«وي تۇستەرى». بىرىمەن-ءبىرى جىمداسىپ, يىقتاسا قاتار ورىلگەن ءتۇرلى تۇستەر گالەرەياسى بەينەلەنگەن كارتينا وسىلاي اتالادى. جالپى كەسكىنى قۇراق كورپەنى ەسكە تۇسىرگەن سۋرەت اتاۋىنا قاراپ, ەرىكسىز ويعا باتاسىڭ. ادامنىڭ ءبىر ساتتە مىڭ سان تاراپقا قۇبىلاتىن ويىن بىرەۋ كوركەم سوزبەن جەتكىزسە, ەندى بىرەۋ بوياۋلى تۇسپەن ايشىقتايدى.
ويدىڭ قاي كەزدە قانداي تۇسكە بويالىپ جاتقانىن اركىمنىڭ ءوز ءىشى عانا بىلسە كەرەك. اۆتور دا ءوز بويىنان بايقاعان وي قۇبىلىستارىن سالىپ وتىر. قىزىعى سول, كارتيناعا قاراپ, ءتۇرلى بوياۋدىڭ اراسىنان سول ساتتەگى ءوز وي-ءتۇسىڭدى, ءوز كۇيىڭدى ىزدەيدى ەكەنسىڭ.
ۇلتتىق اكادەميالىق كىتاپحاناداعى ءبىز تاماشالاعان بەلگىلى قىلقالام شەبەرى رۋسلان اقاناەۆتىڭ جەكە كورمەسى 7 شىلدەدە اشىلعان بولاتىن. مۇندا شەبەردىڭ سوڭعى جىلدارى سالىنعان جۇمىستارى قويىلعان. اتالمىش كورمە مادەنيەت جانە سپورت مينيسترلىگىنىڭ قولداۋىمەن «رۋحاني جاڭعىرۋ» باعدارلاماسى اياسىندا وسكەلەڭ ۇرپاققا سۋرەت ونەرىن ناسيحاتتاۋ ماقساتىندا ءوتىپ وتىر.
ر.اقاناەۆتىڭ جۇمىستارى «شىعىستىق گالەرەيا» (ماسكەۋ قالاسى), «الىس الەمدەر» (ۆاشينگتون قالاسى), «Has Sanat» (استانا قالاسى), «تريبۋنا» (الماتى قالاسى) گالەرەيالارىندا قويىلعان. رەسەي, گەرمانيا, فرانتسيا, امەريكا, كانادا, قازاقستان, ليحتەنشتەين مەن شۆەيتساريادا جەكە كوللەكتسيالاردا ساقتاۋلى.
كورمەدەگى نازارعا ىلىگىپ, كوڭىلگە قوزعاۋ سالعان «وي تۇستەرى» كارتيناسى حاقىندا اۆتوردىڭ وزىنەن سىر تارتىپ, بليتس-سۇحبات جاساعان ەدىك.
– «وي تۇستەرى» دەپ ءوزىڭىز اتادىڭىز با؟ سەبەبى نەدە؟
– شىعارما تاقىرىبىن ءوزىم قويدىم. ماعان كورىنبەيتىن ەنەرگيالاردى بەينەلەگەن ۇنايدى. وسى سەكىلدى «تىنىشتىق دىبىسى», «جۇپار ءتۇسى», ت.ب. كارتينالارىم بار.
– سۋرەتتى سالۋعا كوپ ۋاقىتىڭىز كەتتى مە؟
– ءبىر ايداي ۋاقىت جۇمسادىم.
– «وي تۇستەرىندە» قانشا ءتۇس قولداندىڭىز؟
– بارلىق ءتۇستى پايدالاندىم دەسەم بولادى.
– قاي ءتۇس باسىم؟
– مەن كوبىنە كوك پەن كۇلگىن ءتۇستى ءجيى قولدانامىن. مۇندا دا سولاي.
– سالۋ ۇستىندە قانداي كوڭىل كۇيدە بولدىڭىز؟ ونىڭ كارتيناعا اسەرى بولدى ما؟
– كوڭىل كۇيىم مەدياتيۆتى بولدى. ايتپەسە مۇنداي كارتينانى سالۋ وتە قيىن بولار ەدى.
– كارتينادا قارا ءتۇس نەگە جوق؟
– قارا ءتۇس بولسا, ء«ومىر تۇستەرى» دەپ اتار ەدىم.
– ادام ويىنىڭ ءتۇرلى كۇيلەرىن تۇسپەن بەينەلەۋ يدەياسى قالاي تۋدى؟
– ءوز ويلارىمدى باقىلاپ ءجۇردىم. ياعني وزىمە ەكسپەريمەنت جاسادىم. بايقاعانىمدى تۇستەرمەن جەتكىزگىم كەلدى.
– نەگە ء«ومىر تۇستەرى» ەمەس, «وي تۇستەرى»؟
– ويتكەنى ءومىر ويدان باستالادى.
– الەمدىك ارەنادا كىمنىڭ كارتيناسىن ەرەكشە باعالايسىز؟
– لەوناردو دا ءۆينچيدىڭ بارلىق شىعارماسى ۇنايدى.
– اڭگىمەڭىزگە راحمەت.