قوستاناي وبلىستىق پوليتسيا دەپارتامەنتىندە تاجىريبەلى مامانداردان قۇرىلعان جەدەل توپ كيىكتى زاڭسىز اتقان ەكى ازاماتتى ەكى ساعاتتىڭ ىشىندە تاۋىپ, ناۋىرزىم اۋدانىنداعى اقجول اۋىلىنىڭ ماڭىنان ۇستادى. ولار اتقان كيىكتىڭ ولەكسەسىن لاقتىرىپ تاستاپ, وزدەرى سىتىلىپ كەتكىسى كەلگەن.
وقيعا تۋرالى دابىل تۇسىسىمەن ناۋىرزىم اۋداندىق پوليتسيا بولىمىنەن جەدەل-ىزدەستىرۋ توبى قۇرىلدى, وعان وبلىستىق پوليتسيا دەپارتامەنتىنەن جەدەلدەتىلگەن توپ قوسىلدى. كيىك اتقان قاسكويلەردى جان-جاقتان تورۋىلداپ, ءتىپتى شەكارا ماڭىنداعى اۋداندارعا دا ارنايى قۇراما توپ باعىتتالدى. براكونەرلەر ۇزاي الماپتى, ولاردى وقيعا بولعان جەردەن 30 شاقىرىم جەردە «ۆاز 2121» ماركالى ماشينامەن قاشىپ بارا جاتقاندا قۇرىقتادى.
قوستاناي قالاسىندا تۇراتىن 35 جاستاعى ازامات ناۋىرزىم اۋدانىنىڭ رازدولنوە سەلوسىنداعى تۋىسىنىڭ ۇيىنە قوناققا بارادى دا, ەكەۋى دالانى كەزىپ, ەكى كيىكتى اتىپ الادى. ونىڭ بىرەۋىن ماشينانىڭ باگاجىنا سالىپ الادى. بىراق تاعى ءبىر شاقىرىم جۇرگەننەن كەيىن براكونەردىڭ بىرەۋى وزدەرىنىڭ كوزگە ءتۇسىپ قالعانىن سەزەدى دە, قورىققانىنان ماشيناداعى كيىكتى دە لاقتىرىپ, ولەڭدى اۋىلىنا قاراي زىتا جونەلەدى. ولاردىڭ ارام پيعىلى ىسكە اسپادى, پوليتسەيلەر قۇرىعىنان قاشىپ قۇتىلا المادى.
قازىر كيىك اتقان كۇدىكتىلەردىڭ ۇستىنەن قر قك 337-بابى بويىنشا سوتقا دەيىنگى تەرگەۋ امالدارى ءجۇرىپ جاتىر.
قوستاناي