جۋىردا وسى ورتالىقتىڭ بەلسەندى مۇشەلەرىنىڭ ءبىرى اسكەربەك بوگۋمباەۆ استاۋ شىعاراتىن شەبەرحانا اشتى. تۇپكى ويى – ۇلتتىق قولونەر كاسىبىن دامىتۋ. باستاپقىدا بەيمالىم ءىستىڭ ءمان-جايىن تەرەڭ بىلمەگەندىكتەن ءارى قاجەتتى قارجىنىڭ تاپشىلىعىنان 3-4 جىلعا كىدىرىپ قالعانعا ۇقسايدى. بىراق «يگىلىكتىڭ ەرتە-كەشى جوق» دەمەكشى, اقىرى تاۋەكەل ەتىپ, ورىندالماستاي كورىنگەن ماقساتىنا جەتكەنىنە قۋانۋلى.
بىلتىر دۇنيەجۇزى قازاقتارىنىڭ قاۋىمداستىعى مەن «وتانداستار» قورى بىرلەسىپ, ومبى قالاسىندا وتكىزگەن كىشى قۇرىلتايدا اسكەربەك باۋىرىمىز «جۋسان» حالىقارالىق كاسىپكەرلەر قاۋىمداستىعىنىڭ توراعاسى توعايباي رىسبەكپەن تانىسادى. «ىزدەگەنگە – سۇراعان» دەگەن. توعايبايدىڭ اعاشتان استاۋ, توستاعان, تاعى باسقا ۇلتتىق ىدىستار مەن بۇيىمدار جاسايتىنىن ەستىپ, ءوزى ءۇشىن تىلسىم قۇپيا سانالاتىن سالانىڭ قىر-سىرىن مەڭگەرۋگە ۇمتىلادى. ۇستازىنان ءدارىس الىپ, ءوز بەتىنشە دە ىزدەنىپ, قولىمنان كەلەدى-اۋ دەگەن دەڭگەيگە جەتكەننەن كەيىن كاسىبىن باستاپ كەتەدى. بىرنەشە ادامدى جۇمىسقا الىپ, ءوندىرىستى دامىتۋعا 6 مىڭ دوللار كولەمىندە قاراجات سالادى. قازاقستاننان بىرنەشە ستانوك الدىرتىپ, ماتەريالدىق-تەحنيكالىق جاعىنان جابدىقتالىپ بولعان سوڭ اسىعا كۇتكەن العاشقى استاۋلارىن دا شىعارادى, ىدىس لەزدە ساتىلىپ كەتەدى. قازىر «تۇران» دەپ اتالاتىن شەبەرحانا تۇراقتى تۇردە جۇمىس ىستەپ تۇر. دايىن ىدىستاردى وڭدەپ, سىرلاپ, اشەكەيلەۋمەن كومەكشىلەرى بيسەمباي مىڭجاسوۆ پەن ايگەرىم دۇنگەنەنوۆا اينالىسادى. شەبەردىڭ ايتۋىنشا, تەك ومبى ەمەس, رەسەي نارىعىنا باعىتتالعان تسەحتىڭ ونىمدەرى ۇلكەن سۇرانىسقا يە. كەلەشەكتە ءونىمنىڭ تۇرلەرىن كوبەيتپەكشى.
تالىمگەر توعايباي رىسبەك شاكىرتىنىڭ العىرلىعىنا, ەڭبەكقورلىعىنا ريزا. ال اسكەربەكتىڭ شەبەرحانا اشۋعا جاردەمدەسكەن «جۋسان» حالىقارالىق كاسىپكەرلەر قاۋىمداستىعى مەن «وتانداستار» قورىنا العىسى شەكسىز.
روزا شاكەنوۆا
سولتۇستىك قازاقستان وبلىسى