ءى. وماروۆ اتىنداعى وبلىستىق قازاق دراما تەاترىنىڭ ۇجىمى جاقىندا عانا موڭعوليادان ورالدى. وندا تەاتر بايان ولگي قالاسىنىڭ كورەرمەندەرىنە ەكى بىردەي قويىلىم ۇسىندى.
«بوتاقارا» سپەكتاكلىندە 17-18 عاسىرلارداعى قازاق-جوڭعار اراسىنداعى شايقاس, قازاق جەرىن سىرتقى جاۋدان قورعاۋداعى باتىرلار ەرلىگى باياندالادى. بايانولگيلىك اۆتور اسكەرحان اقتايدىڭ بۇل شىعارماسىن تەاتردىڭ باس كوركەمدىك جەتەكشىسى ءاليا بايماحان ساحنالادى.
ەكىنشى شىعارما «مۇڭمەن الىسقان ادام» سپەكتاكلى جەر بەتىندە تارىداي شاشىلعان قازاقتاردىڭ تاعدىرى باياندايدى.
«بوتاقارا» قويىلىمىنداعى بوتقارا – جوڭعار شاپقىنشىلىعى كەزىندە بالقاش ماڭىن جاۋدان قورعاپ قالعان باتىر, ومىردە بولعان ادام. قازىر سول ماڭدا بوتاقارا دەگەن تاۋ بار. شىعارمادا بوتاقارا مەن شەشەنبيكە دەگەن قىرعىز قىزى ەكەۋى قازاق-قالماقتىڭ اراسىندا بىتىمگەرشىلىك ورناتىپ, سىرتقى جاۋعا سولاي تويتارىس بەرۋدى ويلاستىرادى. شىعارمانىڭ, قويىلىمنىڭ ماقساتى تەك اتىس-شابىس عانا ەمەس, تاتۋلىققا, بىتىمگەرشىلىككە ۇندەيدى. كەيدە قازاق پەن قالماق ءومىر بويى تىستەسىپ وتكەن دەگەن تۇسىنىك قالىپتاسقان. بىراق تاريحقا ۇڭىلسەك ءدىنى بولەك بولعانمەن تۇرمىسى ۇقساس ەكى حالىقتىڭ سوعىسسىز, تاتۋ كەزدەرى دە بولعان. رەجيسسەر شەبەرلىگىنىڭ ارقاسىندا كولەمدى قويىلىم ساحناعا ىقشامدالىپ شىعارىلدى. بار-جوعى ون اكتەر عانا ويناپ شىقتى», دەيدى تەاتردىڭ ادەبيەت ءبولىمىنىڭ مەڭگەرۋشىسى ابىلاي ماۋدان.
كورەرمەندەر ەكى قويىلىمعا دا ريزاشىلىعىن ءبىلدىردى. ساحنا شەبەرلىگىن جاقسى مەڭگەرگەن قوستانايلىق ارتىستەر موڭعول ەلىنەن قۇرقول قايتپادى. بوتاقارا رولىندە ويناعان اكتەر اسىلان كەنجەتاي جانە شەشەنبيكە بەينەسىن سومداعان ءمولدىر قۇباش «موڭعوليا مادەنيەت سالسىنىڭ ۇزدىگى» توسبەلگىسىمەن ماراپاتتالدى.
«موڭعوليا ساپارى تابىستى بولدى. جاستار جىلى بولعاندىقتان بۇل جولى ساحنادا نەگىزىنەن جاستار ونەر كورسەتتى, اكتەرلەرىمىز ابىروي بىيىگىنەن كورىندى» دەيدى تەاتر اكتەرى, جاستار ۇستازى قونىسبەك بەگايداروۆ.
قوستاناي