بيزنەستى «كولەڭكەدەن» شىعارىپ, بيۋدجەتكە سالىق تۇسىمدەرىن كوبەيتۋ ءۇشىن قازىرگى تاڭدا سالىق-كەدەن ساياساتى جەتىلدىرىلىپ, قولما-قول اقشا اينالىمى ازايتىلىپ جاتىر.
ۇكىمەت ۇيىندە وتكەن ءباسپاسوز ماجىلىسىندە ۇلتتىق ەكونوميكا ۆيتسە-ءمينيسترى بەرىك شولپانقۇلوۆ پەن مەملەكەتتىك كىرىستەر كوميتەتى توراعاسىنىڭ ورىنباسارى جايدار ىڭكارباەۆ «كولەڭكەلى ەكونوميكانى» ازايتۋ بويىنشا اتقارىلىپ جاتقان جۇمىستار مەن الداعى جوسپارلار تۋرالى ەسەپ بەردى.
مينيستر ورىنباسارىنىڭ ايتۋىنشا, قازىرگى تاڭدا ەلدەگى كولەڭكەلى ەكونوميكانىڭ ۇلەسى ىشكى جالپى ءونىمنىڭ 30 پايىزىنا دەيىن جەتەدى. سونىڭ ىشىندە ساۋدا مەن قۇرىلىس سالاسىندا سالىقتان جالتارۋشىلار كوپ ەكەن. دەگەنمەن سوڭعى جىلدارى كورسەتكىشتىڭ ازايىپ كەلە جاتقانى بايقالادى. ال 2025 جىلعا دەيىن كولەڭكەلى ەكونوميكانىڭ ۇلەسى ەكونوميكالىق ىنتىماقتاستىق جانە دامۋ ۇيىمى ەلدەرىنىڭ دەڭگەيىنەن, ياعني ىشكى جالپى ءونىمنىڭ 15-17 پايىزىنا دەيىن تومەندەتۋ جوسپارلانىپ وتىر. بۇل ءۇشىن مينيسترلىك بىرقاتار باستامالاردى قولعا الماق. اتاپ ايتار بولساق, ەلەكتروندى شوت-فاكتۋرا اقپاراتتىق جۇيەسى تاۋارلاردىڭ سوڭعى تۇتىنۋشىعا دەيىن قوزعالىسىن باقىلاۋعا مۇمكىندىك بەرسە, ۆيرتۋالدى قويما ءمودۋلى ارقىلى اۆتوماتتى رەجىمدە تاۋار قوزعالىسىنىڭ پروتسەسىن قاداعالاۋعا بولادى.
زاتتاي قاداعالاۋ بويىنشا تاۋارلاردى تاڭبالاۋ جۇمىستارى باستالىپ كەتكەن. قاناتقاقتى جوبانىڭ ناتيجەسىندە تەرى بۇيىمدارى بويىنشا تابىس 1,5 ەسەگە ۇلعايعان. ال قازىر تەمەكى مەن الكوگول ونىمدەرىنە وسى ءادىس قولدانىلا باستادى.
بلوكچەين تەحنولوگياسى ارقىلى دا قوسىلعان قۇن سالىعىن باقىلاۋ شوتىن پايدالانا وتىرىپ ققس-ءتى اكىمشىلەندىرۋدىڭ جاڭا ءادىسى ەنگىزىلدى. ققس باقىلاۋ شوتىن پايدالاناتىن سالىق تولەۋشىگە قاتىستى قوسىلعان قۇن سالىعىن قايتارۋ كەزىندە سالىقتىق تەكسەرۋلەر الىنىپ تاستالادى جانە قوسىلعان قۇن سالىعىن قايتارۋ مەرزىمى 55-تەن 15 جۇمىس كۇنىنە دەيىن قىسقارتىلدى.
2020 جىلدىڭ 1 قاڭتارىنان باستاپ جاپپاي ونلاين-باقىلاۋ كاسسالىق قۇرىلعىسىن قولدانۋ ارقىلى ەندى مەملەكەتتىك كىرىستەر كوميتەتى رەيدتىك تەكسەرىستىڭ ورنىنا كامەرالىق باقىلاۋ جاسايتىن بولادى.
سونىمەن قاتار ەۋرازيالىق ەكونوميكالىق وداق اۋماعى بويىنشا تاۋارلار ءترانزيتىنىڭ بىرىڭعاي جۇيەسى قۇرىلماق. ال رەسەي فەدەراتسياسىمەن ارادا ناۆيگاتسيالىق ەلەكتروندى پلومبالاردى پايدالانۋ بويىنشا قاناتقاقتى جوبا ىسكە قوسىلماق. ءۇشىنشى ەلدەردەن يمپورتتالاتىن تاۋارلار ءتۇسىمىنىڭ 30 پايىزى قىتايدان كەلەتىن يمپورتقا تيەسىلى ەكەنىن ەسكەرە وتىرىپ, مينيسترلىكتىڭ مەملەكەتتىك كىرىستەر كوميتەتى مەن قحر باس كەدەن باسقارماسى ءوزارا ونلاين رەجىمدە ەلەكتروندى اقپارات الماسۋ بويىنشا كەلىسىمگە كەلىپ جاتىر.
«تاۋارلاردى تاڭبالاۋ, ەلەكتروندى شوت-فاكتۋرا ەنگىزۋ, ۆيرتۋالدى قويما جاساۋ, تاۋەكەلدەردى باسقارۋ جۇيەسىن قۇرۋ مەن ونلاين-كاسسا ەنگىزۋ سەكىلدى اقپاراتتىق جۇيەلەردى قولدانۋدان ۇلكەن ناتيجە كۇتىپ وتىرمىز. وتكىزىلەتىن ءىس-شارالار سالىقتىق جانە كەدەندىك اكىمشىلەندىرۋدى تسيفرلاندىرۋعا, اقپاراتتىق جۇيەلەردى ىقپالداستىرۋعا نەگىزدەلگەن» دەگەن ب.شولپانقۇلوۆ تاۋارلاردى قاداعالاۋ جۇيەسىن قۇرۋ ەكونوميكانى كونترافاكتىلىك ونىمدەردەن قورعاۋعا دا مۇمكىندىك بەرەتىنىن ايتتى.
جالپى, جوعارىدا ايتىلعان باستامالار ىسكە اسىرىلاتىن بولسا, الداعى جىلى بيۋدجەتكە قوسىمشا 800 ملرد تەڭگە كىرىس كىرمەك. ج.ىڭكارباەۆتىڭ ايتۋىنشا, قازىرگى تاڭدا «كولەڭكەدەگى» كاسىپكەرلەردىڭ كەسىرىنەن ەل بيۋدجەتى جىلىنا 2,5 ترلن تەڭگەدەي كىرىستەن قاعىلىپ وتىرعان كورىنەدى.