«ۇكىمەتتىڭ شەشىمىمەن ەڭبەك جانە حالىقتى الەۋمەتتىك قورعاۋ مينيسترلىگى ەلدەگى جۇمىسسىزدىقتى جىل سايىن 0,1 پايىزعا ازايتىپ وتىرۋى ءتيىس. بۇل ءۇشىن رەسپۋبليكا بويىنشا جىل سايىن كەمىندە جاڭادان 370 مىڭ جۇمىس ورنى اشىلۋى كەرەك. بيىلعى جارتىجىلدىقتا 186 مىڭ جاڭا جۇمىس ورنى اشىلعان. بۇل بىلتىرعى العاشقى التى ايمەن سالىستىرعاندا 7 پايىزعا ارتىق», دەدى ەڭبەك جانە حالىقتى الەۋمەتتىك قورعاۋ ءبىرىنشى ۆيتسە-ءمينيسترى ەرجان جىلقىباەۆ. ءمينيستردىڭ ءبىرىنشى ورىنباسارىنىڭ ايتۋىنشا, جىل باسىنان بەرى ساۋدا سالاسىندا 24 مىڭ, قۇرىلىستا 18 مىڭ جانە اۋىل شارۋاشىلىعىندا 17 مىڭ جاڭا جۇمىس ورنى اشىلدى. بۇل – جاڭا جۇمىس ورىندارى ەڭ كوپ اشىلىپ جاتقان سالالار. وڭىرلەرگە توقتالار بولساق, الماتى قالاسى مەن ماڭعىستاۋ جانە الماتى وبلىستارىندا جاڭادان جۇمىس ورىندارى كوپتەپ اشىلىپ جاتىر.
مينيسترلىكتىڭ مالىمەتىنشە, جۇمىسپەن قامتۋ جانە حالىقتى جاپپاي كاسىپكەرلىككە تارتۋدىڭ ەڭ ءتيىمدى قۇرالدارىنىڭ ءبىرى – «ەڭبەك» مەملەكەتتىك باعدارلاماسى. «باعدارلاما اشىلعالى بەرى بيۋدجەتتەن 194 ملرد تەڭگە ءبولىنىپ, بۇل ءوز كەزەگىندە 1 ملن 200 مىڭ ادامنىڭ «ەكى قولعا ءبىر كۇرەك» تابۋىنا مۇمكىندىك بەرگەن. ال بيىل وسى باعدارلاماعا 124 ملرد تەڭگە ءبولىنىپ, 700 مىڭ ازاماتقا جاڭا جۇمىس ورىندارى اشىلماق. بىلتىر باعدارلاما بويىنشا 600 مىڭ ادام جۇمىسقا ورنالاسقان ەدى», دەدى ول.
ە.جىلقىباەۆتىڭ ايتۋىنشا, باعدارلاما نەگىزىنەن ءتورت باعىتتا جۇمىس ىستەيدى. ء«بىرىنشى باعىت – قىسقامەرزىمدى كاسىپتىك وقىتۋ. 1 شىلدەدەگى جاعداي بويىنشا 22 مىڭ ازامات وقىتىلىپ, بۇگىندە ونىڭ 3 مىڭى وقۋىن اياقتاپ, جۇمىسقا ورنالاستى», دەدى ول.
«1 قىركۇيەكتەن باستاپ تەگىن تەحنيكالىق جانە كاسىپتىك وقۋعا 23 مىڭ ازامات جىبەرىلەدى. ولاردىڭ ستيپەندياسى 30 پايىزعا كوبەيىپ, 21 800 تەڭگە بولدى. اتالعان باعدارلاما بويىنشا وقىتۋشىلار مەن ءبىلىم بەرۋ مەكەمەلەرى تومەندەگى تالاپتارعا ساي بولۋى ءتيىس: وقۋدى اياقتاۋشىلاردىڭ كەمىندە 60 پايىزى جۇمىسقا ورنالاسۋى; قىسقامەرزىمدى وقىتۋ تاجىريبەسى 1 جىلدان كەم بولماۋى; وندىرىستەگى تاجىريبەسى 1 جىلدان كەم بولماۋى جانە وقىتۋ مەكەمەلەرىنىڭ تەحنيكالىق بازاسى قازىرگى زامانعا ساي بولۋى قاجەت», دەدى مينيسترلىك وكىلى. ءبىرىنشى ۆيتسە-ءمينيستردىڭ ايتۋىنشا, وسىنداي تالاپتارعا ساي كەلەتىن قازىر 615 مىڭ ءبىلىم بەرۋ مەكەمەلەرى بار.
«ەكىنشى باعىت – جاپپاي كاسىپكەرلىكتى دامىتۋ. بۇل باعىت بويىنشا 84 ملرد تەڭگە قاراجات قارالىپ وتىر. وعان 19 مىڭ ازامات ىلىگەدى». باعدارلاما بويىنشا 4 مىڭداي شاعىن نەسيە بەرىلگەن. ونى العانداردىڭ 3200-ءى اۋىل ازاماتتارى بولسا, قالعان 800-ءى – قالا تۇرعىندارى. سونىڭ ىشىندە ستارتاپ جوبالارعا 2100 شاعىن نەسيە بەرىلسە, جەكە ءىستى كەڭەيتۋگە 1402 شاعىن نەسيە بەرىلگەن. شاعىن نەسيە الۋشىلاردىڭ اراسىندا ايەلدەردىڭ ۇلەسى ارتىپ كەلە جاتىر. كورسەتكىش بىلتىرعىدان 33 پايىزعا ارتىپ, 2000 مىڭعا جەتتى. بيىل شاعىن نەسيە العان كاسىپكەرلەردىڭ ءوزى 5 مىڭداي جاڭا جۇمىس ورنىن اشتى», دەدى ءبىرىنشى ۆيتسە-مينيستر.
ءۇشىنشى باعىت – جۇمىس كۇشى ارتىق وڭىرلەردەگى ازاماتتاردى جۇمىسشى تاپشى وڭىرلەرگە كوشىرۋ. بۇل باعىت بويىنشا 4 مىڭ ازامات وڭتۇستىكتەن سولتۇستىككە كوشتى. «جىل سوڭىنا دەيىن ءبىز 10 مىڭ ازاماتتى كوشىرۋىمىز كەرەك», دەدى ول. ە.جىلقىباەۆتىڭ ايتۋىنشا, ۇكىمەت قونىس اۋدارۋشىلاردىڭ وتباسىنداعى ءاربىر ازاماتقا 88 مىڭ تەڭگەدەن سۋبسيديا بولەدى. سونىمەن قاتار ءبىر جىل بويى ءۇي جالداۋعا جانە كوممۋنالدى قىزمەت تولەمدەرى وتەلەدى.
سونىمەن قاتار مينيسترلىك ەلدە سۇرانىسقا يە ماماندىقتاردى كوپتەپ دايارلاۋ ماسەلەسىن قوزعادى. ءبىرىنشى ۆيتسە-ءمينيستردىڭ ايتۋىنشا, قازىرگى تاڭدا ەلدە 3D مودەلدەۋ ينجەنەرى, IT ماماندارى, ساۋلەتشى, ديزاينەر مەن تۋريزم سالاسىنىڭ ماماندارى تاپشى ەكەن. بۇدان بولەك, ناقتى عىلىمداردىڭ وقىتۋشى-پەداگوگتارى مەن ەلەكتردانەكەرلەۋشىلەر مەن گازدانەكەرلەۋشىلەرگە سۇرانىس جوعارى ەكەنى ايتىلدى.