنىن, ءجيى سىنا بەرەتىنىن ايتىپ ەدى, قۇمار ىرگەباي ۇلى جىل اياعىنا دەيىن جاڭاسىن ساتىپ الىپ بەرۋگە ۋادە ەتتى. بۇعان قوسا زامانۋي انگيوگراف تا الىنادى. ەسكى توموگراف تايىنشا اۋداندىق اۋرۋحاناسىنا جىبەرىلىپ, ايىرتاۋ, اقجار, ءۋاليحانوۆ اۋداندارىنىڭ تۇرعىندارىنا قىزمەت كورسەتەدى.
«دەنساۋلىق ساقتاۋ سالاسىنىڭ ماتەريالدىق-تەحنيكالىق بازاسىن نىعايتۋ, كادرلار تاپشىلىعىن جويۋ باعىتىندا جۇيەلى شارالار اتقارىلىپ كەلەدى. بيىل ەمدەۋ مەكەمەلەرى 66 جەدەل جاردەم كولىگىمەن , 80-گە جۋىق قۇرال-جابدىقپەن تولىعادى. كۇزگە تامان 500 ورىندى كوپبەيىندى اۋرۋحانانىڭ قۇرىلىسى باستالادى. تاياۋ ارادا جوعارى ءبىلىمدى 170 ديپلومدى جاس دارىگەر كەلەدى, ولاردىڭ جارتىسىنا جۋىع اۋىلدىق جەرلەرگە ورنالاسادى. ەلدى مەكەنگە جولداما العان ماماندارعا 1,5 ميلليون, قالالىقتار ءۇشىن 500 مىڭ تەڭگە كوتەرمەاقى تولەنەدى. «ديپلوممەن–اۋىلعا! باعدارلاماسى اياسىندا جاسالاتىن جەڭىلدىكتەر از ەمەس. قازىر 47 پاتەر دايىن», دەدى ايماق باسشىسى باق وكىلدەرىنە بەرگەن سۇحباتىندا.
سولتۇستىك قازاقستان وبلىسى