قازاقستاندىق سپورتشى ترياتلوننان ازيا كۋبوگىن جەڭىپ الدى

الماتىنىڭ سايران كولىنىڭ جاعاسىنداعى سايىستىڭ ەرەكشەلىگى سول, بۇل دودادا سپورتشىلار تەك جۇلدەلى ورىندار ءۇشىن عانا ەمەس, توكيوداعى وليمپيادا ويىندارىنا قاتىسۋعا مۇمكىندىك بەرەتىن رەيتينگتىك ۇپايلار ءۇشىن باق سىناستى.

سايىسقا ءبىرىنشى بولىپ نازىك جاندىلار شىقتى. باستاپقىدا +26°س اۋا تەمپەراتۋراسى مەن سۋ تەمپەراتۋراسى +21°س كورسەتىپ جارىستىڭ قولايلى وتۋىنە جول اشقانداي كورىنسە, بار جوعى ءبىر ساعاتتىڭ ىشىندە سايراننىڭ جاعالاۋىن اپتاپ ىستىق بۋىپ, اۋا تەمپەراتۋراسى 35 گرادۋسكە دەيىن كوتەرىلىپ كەتتى. بۇل كەيبىر سپورتشى قىزداردىڭ جارىستاعى ناتيجەلەرىنە اسەرىن تيگىزدى – ىستىققا شىداماي كورەيالىق ءبىر سپورتشى جارىستان شىعىپ قالسا, وڭتۇستىك افريكالىق سپورتشى مارەدەن كەيىن ءوزىن ناشار سەزىندى.

دودا باستالماستان بۇرىن كورەيالىق يۋن چۋن چان (ازيالىق رەيتينگتە 8-ءشى ورىن), قازاقستاندىق ارينا شۋلگينا (11-ورىن) جانە جاپوندىق مايكو نيشي (16-ورىن) جۇلدەلى ورىنداردان ۇمىتكەر رەتىندە تانىلعان بولاتىن. دەگەنمەن, ترياتلوندا نەبىر توسىنسىيلار بولىپ تۇرادى. قىسقا «سپرينتەرلىك» (750 مەتر ءجۇزۋ, 20 شاقىرىم ۆەلوكەزەڭ, 5 شاقىرىم جۇگىرۋ) قاشىقتىقتىڭ كوشىن ەشكىمنىڭ نازارىنا ىلىنە قويماعان, قۇرلىقتىق رەيتينگتە بار جوعى 80-ورىندا تۇرعان نەمىس سپورتشىسى لينا ۆولكەر باستاپ كەتتى.

قىسقاشا ايتقاندا, جانكۇيەرلەر ۇلكەن سپورتتىق سەنساتسيا كۇتتى. ايتسە دە, ۆەلوجارىستان كەيىن ۇلتتىق قۇراما مۇشەسى ارينا شۋلگينا تىزگىندى قولعا الدى. جۇگىرۋ كەزەڭىندە بارلىق قارسىلاستارىنىڭ الدىن وراپ, 1 ساعات 3 مينۋت 43 سەكۋند ناتيجەسىمەن جەڭىمپاز اتاندى. ەكىنشى ورىندا – كورەيلىك يە دجين پارك. ول 1 ساعات 3 مينۋت جانە 57 سەكۋند ناتيجە كورسەتتى. ءۇشىنشى ورىندى پاركتىڭ جەرلەسى گيري كيم 1 ساعات 4 مينۋت 8 سەكۋند ناتيجەسىمەن تۇيىقتادى.

– ءجۇزۋ كەزەڭىندە پوزيتسيامدى دۇرىس تاڭدامادىم, – دەيدى مارەدەن كەيىن ارينا شۋلگينا, – ترانزيتتىك زونادا قاتەلىكتەر جىبەرىپ الدىم. بىراق ارتىنان ۆەلوجارىس كەزىندە دۇرىستالىپ, قارسىلاستارىما جەتىپ الدىم, ءارى قاراي بارلىعى ويداعىداي اياقتالدى. ونىڭ ۇستىنە مەنىڭ ەڭ مىقتى قىرىم جۇگىرۋ ەكەندىگىنە قاراماستان, جۇگىرۋ كەزەڭى وتە اۋىر بولدى. جۇگىرۋ تراسساسى وتە كۇردەلى – بۇرىلىستار بيىك ءارى كۇن اپتاپ ىستىق بولدى!

ەرلەر اراسىندا سپورت ساراپشىلارى الەمنىڭ ۇزدىك 100 سپورتشىلارىنىڭ قاتارىنا كىرەتىن گونكگونتان كەلگەن وسكار كوگگينس (قۇرلىقتىق رەيتينگتە 3-ورىن), قازاقستاندىق ايان بەيسەنباەۆ (4-ورىن), جاپوندىق رەن ساتو (6-ورىن), فەليكس ديۋشامپ (25-ورىن) جانە سەرب وگنەن ستويانوۆيچ (49-ورىن) سىندى سپورتشىلاردى سايىس فاۆوريتتەرىنىڭ قاتارىنا قوستى.

ناتيجەسىندە ITU اتىنان ونەر كورسەتىپ جۇرگەن فەليكس ديۋشامپ 55 مينۋت 51 سەكۋند ۋاقىتىمەن كۇردەلى سايىستا قارسىلاستارىنىڭ الدىن وراپ, التىن جۇلدەگە يە بولدى. ەكىنشى ورىندى 56 مينۋت 9 سەكۋند ۋاقىتىمەن وسكار كوگگينس السا, 56 مينۋت 20 سەكۋند ناتيجەسىمەن وگنەن ستويانوۆيچ ءۇشىنشى ورىننان كورىندى. ايان بەيسەنباەۆ بولسا 56 مينۋت 35 سەكۋند ۋاقىت كورسەتتى.

الماتىدا وتكەن ترياتلوننان ازيا كۋبوگىن قورىتىندىلاي كەلە, باس ASTC (قۇرامىنا 35 ەل كىرەتىن ازيالىق ترياتلون كونفەدەراتسياسى) تەحنيكالىق دەلەگاتى بيامبا تساگاانبااتار (مونعوليا) وڭتۇستىك استانامىزدا وتكىزىلگەن حالىقارالىق ءىس-شاراعا وتە جوعارى باعا بەردى. «قازاقستان ترياتلوننىڭ دامۋ ورتالىعىنا اينالدى, - دەيدى دەلەگات. قازاقستاندىق ترياتلون فەدەراتسياسىنىڭ پرەزيدەنتى كارىم ءماسىموۆتىڭ باستاماسىمەن ورتا-ازيالىق ترياتلون اسسوتسياتسياسىنىڭ (ساتا) قۇرىلۋى بۇعان دالەل بولا الادى. بۇگىنگى تاڭدا ۇيىم قۇرامىنا قازاقستان, وزبەكستان, قىرعىزستان, يران جانە اۋعانستان ەلدەرى كىرىپ وتىر.

وليمپيادا ويىندارىنا ليتسەنزيا الۋ جايىنا كەلەتىن بولساق, ترياتلوننان قازاقستان ۇلتتىق قۇراماسىنىڭ باس باپكەرى اندرەي گلۋششەنكو: «ارينا شۋلگينا ليتسەنزيا جەڭىپ الىپ وليمپيادادا ونەر كورسەتەتىنە 90 پايىزعا سەنىمدىمىن. ەرلەر اراسىندا بىزدە ايان بەيسەنباەۆتىڭ ۇلكەن مۇمكىندىگى بار. سونىمەن قاتار, جاپ-جاس دارىن قونىسباەۆ جۇگىرۋدەن بۇگىنگى تاڭدا ازيا قۇرلىعىنداعى ەڭ ۇزدىك بولىپ وتىر. بار جوعى 20-اق جاستا بولسا دا, جۇزۋدەن شەبەرلىك تانىتىپ كەلەدى. الداعى ۋاقىتتا ليتسەنزيا جەڭىپ الا الاتىن وتە ۇلكەن مۇمكىندىكتەرى بار. توكيو-2020 وليمپياداسىندا ترياتلوننان قازاقستاندا كەمىندە ەكى ليتسەنزيا بولادى دەپ ويلايمىن», دەيدى.

الماتى