ءۇزىلىپ تۇسكەن مونشاقتاي اسەم كوگىلدىر كولدەر مەن قولدىڭ سالاسىنداي اققايىڭدار, ماڭگى جاسىل قاراعايلار كومكەرگەن اقمولا اتىرابىندا سوڭعى ۋاقىتتا 31 ورمان ءورتى ورىن الدى. ءتىلسىز جاۋ 55,52 گەكتار القاپتى جالماپ كەتتى.
وبلىستىق ورمان شارۋاشىلىعى جانە جانۋارلار دۇنيەسى ينسپەكتسياسىنىڭ العاشقى جارتى جىلدىقتا اتقارىلعان جۇمىستى ەكشەگەن ساتىندە, وسىنداي دەرەكتەر ايتىلدى. وبلىس اۋماعى 14 ميلليون 667 مىڭ گەكتاردى الىپ جاتىر. كورىكتى وڭىردەگى ورمان قورى دا از ەمەس. جىل باسىنان بەرى 164 جوسپارلى جانە جوسپاردان تىس تەكسەرۋ جۇرگىزىلگەن. تەكسەرىس بارىسىندا ءبىرشاما ولقىلىقتىڭ بەتى اشىلىپ وتىر. ماسەلەن, زاڭسىز اعاش كەسۋدىڭ 9 فاكتىسى انىقتالعان. وتكەن جىلمەن سالىستىرعاندا سالاداعى زاڭ بۇزۋشىلىقتار ەڭ الدىمەن سالا قىزمەتكەرلەرىنىڭ جاۋاپكەرشىلىگىنىڭ تومەندەۋىنەن ورىن الىپ وتىر دەگەن ايىپتاۋ دا ايتىلدى. الداعى ۋاقىتتا قوردالانىپ قالعان ماسەلەلەردى شەشۋ جولدارى دا كورسەتىلدى. ايتالىق «بۇقپا» جانە «باراپ» ورمان شارۋاشىلىقتارىندا قاۋىپسىزدىك شارالارىنىڭ قولعا الىنۋى تالاپقا ساي كەلمەيدى.
–بۇگىنگى كۇنى 107 زاڭ بۇزۋشىلىق انىقتالدى. زاڭ بۇزعانداردىڭ 38-ىنە 4 ميلليون 27 مىڭ تەڭگە كولەمىندە اكىمشىلىك ايىپپۇل سالىندى,–دەيدى وبلىستىق ورمان شارۋاشىعى جانە جانۋارلار دۇنيەسى ينسپەكتسياسىنىڭ باسشىسى ايدار دارباەۆ,–3 ميلليون 926 مىڭ تەڭگە ءوندىرىلىپ الىندى.
جاۋاپتى تۇلعالاردىڭ ايتۋىنا قاراعاندا, جانۋارلار الەمى سالاسىندا زاڭنامانى ورەسكەل بۇزۋدىڭ 20 وقيعاسى تىركەلگەن. زاڭسىز ساڭ اۋلاۋعا قاتىستى 9 قىلمىستىق ءىس قوزعالىپتى. قورىتا ايتقاندا, جانۋارلار الەمىنە 1 ميلليارد 360 ميلليون تەڭگە شاماسىندا زالال كەلتىرىلگەن. ءبىر جاقسىسى, سيرەك كەزدەسەتىن اڭ-قۇس مىلتىقتىڭ قاراۋىلىنا ىلىنبەپتى.