ۇستىمىزدەگى جىلى وبلىس ديقاندارى 4 ميلليون 8 مىڭ گەكتار القاپقا ءدان سىڭىرگەن بولاتىن. كوكتەم سالقىن بولعانىمەن, جاز ورتاسى اۋا جاۋىن-شاشىن مول بولدى. كوپتەن بەرى بولا قويماعان ىستىق تا استىقتىڭ ءپىسىپ جەتۋىنە ىقپال ەتتى.
وسىنىڭ ناتيجەسىندە وبلىستاعى استىق شىعىمى كوز قۋانتارلىق. ەندىگىسى جەردە وسكەن ءداندى جەردە قالدىرماي, ۋاقىتىندا جيناپ الۋ. ديقاندار قازىر ارقا توسىندەگى الاپات استىق جورىعىنا قاپىسىز قامدانۋدا. سولاردىڭ ءبىرى – قورعالجىن اۋدانىنداعى «اگروفيرما جەر-888» سەرىكتەستىگى.
انە ءبىر جىلدارى قاراشالعىن اۋىلدىق وكرۋگىنىڭ اۋماعىنان جەر الىپ, ەگىن سەبۋمەن اينالىسقان مامان اگرونوم اباي مەدەۋباەۆتىڭ قيىندىققا دۋشار بولعان كەزى دە بولعان. ماتەريالدىق-تەحنيكالىق جاعدايى ءماز ەمەس ەدى. بار بولعانى ابدەن قاۋساعان ەكى-ءۇش ەسكى كومباين, ءار جەردە شاشىلىپ جاتقان سەبۋ اگرەگاتتارى. كوپتەن ەگىن ەگىلمەگەن القاپتاردى دا ءارامشوپ باسىپ, ابدەن توزىپ كەتكەن. ايتسە دە, قاجىرلى ەڭبەكتەرىنىڭ ارقاسىندا قيىندىق اتاۋلىنىڭ ءبارىن جەڭدى. جەتىستىككە جەتۋگە مەملەكەت تاراپىنان كوپ كومەك كورسەتىلدى.
–مەملەكەت جەرمەن جۇمىس ىستەيتىن ادامدارعا بارلىق جاقسىلىقتى جاسادى. جاڭا تەحنيكا, قاجەتتى مينەرالدى تىڭايتقىشتار ساتىپ الۋعا سۋبسيديا بەرىپ جاتىر,–دەيدى «اگروفيرما جەر-888» سەرىكتەستىگىنىڭ ديرەكتورى اباي مەدەۋباەۆ
قازىرگى جاعداي مۇلدەم باسقاشا. كورسەڭ, كوڭىل قۋانتارلىقتاي. ونىمدىلىگى جوعارى شەتەلدىك جاڭا تەحنيكالار دالا قوسىنىنىڭ جانىندا قاز-قاتار ساپ تۇزەپ تۇر. سەرىكتەستىك بۇرىنعىداي ەمەس, جينالعان استىقتى وزدەرى سۇرىپتاپ, كەپتىرىپ, ساقتاي الادى. جاڭادان سالىنىپ جاتقان استىق قويماسىنا 5 مىڭ تونناعا جۋىق ءدان سيادى.
بۇل شارۋاشىلىق ۇستىمىزدەگى جىلى 10 مىڭ گەكتاردان استام القاپقا بيداي سەپكەن. جاڭا استىقتىڭ ءار اينالىمىنان 11 تسەنتنەردەن ءونىم الامىز دەپ مەجەلەپ وتىر.