پەتروپاۆل قالاسىنداعى سپورت سارايىندا قازاق كۇرەسىنەن كاسىبي كلۋبتار اراسىندا تۇڭعىش رەت رەسپۋبليكالىق كۋبوك جارىسى ءوتتى.
جارىستىڭ اشىلۋ سالتاناتىنا وبلىس اكىمىنىڭ ءبىرىنشى ورىنباسارى مارات تاسماعانبەتوۆ قاتىسىپ, سپورتشىلارعا تابىس تىلەدى.
– وڭىردە ات سپورتىنان «تۇلپار» جانە قازاق كۇرەسىنەن «قىزىلجار ارلاندارى» كاسىبي كلۋبتارى جۇمىس ىستەيدى. زاماناۋي تەننيس ورتالىعى پايدالانۋعا بەرىلدى. م.جۇماباەۆ, ش.ءۋاليحانوۆ اۋداندارىندا سپورت كەشەندەرى اشىلدى. وبلىس تۇرعىندارىنىڭ 30 پايىزعا جۋىعى سالاماتتى ءومىر سالتىن ۇستانىپ, سپورتپەن شۇعىلدانادى, دەدى مارات يمانباي ۇلى قۇتتىقتاۋ سوزىندە.
قازاق كۇرەسى فەدەراتسياسىنىڭ باس حاتشىسى باقداۋلەت ءسابيتوۆ, قازاق كۇرەسىنەن وڭىردەگى العاشقى سپورت شەبەرى باۋىرجان قۇلجانوۆ ءوز سوزدەرىندە قازاق كۇرەسىنە جانە ۇلتتىق سپورتتىڭ دامۋىنا ءتيىستى دەڭگەيدە قولداۋ كورسەتىلىپ كەلە جاتقانىن اتاپ ءوتتى.
جارىس باعدارلاماسىنا سايكەس بوز كىلەمگە شىققان كلۋب وكىلدەرى جەتى سالماق بويىنشا بەس مينۋتتان بەلدەستى. نۇر-سۇلتان قالاسىنىڭ «استانا باتىرى» مەن الماتى قالاسىنىڭ «قازاق كۇرەسى» كوماندالارى اراسىنداعى بەلدەسۋ 1:6 ەسەبىمەن سوڭعىسىنىڭ پايداسىنا شەشىلدى. قاراعاندىلىقتار ەلوردالىقتاردى 7:0 ەسەبىمەن ويسىراتا ۇتتى. «قىزىلجار ارلاندارى» قاراعاندىلىقتاردى تىزە بۇكتىردى.
ەكى كۇنگە سوزىلعان باسەكەدە تاراز قالاسىنىڭ «جەكپە-جەك» سپورت كلۋبى جەڭىمپاز اتاندى. الماتىلىقتار ەكىنشى, الاڭ يەلەرى ءۇشىنشى ورىنعا يە بولدى.
سولتۇستىك قازاقستان وبلىسى