«سارىارقا» گاز قۇبىرى جەلىسىنىڭ قۇرىلىسى 2019 جىلدىڭ قازان ايىندا اياقتالادى دەپ كۇتىلۋدە. جوبا تولىعىمەن 2020 جىلى ءىس جۇزىنە اسىرىلىپ, گاز قۇبىرىنىڭ جەلىسى تولىق سالىنىپ بىتەدى.
«سامۇرىق-قازىنا» ۇلتتىق ءال-اۋقات قورى» اكتسيونەرلىك قوعامى باسقارماسىنىڭ توراعاسى احمەتجان ەسىموۆ «سارىارقا» ماگيسترالدىق گاز قۇبىرى جەلىسىنىڭ سالىنىپ جاتقان 820-شى شاقىرىمىنا بارعان ساپارىندا وسى جانە وزگە دە ماسەلەلەر تۋرالى تىلگە تيەك ەتتى.
گاز قۇبىرى قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ تىكەلەي تاپسىرماسى بويىنشا سالىنىپ جاتقانىن ايتا كەتكەن ءجون. كوپتەن بەرى ايتىلىپ جۇرگەن گاز جەلىسى قازاقستاننىڭ استاناسىن, ەلدىڭ ورتالىق جانە سولتۇستىك وڭىرلەرىن گازبەن قامتاماسىز ەتۋگە ارنالعان.
جالپى, احمەتجان ەسىموۆ قارقىندى جۇرگىزىلىپ جاتقان قۇرىلىس وبەكتىسىنە وڭ باعا بەردى. دەگەنمەن, قۇرىلىس ورنىندا ءالى دە پىسىقتايتىن شارۋالار بار. ەسىموۆ جاۋاپتى تۇلعالارعا قۇرىلىستى بەلگىلەنگەن ۋاقىتتا اياقتاپ, سونداي-اق ىسكە قوسۋ-جوندەۋ جۇمىستارىنىڭ ءوز مەرزىمىندە جۇزەگە اسىرىلۋىن قامتاماسىز ەتۋ قاجەتتىگىن اتاپ كورسەتتى.
«قازىرگى تاڭدا گاز قۇبىرى قۇرىلىسىنىڭ 75 پايىزى اياقتالعان. قۇبىرلاردى جالعاۋ جۇمىستارى قاراعاندى مەن اقمولا وبلىستارىندا جۇرگىزىلۋدە. «قازمۇنايگاز» ۇك» اق اكىمدىكتەرمەن بىرلەسە وتىرىپ, قۇرىلىستىڭ جەلىلىك جاعى تامامدالعاننان كەيىن ەلدى مەكەندەر مەن استانانى گازبەن جابدىقتاۋعا كىرىسەدى», دەيدى ساعيدوللا ماقاشەۆ.
ايتا كەتەيىك, «سامۇرىق-قازىنا» قورى وسى ءىرى جوبانى قارجىلاندىرۋعا قاتىسىپ وتىر, نەگىزگى مەردىگەر – «قازقۇرىلىسسەرۆيس» كومپانياسى, وپەراتورى – «استانا گاز قمگ» كومپانياسى. «سارىارقا» گاز قۇبىرى «بەينەۋ – بوزوي – شىمكەنت» ماگيسترالىنىڭ گاز قۇبىرىنان باستالادى. گاز قۇبىرىنىڭ ۇزىندىعى 1061 شاقىرىم جانە بۇل 1,7 ملن تۇرعىنى بار 171 ەلدى مەكەندى قامتىماق.