بيىل جاز قارا قارعانىڭ ميى قاينايتىن ەرەسەن ىستىق بولدى. نەگىزىندە دالالىق الاڭقاي جەرلەردىڭ ءشوبى الدەن قۋراپ, ولىقاۋعا اينالعان. شىرپى تۇسسە, تامىزدىقتاي جانباق.
ورماندى القاپتاردىڭ ءوزى دە وسىنداي كۇيگە ۇشىراۋدا. سوندىقتان دالا ءورتىنىڭ قاۋپى ۋشىعىپ تۇر. ەرەيمەنتاۋ اۋدانىنا قاراستى قويتاس سەلولىق وكرۋگىندەگى ماساقباي جايىلىمىنىڭ ماڭى ورتەنىپ جاتىر. الدىن الا ەسەپتەۋگە قاراعاندا ءتىلسىز جاۋ قازىردىڭ وزىندە 280 گەكتار جەردى جالماپ كەتكەن. وبلىستىق توتەنشە جاعدايلار دەپارتامەنتى جەدەل شتاب قۇرىپ, ءورتتى ءسوندىرۋ باعىتىندا قاۋىرت جۇمىس ىستەۋدە. ءورت سوندىرۋگە دەپارتامەنتتىڭ 12 تەحنيكاسى مەن جەكە قۇرامنىڭ 52 ادامى, ورمان شارۋاشىلىعىنىڭ 3 تەحنيكاسى مەن 14 جۇمىسشىسى, سونداي-اق, ءورت سوندىرۋگە قولعابىس ەتۋگە كەلگەن ەرىكتىلەردىڭ 22 تەحنيكاسى مەن 120 ادامى جۇمىلدىرىلعان.
ءورت قاۋپى مولايعان شاقتا 30 مارتە ورمان ءورتى شىققاندىعىن, 207 گەكتار القاپتاعى قۇرعاق ءشوپتىڭ تۇتانىپ, 59 ءورت وقيعاسى تىركەلگەندىگىن ايتا كەتەلىك. ءورت قاۋىپسىزدىگى تالاپتارىن بۇزعان 46 ادام جاۋاپقا تارتىلىپ, وبلىس تۇرعىندارى اراسىندا قاۋىپسىزدىك شارالارىن قاتاڭ ساقتاۋ قاجەتتىگى قانشا مارتە ايتىلسا دا, كەيبىرەۋلەر ءالى دە سالعىرت قاراۋدا. قازىر سوندىرىلمەي تاستالعان تەمەكى تۇقىلىنىڭ ءوزى تابيعاتقا وراسان زور شىعىن اكەلەدى. قايىڭى مەن قاراعايى قاۋلاي وسكەن ءبىرجان سال اۋدانىنىڭ ورماندارىن سەگىز مارتە ءورت شالدى. ال بۋرابايدىڭ قايتالانباس سۇلۋ ديدارىنا كىرەۋكە تۇسىرگەن 5 ءورت وقيعاسى بولدى.
الدا وراق ناۋقانى. ول كەزدە دە ءورت قاۋپى ەسەلەنە تۇسەدى. سوندىقتان, جول جيەگىندەگى جولاقتىڭ ەنىن ۇلكەيتىپ, ءتورت مەترگە جەتكىزە جىرتقان ءجون. اۋىل شارۋاشىلىعى قۇرىلىمدارىنىڭ باسشىلارىنا ەسكەرتىلىپ, ماسەلەنىڭ ءمانىسىن ۇعىندىرساق, دالانىڭ ديدارىن ساقتاپ قالامىز.