17 ناۋرىزدا “قازاقستان رەسپۋبليكاسىنىڭ پرەزيدەنتى ن.ءا.نازارباەۆتىڭ 2010 جىلعى 29 قاڭتارداعى جولداۋىنان جانە 2010 جىلعى 1 اقپانداعى № 922 جارلىعىمەن بەكىتىلگەن قازاقستان رەسپۋبليكاسىنىڭ 2020 جىلعا دەيىنگى ستراتەگيالىق دامۋ جوسپارىنان تۋىندايتىن اگەنتتىكتىڭ مىندەتتەرى تۋرالى” تاقىرىپتا جەر رەسۋرستارىن باسقارۋ اگەنتتىگىنىڭ كەڭەيتىلگەن القا وتىرىسى وتكىزىلدى.
القا وتىرىسىندا اگەنتتىكتىڭ توراعاسى ومىرزاق وزىبەكوۆ اتالعان تاقىرىپ اياسىندا بايانداما جاسادى. وندا ءو.وزىبەكوۆ جولداۋدان تۋىندايتىن اگەنتتىكتىڭ الدىنداعى مىندەتتەرگە ەرەكشە توقتالدى. سونىڭ ىشىندە سەنىمدى قۇقىقتىق ورتا قالىپتاستىرۋ بويىنشا اگەنتتىكتىڭ ورتالىق اپپاراتىنا جەر زاڭنامالارىن ودان ءارى جەتىلدىرۋ جۇمىستارىن جۇرگىزۋ جانە ءماجىلىس قاراۋىندا جاتقان “جەر كودەكسىنە ءوزگەرتۋلەر مەن تولىقتىرۋلار ەنگىزۋ تۋرالى” زاڭ جوباسىن تەزىرەك قابىلدانۋىنا ىقپال جاساۋ قاجەت.
اگەنتتىكتىڭ قازىنالىق كاسىپورىندارىنا گەودەزيا جانە كارتورگرافيا سالاسى بويىنشا ەل ەكونوميكاسىنا قاجەتتى جۇمىستاردى ساپالى ورىنداۋ, سونىمەن قاتار, ەلىمىزدىڭ كەدەندىك وداققا كىرۋىنە بايلانىستى, وڭتۇستىك شەكارالاردى دەماركاتسيالاۋ جۇمىستارىن مەيلىنشە تەزىرەك جۇرگىزۋ مىندەتتەرى جۇكتەلەدى.
جولداۋدا بەلگىلەنگەن اۋىل شارۋاشىلىعى سالاسىندا ەڭبەك ونىمدىلىگىن ارتتىرۋعا قاتىستى ماسەلەلەر بويىنشا وڭىرارالىق جەر ينسپەكتسيالارىنا, جەرگىلىكتى اتقارۋشى ورگاندارمەن بىرلەسە وتىرىپ, يەسىز جانە دە پايدالانباي جاتقان اۋىل شارۋاشىلىعى جەرلەرىن انىقتاۋ جانە دە زاڭدارعا سايكەس ولاردى ەسەپكە الۋ مەن ماجبۇرلەپ يەلىكتەن شىعارۋدى ىسكە اسىرۋ تاپسىرىلدى.
“ەگەمەن-اقپارات”.