جوبالاردىڭ ءبىرى - «جاڭا قالا» جشس-ءنىڭ 600 باسقا ارنالعان ساۋ كەشەنى بار ءسۇت فەرماسى قۇرىلىسىن جۇرگىزۋدە. ينۆەستيتسيا كولەمى 1,100 ميلليون تەڭگەنى قۇرايدى.
سەرىكتەستىك «اگرارلىق نەسيە كورپوراتسياسى» اق-دا «ىرىس» باعدارلاماسى بويىنشا نەسيە الۋعا شارت جاساسقان. ماۋسىم ايىندا تولىقتاي قارجىلاندىرىلىپ, جىل اياعىنا قاراي ىسكە قوسىلادى دەپ جوسپارلانعان.
بىراق, اۋدانعا بارعان وبلىس اكىمى بولات باقاۋوۆ «جوباعا قاراجات ماۋسىم ايىندا بەرىلەدى دەيسىزدەر. تەك شىلدەدە جۇمىس باستالادى. الداعى ءۇش ايدا ءار اي سايىن 200 ميلليون تەڭگە يگەرىلۋى قاجەت ەكەن, سوندا, اياقتاۋعا قالاي ۇلگەرەسىزدەر؟» دەپ سۇرادى.
- چەحياعا ءىرى قارا مال الدىرۋعا تاپسىرىس بەردىڭىزدەر مە؟ مالدى اكەلگەننەن كەيىن دە اتقاراتىن جۇمىستار جەتەرلىك. ولاردى ىرىكتەپ, كارانتينگە قويۋ كەرەك. بۇل جوبانى بيىل جۇزەگە اسىرىپ, تاپسىراتىندارىڭىزعا كۇمانىم بار, - دەدى ب. باقاۋوۆ.
بيىل اۋداندا جۇزەگە اسىرىلاتىن تاعى ءبىر جوبا - «لۋگانسك» وندىرىستىك كووپەراتيۆىنىڭ 600 باسقا ارنالعان ءسۇت فەرماسى. بيىل تەك 300 باسقا ارنالعان العاشقى بولىگى قوسىلماق.
ينۆەستيتسيا كولەمى - 320 ميلليون تەڭگە. سونىمەن قاتار, كووپەراتيۆتە اسىل تۇقىمدى مال باسىن كوبەيتۋ جوسپارلانۋدا. قۇرىلىس جۇمىستارى ءساۋىر ايىندا باستالعان. الداعى قازان ايىندا پايدالانۋعا بەرىلەدى دەپ جوسپارلانۋدا.
كووپەراتيۆ باسشىسى پەتر كۋزمەنكو جوسپار ويداعىداي جۇرگىزىلسە, قالعان 300 باسقا ارنالعان ورىن دا جىل سوڭىنا دەيىن اياقتالادى دەدى.
ال, وبلىس اكىمى ەكى فەرماداعى جاعدايدى مۇلدەم سالىستىرۋعا كەلمەيتىنىن ايتتى. ويتكەنى, «جاڭا قالا» جشس-ندەگى ماسەلە بەلگىلى.
اۋداندا سۋارمالى جەرلەردى كەڭەيتۋ بويىنشا جوبالار ەنگىزىلۋدە. ماسەلەن, «انداس» شارۋا قوجالىعى قوسىمشا 420 گەكتار جەردى سۋارمالى القاپقا اينالدىرماق. جوبا سۋارمالى جەرلەردىڭ كولەمىن 1800 گەكتارعا دەيىن جەتكىزۋدى كوزدەيدى. ينۆەستيتسيا كولەمى 156 ميلليون تەڭگەنى قۇرايدى.
«قازاگروقارجى» اق ارقىلى ليزينگكە 6 «Valley» سۋارۋ ماشيناسى ساتىپ الىنعان. كەلەسى جىلى قالعان 610 گەكتار جەردى يگەرۋ جوسپارلانىپ وتىر.
ال شارۋا قوجالىعىنىڭ باسشىسى نەگىزگى قۇبىرلاردى ورناتۋ بويىنشا جۇمىستاردىڭ اياقتالماۋىنا بايلانىستى بارلىق جۇمىستى تەك كەلەسى جىلى اياقتاي الاتىنىن جەتكىزدى.
وبلىس اكىمى شارۋشىلىقتارعا جۇمىستى شيراتۋدى, سوزبەن ەمەس, ىسپەن العا ءجۇرۋدى تاپسىردى.
اۋدانعا رەسپۋبليكالىق جانە وبلىستىق بيۋدجەتتەردەن 2018 جىلى 2 ملرد. تەڭگە كولەمىندە, بيىل 2 ملرد. 800 ميلليون تەڭگە قاراجات بولىنگەن. الەۋمەتتىك-ەكونوميكالىق دامۋى بويىنشا اۋدان وبلىس وڭىرلەرى اراسىندا جەتىنشى ورىندا تۇر. اۋداندا جاڭا كاسىپ ورىندارىن اشقاندار دا جوق.
پاۆلودار وبلىسى,
پاۆلودار اۋدانى