ماڭعىستاۋدا تۇرعىنداردى تەگىن ءدارى-دارمەكپەن قامتاماسىز ەتۋ جالعاسىپ جاتىر. بۇگىنگى تاڭدا وبلىستا تەگىن ءدارى بەرۋ پروتسەسى SMS-حابارلاما ارقىلى باقىلانىپ وتىر. «الەۋمەتتىك مەديتسينالىق ساقتاندىرۋ قورى» («امسق») كەلتىرگەن دەرەك بويىنشا, بيىل ءساۋىر-ماۋسىم ايلارىندا رەسپۋبليكا بويىنشا تەگىن ءدارى-دارمەك العاندار تىزىمىنە ەنگەن پاتسيەنتتەردىڭ تەلەفوندارىنا شامامەن ميلليوننان استام SMS-حابارلاما جىبەرىلگەن بولاتىن.
SMS-حابارلاما قورىتىندىسى بويىنشا, قورعا 27 798 پاتسيەنتتەن جاۋاپ كەلدى. ونىڭ ىشىندە 4 137 پاتسيەنتتىڭ ءدارى-دارمەكتى الماعانى انىقتالدى. ءدارى-دارمەكتىڭ قولعا تيمەگەنى تۋرالى حابارلامانىڭ باسىم بولىگىن قىزىلوردا, ماڭعىستاۋ, شىعىس قازاقستان, تۇركىستان جانە الماتى وبلىستارىنىڭ تۇرعىندارى جولداعان.
سونداي-اق, بۇل مونيتورينگ جازىلعان رەتسەپتىلەر مەن قولما-قول بەرىلگەن ءدارى سانى ءبىر-بىرىنە سايكەس كەلمەيتىن 10 مەديتسينا ۇيىمىن انىقتاۋعا مۇمكىندىك بەردى. ولاردىڭ قاتارىندا امبۋلاتوريالىق-ەمحانالىق قىزمەتى بار جالاعاش اوا, قىزىلوردا وبلىستىق مەديتسينا ورتالىعى, ماڭعىستاۋ وبلىسىنداعى №1 اقتاۋ قالالىق ەمحاناسى, شىعىس قازاقستان وبلىسىنداعى ۇلان اۋداندىق ورتالىق اۋرۋحاناسى, جەتىساي اۋداندىق «اسىقاتا» اۋرۋحاناسى, تۇركىستان وبلىسىنداعى تۇلكىباس اۋداندىق ورتالىق اۋرۋحاناسى, الماتى وبلىسىنداعى تالعار جانە ىلە اۋداندىق اۋداندىق ورتالىق اۋرۋحانالارى بار. زاڭ بۇزۋشىلىقتاردى انىقتاۋ ماقساتىندا الىنعان مالىمەتتەر وكىلەتتى مەملەكەتتىك ورگاندارعا جىبەرىلىپ وتىر.
ال «امسق» ماڭعىستاۋ فيليالى كەلتىرگەن مالىمەت بويىنشا, ءدارى-دارمەك ۇيلەستىرۋ بويىنشا العاشقى جارتىجىلدىقتا 61 زاڭسىز جاعداي (دەفەكت) انىقتالىپ وتىر. سول سەبەپتى ەمحانالار ەسەبىنەن 1 258 478 تەڭگە كولەمىندە قارجى قىسقارتىلعان.
وبلىستىق دەنساۋلىق ساقتاۋ باسقارماسىنىڭ ءدارى-دارمەك پەن ماتەريالدىق-تەحنيكالىق قامتاماسىز ەتۋ ءبولىمى باسشىسى تيمۋر مالىك ۇلى تەگىن ءدارى الاتىن تۇرعىندار ەمحاناعا بارىپ, تەلەفون ءنومىرىن قالدىرۋ قاجەتتىگىن ايتادى. ويتكەنى, كوپشىلىك تۇرعىنداردىڭ تەلەفون نومىرلەرى دۇرىس ەمەس نەمەسە قالدىرماعان.
ەسكەرتە كەتۋ كەرەك, تەگىن ءدارى-دارمەك تيەسىلى تۇرعىنداردىڭ تەلەفونىنا حابارلاما كەلەدى. حابارلامادا رەتسەپتىنىڭ ءنومىرى مەن ءدارىنىڭ بەرىلگەن كۇنى كورسەتىلەدى. پرەپاراتتار شىن مانىندە قولىنا تيمەگەن پاتسيەنتتەر SMS-حابارلاماعا جاۋاپ رەتىندە «0» تسيفرىن جولداي الادى نەمەسە «سق-فارماتسيا» جشس-ءنىڭ 1439 بايلانىس نومىرىنە قوڭىراۋ شالسا بولادى.
ەگەر ءدارى-دارمەككە قاتىستى تۇرعىنداردان سۇراق تۋىنداسا, ءوزى تىركەلگەن دارىگەردەن سۇراۋى قاجەت. ماسەلەن, مەدبيكە نە ۋچاسكەلىك دارىگەر پاتسيەنتكە تيەسىلى ءدارى بەرمەدى دەلىك. سول ەمحانانىڭ باس دارىگەرىنە نەمەسە ونىڭ ورىنباسارىنا كىرىپ, ارىز جازۋى ءتيىس. ەگەر ەمحانا دەڭگەيىندە بۇل ماسەلە شەشىلمەگەن جاعدايدا, 24 ساعات قىزمەت ەتەتىن دەنساۋلىق ساقتاۋ باسقارماسىنىڭ كولل-تسەنتر ورتالىعىنا قوڭىراۋ شالا الادى. (تەل. 303060, 87758776259) مۇنى ايتىپ جاتقان سەبەبىم, كوپشىلىك جاعدايدا تۇرعىندار ءبىزدىڭ باسقارماعا كەلىپ جاتادى, ال ەمحانا دارىگەرلەرى بۇل ماسەلەدەن بەيحابار. ارينە, بۇل تۇرعىننىڭ جەكە قۇقىعى, دەگەنمەن ماسەلەنى وسىلاي جەدەل شەشۋگە بولادى, - دەيدى تيمۋر مالىك ۇلى.