ۇكىمەت تاراپىنان «قاراپايىم زاتتار ەكونوميكاسىن» دامىتۋعا كۇش سالىنىپ, ءتۇرلى مەملەكەتتىك قولداۋلار تەتىگى قاراستىرىلىپ جاتقانى بەلگىلى. «Altezza» برەندىنىڭ نەگىزىن قالاۋشى شاحيستا مۇحامەدجانوۆا وتاندىق كيىم وندىرىسىندە جەمىستى ەڭبەك ەتىپ كەلە جاتقان ارۋلاردىڭ ءبىرى.
تاراز قالاسىنىڭ تۇرعىنى شاحيستانىڭ نەگىزگى ماماندىعى قارجىگەر ەكەن. ەكىنشى العان جوعارى ءبىلىمى – زاڭگەرلىك. بىراق وقۋ بىتىرىسىمەن ەڭبەك جولىن قۇرىلىس سالاسىنان باستاعان, بۇگىندە وسى سالادان قول ۇزبەي, جۇمىسىن جالعاستىرىپ كەلەدى.
– ارينە, پوليەتيلەن قۇبىر شىعارۋ, بايلانىس جەلىلەرىنىڭ قۇرىلىسىن جۇرگىزۋ ايەل ادامدار ارالاسا قويمايتىن جۇمىس. سول سەبەپتى, مەن بىرنەشە جىل بۇرىن جەڭىل ونەركاسىپ سالاسىندا باق سىناپ كورەيىن دەگەن ويعا كەتتىم. بىرنەشە اي ويلانىپ, ءتۇرلى جوسپار قۇرىپ, اقىرى ءبىرجولا بەكىندىم. وسىلايشا, 2014 جىلدان باستاپ «Altezza» برەندىنىڭ تاريحى باستالدى, – دەيدى شاحيستا مۇحامەدجانوۆا.
ىسكەر قىز بۇل سالانىڭ قىر-سىرىن جەتىك بىلمەسە دە, باتىلدىق تانىتىپ, تىگىن بيزنەسىن اشۋعا شەشىم قابىلداعان. وندا دا جاي عانا كىشىگىرىم تسەح ەمەس, ۇلكەن ءوندىرىس ورنىن اشۋعا بەكىندى. عيماراتى, تىگىن ماشينالارى, جۇمىسشىلارى بار فابريكا بولسا دەپ ارمانداپ قانا قويماي, ارمانىن جۇزەگە اسىرۋعا كىرىستى. تۇركيادان قاجەتتى ماتا تۇرلەرى مەن فۋرنيتۋرالاردى جەتكىزدى. دجينس ماتەريالدان ءتۇرلى كيىم شىعارۋدى جوسپارلادى.
– العاشقى كەزدە بۇرىن بىلمەگەن بىرقاتار پروبلەمامەن بەتپە-بەت كەلدىم. بىرىنشىدەن, ءبىزدىڭ وڭىردە ماعان قاجەتتى ماماندار تاپشى ەكەن. كيىم ۇلگىسىن پىشەتىن تەحنولوگ تاپپاي قينالدىم. ەكىنشى پروبلەما نارىقتى مۇلدەم بىلمەۋىمنەن بولدى. تۇتىنۋشىنىڭ سۇرانىسىن, نە قالايتىنىن ەش بىلمەستەن, نارىقتى الدىن الا زەرتتەپ الماي تۇرىپ, بىردەن اشىلدىق. سونىڭ سالدارىنان العاشقى كەزدە بيزنەسكە سالعان ءبىراز اقشام كۇيىپ كەتتى. اقىرى تاجىريبە جيناقتاي كەلە, ايەلدەر كيىمىن تىگەتىن بولىپ شەشتىم, – دەيدى كاسىپكەر قىز.
ديزاينەردىڭ ايتۋىنشا, ەڭ ۇلكەن قيىندىق – وتاندىق شيكىزاتتىڭ جوقتىعى. قاجەت شيكىزاتتىڭ ءبارى, ماتا, ءجىپ سياقتى كەرەك-جاراق اتاۋلى قىتايدان, وزبەكستاننان, تۇركيادان نەمەسە قىرعىزستاننان جەتكىزىلەدى ەكەن.
جاقىندا «اتامەكەن» ۇلتتىق كاسىپكەرلەر پالاتاسى جاس كاسىپكەرلەر اراسىندا «ALTYN OIMAQ» ۇلتتىق بايقاۋىن جاريالاعان بولاتىن. وسى بايقاۋعا قاتىسىپ جاتقان شاحيستا:
– مەن ءۇشىن بايقاۋدىڭ بيزنەس-يدەياسى قىزىقتى بولدى. سول ءۇشىن قاتىسىپ جاتىرمىن. ءوزىم بۇل سالاعا ديزاينەر ەسەبىندە ەمەس, ءوندىرىسشى رەتىندە كەلدىم عوي. بايقاۋداعى وسى يدەيا – كيىم ديزاينەرى ەمەس, قاراپايىم كوپشىلىككە, ياعني, ورتا تاپقا ارنالعان كيىم شىعاراتىن كاسىپكەر رەتىندە تارتقانى ۇنادى. وسى جولدا كاسىبىمدى دامىتسام دەيمىن, – دەيدى شاحيستا.
جاس كاسىپكەردىڭ باستى قاعيداسى – ءومىردى بارىنشا جاۋاپكەرشىلىكپەن ءسۇرۋ.
– ءار ادام ءوز ومىرىنە ءوزى جاۋاپتى. نە ەكسەڭ, سونى وراسىڭ. الدىما قويعان ماقساتىم كوپ. سونىڭ ءبىرى – ءونىمدى رەسپۋبليكانىڭ بارلىق ايماقتارىنا تاراتۋ, – دەيدى ول.
تاياۋدا «اتامەكەن» پالاتاسىنىڭ ىسكەر ايەلدەر كەڭەسى مۇشەلىگىندەگى كاسىپكەر قىز-كەلىنشەكتەر اراسىندا ۇيىمداستىرىلعان «جىل جاڭالىعى» قوسىمشا بايقاۋىنىڭ جەڭىمپازدارى جاريا ەتىلگەن بولاتىن. بۇل بايقاۋدا جەڭىمپازداردىڭ قاتارىندا شاحيستا مۇحامەدجانوۆا دا ماراپاتتالدى.