مونعوليانىڭ بايان-ولگي ايماعىنا گاسترولدىك ساپارمەن بارعان قوستاناي وبلىستىق دراما تەاترى جولتايدىڭ ءالماش ۇلىنىڭ «مۇڭمەن الىسقان ادام» دراماسى بويىنشا قويىلعان سپەكتاكلدى تارتۋ ەتتى. وسى ءىس-شارا بارىسىندا جازۋشى-دراماتۋرگتىڭ تۋىندىسىنا ريزالىق بىلدىرگەن ايماق باسشىسى جولتاي ءالماش ۇلىنا بايان-ولگيدىڭ «قۇرمەتتى ازاماتى» اتاعىن بەردى.
جازۋشى بىزبەن اڭگىمەسىندە بايان-ولگي ايماعىندا بۇرىن-سوڭدى بولماعانىن, وندا تۇرىپ جاتقان قانداستارىمىزدىڭ ۇلتجاندىلىعى, ەلگە دەگەن سۇيىسپەنشىلىگى باياعىدان قىزىقتىراتىنىن ايتتى. «اتتەڭ, ساپاردىڭ ءساتى تۇسپەي قالدى. دەگەنمەن, ەڭبەگىمىزدى ەلەپ, «قۇرمەتتى ازامات» ماراپاتىن جاساپتى, العىسىمىز شەكسىز! وعان ىلايىقپىز با, جوق پا - ونى ءبىر اللا بىلەدى», دەيدى.
پەساعا تاعدىر تالكەگىمەن 20 عاسىردىڭ 30-جىلدارى شەتەلگە اكە-شەشەسىمەن بىرگە كەتىپ قالعان جاس اساننىڭ ارادا 70-80 جىل وتكەندە تۋعان ەلىن ساعىنىپ-اڭساۋى, قازاق توپىراعىنا قايتۋدى ارمان ەتۋى وزەك بولعان.
سىرتقى ىستەر مينيسترلىگى حالىقارالىق اقپارات كوميتەتىنىڭ توراعاسى رومان ۆاسيلەنكو كەزىندە استانادا جۋرناليستەرمەن كەزدەسكەن كەزدە بۇل قويىلىمدى الداعى ۋاقىتتا استاناداعى بارشا شەتەلدىك ەلشىلەردىڭ قاتىسۋىمەن ساحنالانعانىن قالايتىنىن, سونان كەيىن شەتەلدەرگە تانىستىرۋ مۇمكىندىگىن قاراستىراتىنىن ايتقان بولاتىن.
وسىعان دەيىن تاشكەنتتە ساحنالانىپ, ونداعى قانداستاردىڭ كوڭىلىنەن شىققان تۋىندى ەندى موڭعوليالىق قانداستاردى دا قاناتتاندىرىپ وتىر.