قازاق كۇرەسىنەن الەم چەمپيونى, «قازاقستان بارىسى» ءتۋرنيرىنىڭ ءۇش دۇركىن جەڭىمپازى بەيبىت ىستىباەۆ تاراز قالاسىنان 200 ورىندىق بوبەكجاي اشتى. جۋىردا عانا تارازدىق تۇرعىندار جاقسى ىسكە كۋا بولىپ, بوبەكجايدىڭ اشىلۋ سالتاناتىن تاماشالادى. بالۋان سالىپ بەرگەن بوبەكجاي ەكى قاباتتى ەڭسەلى عيماراتتا ورنالاسقان. ەلباسىنىڭ «تۋعان جەرگە تۋىڭدى تىك!» اكتسياسى اياسىندا باستاۋ العان يگى باستاما بالالاردىڭ بولاشاعى ءۇشىن قولعا الىنىپ وتىر.
اتالعان بالاباقشانىڭ مەڭگەرۋشىسى, قازاقستان رەسپۋبليكاسى ءبىلىم بەرۋ ءىسىنىڭ ۇزدىگى ايشا نيازبەكوۆانىڭ ايتۋىنشا, مۇندا 1 جاستاعى بوبەكتەر توبىنان باستاپ, 6 جاستاعى مەكتەپالدى دايارلىق توبىنا دەيىنگى بالالار قابىلدانادى ەكەن. ال بۇگىنگى تاڭدا بوبەكجايدا 4 توپ بويىنشا 50-گە جۋىق بالا قابىلدانىپ, جۇمىس باستالىپ كەتىپتى. سونىمەن قاتار بوبەكجايدا كەلەشەكتە 8 توپ جاساقتالىپ, 35 ادام جۇمىسپەن قامتىلادى دەپ جوسپارلانسا, قازىرگى كەزدە مۇندا 15 ادام ەڭبەك ەتۋدە. بالاباقشاداعى ءاربىر توپقا «ەركەتاي», «جۇلدىز», «ايگولەك» دەگەن قازاقى اتاۋلار بەرىلگەن.
بوبەكجايدىڭ اسحانا, ءماجىلىس زالى, ۇيىرمە زالدارى بار. ءبارى دە زامان تالابىنا ساي سالىنعان. سونىمەن قاتار ىدىس-اياق, توسەك-ورىن سياقتى قاجەتتىلىكتىڭ دە ءبارى قامتىلعان. بالالار بەس مەزگىل ىستىق تاماقپەن قامتاماسىز ەتىلەدى. ەندى بارلىق تالاپقا ساي اشىلعان بوبەكجايدا الداعى ۋاقىتتا اعىلشىن ءتىلى, حورەوگرافيا, كۇرەس, تاەكۆوندو جانە گيمناستيكا ۇيىرمەلەرىن اشۋ جوسپاردا بار ەكەن. بالالارعا ومىرگە بەيىمدەۋ ساباعى دا ۇيىمداستىرىلۋدا.
جامبىل وبلىسى