ەلىمىزدىڭ قوعامدىق-ساياسي ومىرىندە دامۋدىڭ جاڭا كەزەڭى باستالدى. پرەزيدەنت قاسىم-جومارت توقاەۆتىڭ ەلىمىزدە ادىلەتتى قوعام ورناتۋ, حالىقپەن ساناسا جۇمىس ىستەپ, ولاردىڭ الەۋمەتتىك-تۇرمىستىق جاعدايلارىن جاقسارتۋدى باستى نىسانا ەتىپ الۋى جۇرتشىلىقتىڭ ويىنان شىعىپ, ادامداردىڭ بولاشاققا دەگەن سەنىمدەرىن نىعايتا ءتۇستى. مەملەكەت باسشىسى ۇلىقتاۋ راسىمىندە سويلەگەن سوزىندە ەل ىشىندەگى وزەكتى دەگەن ماسەلەلەردىڭ وڭ شەشىمدەرىن تابۋ ماقساتىمەن ۇلتتىق كەڭەس قۇرۋ قاجەتتىگىن ايتقان بولاتىن. ەل جۇرتشىلىعى بۇل جاڭا قۇرىلىمنان جىل كەلگەندەي جاقسى جاڭالىقتار كۇتىپ, ەلەڭدەسىپ قالعان ەدى.
جاقىندا قازاقستان رەسپۋبليكاسى پرەزيدەنتىنىڭ جانىنان ۇلتتىق قوعامدىق سەنىم كەڭەسى قۇرىلىپ, ونىڭ قۇرامى, ەرەجەسى پرەزيدەنت جارلىعىمەن بەكىتىلدى. ۇلتتىق كەڭەستىڭ قۇرامىنا جۇرتشىلىق كوكەيىندەگى وزەكتى دەگەن ماسەلەلەر جونىندە بۇقارالىق اقپارات قۇرالدارىندا وزدەرىنىڭ وي-پىكىرلەرىن باتىل ايتىپ جۇرگەن ازاماتتاردىڭ ەنگىزىلگەنى قۋانتادى. تاۋەلسىزدىكتىڭ العاشقى جىلدارىنداعى قىم-قۋىت قيىن كەزەڭدە ەكونوميكالىق رەفورمالار جۇرگىزۋگە اتسالىسقان وراز جاندوسوۆ, ساياساتكەرلەر راسۋل جۇمالى, سەيداحمەت قۇتتىقادام, ايدوس سارىم, مۇحتار تايجان, مارات شيبۇتوۆ, دانيار اشىمباەۆ, جانىبەك قوجىق, ەل ىشىندە جۇمىس جاساپ, تاجىريبەسى مول قىرىمبەك كوشەرباەۆ, ەرلان قارين, راۋان كەنجەحان ۇلى سياقتى ەلدىڭ الەۋمەتتىك-ەكونوميكالىق جاي-كۇيىن جاقسى بىلەتىن ازاماتتار ۇلتتىق كەڭەستىڭ قۇرامىندا بولۋى جاڭا قۇرىلىمنىڭ ومىرشەڭ بولاتىنىنا سەندىرەدى. ۇلتتىق كەڭەستىڭ قۇرامىن ءالى دە بولسا تولىقتىرا ءتۇسۋ قاجەت سياقتى. اسىرەسە, مەملەكەتتىڭ بيۋدجەتتىك قورجىنىن تولتىرۋعا قوماقتى ۇلەس قوسىپ كەلە جاتقان, سوڭعى جىلداردا قارسىلىق ءبىلدىرۋشى, نارازى ەلەكتوراتتاردىڭ كوبىرەك توپتاسقان سالاسى مۇنايشىلاردىڭ بەلسەندى وكىلدەرى ەنگىزىلسە دەيمىز.
ۇلتتىق كەڭەستىڭ ەرەجەسىندە بۇرىن قابىلدانىپ, بۇگىنگى كۇنى ارەكەتتە جۇرگەن مەملەكەتتىك باعدارلامالاردىڭ, نورماتيۆتىك-قۇقىقتىق اكتىلەردىڭ وسال تۇستارىنا ساراپتاما جۇرگىزۋ, بۇل ورايدا ازاماتتىق قوعامنىڭ, ساياسي پارتيالاردىڭ, ۇكىمەتتىك ەمەس ۇيىمداردىڭ اراسىندا سىندارلى ديالوگ ورناتۋ ارقىلى جۇرتشىلىق پىكىرىن ەسكەرە وتىرىپ, شەشىمدەر قابىلداۋ مىندەتتەرى ايقىندالعان. ۇلتتىق كەڭەستىڭ وڭىرلەردە كوشپەلى وتىرىستارىن وتكىزىپ تۇرۋ دا كوزدەلگەن.
ورايى كەلگەندە بىرقاتار ۇسىنىستارىمىزدى دا بىلدىرە كەتكەندى ءجون سانايمىن.
– وڭىرلەردەگى جۇرتشىلىقتى تولعاندىرىپ جۇرگەن وزەكتى دەگەن ماسەلەلەر جونىندە ۇسىنىستار جيناقتاۋ ماقساتىمەن حالىققا قىزمەت كورسەتۋ ورتالىقتارىندا ۇلتتىق قوعامدىق سەنىم كەڭەسىنىڭ ارنايى جاشىكتەرىن ورناتۋ قاجەت.
– بوس جۇمىس ورىندارىن جەمقورلىقتىڭ كوزىنە, تامىر-تانىستىققا, ساۋداعا اينالدىرىپ جۇرگەندەردىڭ جولىن كەسۋدىڭ ناقتى جولدارىن قاراستىرۋ كەرەك.
– شەتەلدىك كومپانيالاردا جەرگىلىكتى جۇمىسكەرلەردىڭ ازاماتتىق قۇقىعىنىڭ تاپتالماۋىن كوزدەيتىن زاڭداردى قابىلداتۋعا كۇش سالۋ قاجەت.
– ءبىلىم سالاسىنداعى بىلىكسىز رەفورمالارعا تىيىم سالىپ, باستاۋىش سىنىپتاردا ساباق تەك انا تىلىمىزدە جۇرگىزىلۋىن جۇيەگە ءتۇسىرۋ كەرەك.
– وتاندىق ونىمدەردىڭ ءورىسىن كەڭەيتۋ, جەرگىلىكتى شيكىزاتتى وڭدەيتىن كاسىپورىندارعا سالىقتىق, باسقا دا جەڭىلدىكتەرمەن قولداۋ كورسەتۋ, جاڭا تۋعان سابيلەرگە مىندەتتى تۇردە دەپوزيتتىك ەسەپ كارتالارىن اشۋ, وعان مەملەكەتتىك قوردان نەمەسە اتا-اناسىنىڭ جۇمىس ورنىنان اي سايىن 10 مىڭ تەڭگە كولەمىندە قارجى اۋدارىپ تۇرۋ سياقتى جۇرتشىلىق كوكەيىندە جۇرگەن باسقا دا ماسەلەلەردى ۇلتتىق كەڭەس وتىرىستارىندا جۇيەلى تۇردە تالقىلاپ, ءتيىستى شەشىمدەر قابىلدانسا دەيمىز.
قورىتا ايتقاندا, ۇلتتىق كەڭەستەن كۇتەرىمىز كوپ, قالىڭ كوپشىلىكتىڭ كوكەيىندەگى ناقتى ۇسىنىستار ەسكەرىلىپ, ۇتىمدى شەشىمدەر قابىلدانىپ, ناقتى ىسكە اسىرىلىپ جاتسا, ۇتارىمىز دا كوپ بولماق دەگەن سەنىمدەمىز.
ەسبەرگەن ىڭىرباي ۇلى,
اقتاۋ قالالىق قوعامدىق كەڭەسىنىڭ توراعاسى
ماڭعىستاۋ وبلىسى