شىلدە ايىنىڭ اياعىندا چەشەنستاننىڭ استاناسى گروزنىي قالاسىندا چەشەن رەسپۋبليكاسىنىڭ تۇڭعىش پرەزيدەنتى, رەسەي باتىرى احماد قاجى قادىروۆتى ەسكە الۋعا ارنالعان جەكپە-جەكتىڭ مما تۇرىنەن بالالار اراسىندا حالىقارالىق جارىس وتكەن بولاتىن. وسى جارىسقا قازاقستاننىڭ نامىسىن قورعاۋعا بارعان ورالدىق بالالار قالا كوشەسىندە چەشەنستان رەسپۋبليكاسىنىڭ پرەزيدەنتى رامزان قادىروۆپەن كەزدەسىپ قالىپ, بىرگە سۋرەتكە تۇسكەن.
2007 جىلى جىمپيتىدا دۇنيەگە كەلگەن مانسۇر نۇرلىبەك ۇلى ورال قالاسىنداعى №34 مەكتەپتە وقيدى. ءۇش جىلدان بەرى تاەكۆوندوعا قاتىسادى. جاتتىقتىرۋشى, باتىس قازاقستان وبلىستىق تاەكۆوندو فەدەراتسياسىنىڭ پرەزيدەنتى ارالبەك احمەتوۆتىڭ شاكىرتى وسى جىلدار ىشىندە قازاقستاننان بولەك, بەلارۋس, رەسەي فەدەراتسياسى تورىندە توسەلگەن تاتاميلەردە مىقتىلىعىن دالەلدەپ, حالىقارالىق جارىستاردىڭ چەمپيونى بولىپ ۇلگەردى. مانسۇر نۇرلىبەك ۇلى بيىل تاەكۆوندودان ازيا كۋبوگىنىڭ يەگەرى اتاندى.
11 جاسار جەتكىنشەك كەيىنگى ۋاقىتتا ارالاس جەكپە-جەكپەن اينالىسىپ ءجۇر. تورداعى توبەلەس تارلاندارىنىڭ وتانى سانالاتىن گروزنىيداعى جارىسقا جولداما الۋدىڭ ءوزى ونىڭ سپورتتىڭ بۇل تۇرىنەن دە وسال ەمەستىگىن بىلدىرەدى. جارىستى ۇيىمداستىرعان «AKHMAT» جەكپە-جەك كلۋبى بۇگىندە الەمگە تانىمال. fightnews.info سايتىنىڭ مالىمەتىنشە, وسى كلۋبتىڭ 6 جاۋىنگەرى UFC ليگاسىنا تىركەلگەن.
چەشەنستان استاناسىندا سالماعىنا ساي قارسىلاس بولماۋىنا بايلانىستى ءبىزدىڭ باتىر جەكپە-جەك وتكىزە المادى. بىراق رامزان قادىروۆپەن كەزدەسۋ ول ءۇشىن ەڭ ءبىر ەلەۋلى وقيعا بولدى.
ءبىز مانسۇردىڭ وزىنە حابارلاسىپ, كەزدەسۋدىڭ قالاي بولعانىن سۇرادىق:
– جارىستان كەيىن جاتتىقتىرۋشىمىزبەن بىرگە گروزنىيدىڭ كورىكتى جەرلەرىن تاماشالاپ, قىدىرىپ جۇرگەنبىز. رامزان مىرزا دا كەشكى قالادا ۆەلوسيپەد تەۋىپ, سەرۋەندەپ ءجۇر ەكەن. قاسىمىزداعى اتا-انانىڭ ءبىرى وعان «قازاقستاننان سالەم!» دەپ ايقايلادى. رامزان قادىروۆ ءبىزدى ەستىپ, جانىمىزعا كەلىپ توقتادى.
– قازاقتارعا قالاي توقتامايمىن؟, – دەپ جىميدى سوسىن. ءبىز قۋانىپ كەتتىك.
چەشەن حالقىنىڭ باسشىسى وتە كىشىپەيىل ءارى قازاق حالقىن ەرەكشە قۇرمەتتەيدى ەكەن. بارىمىزبەن جەكە-جەكە سۋرەتكە ءتۇستى. ءتىپتى, توپ بولىپ سۋرەتكە تۇسكەندە, ول ءبىزدىڭ كوك تۋىمىزدى كوتەرىپ تۇردى. قازاقتارعا دۇعاي سالەم جولداپ ءبىزدى قوناققا شاقىردى. قازاق مەيماندارعا چەشەندەر «ۆاسابي» مەيرامحاناسىندا داستارقان جايدى.
چەشەنستان رەسپۋبليكاسىنىڭ پرەزيدەنتىمەن كەزدەسۋىمدى, جاساعان سەلفيىمدى كورىپ ءبارى قۋانۋدا. بۇل دا ءبىر تاريح قوي!, – دەيدى مانسۇر نۇرلىبەك ۇلى.
جەتكىنشەك اپتانىڭ 6 كۇنىن جاتتىعۋ زالىندا وتكىزەدى. ول دەمالىستىڭ وزىندە دە ۋاقتىلى جۇگىرىپ, فۋتبول ويناپ, كەرمەگە تارتىلىپ, بابىن جوعالتپاۋدىڭ امالىن جاساپ ءجۇر. ءوزىنىڭ ايتۋىنشا, ونىڭ ءبارى وليمپيادا چەمپيونى بولۋ ءۇشىن كەرەك.
باۋىرجان شيرمەدين ۇلى,
جۋرناليست
باتىس قازاقستان وبلىسى