سەرتتىڭ اقىنى سەرىكتى كورگەندە: «قارقارالى, سەن ماعان جولىقتىڭ, ولەڭى بولىپ قاسىم امانجولوۆتىڭ» دەگەن سىرباي ماۋلەنوۆتىڭ ولەڭ جولى ويىما ورالادى. قارقارالىنىڭ قاراعايلى ورمانى شۋلاعان, شايتانكولىنىڭ شاعالاسى دۋلاعان, قىزىلارايىنىڭ بارقىن كەشى اقىننىڭ جىرىن بۋلاعان وسى ولكەنىڭ ولەڭدەرتتى پەرزەنتى سەرىك اقسۇڭقار ۇلىنىڭ پوەزياسى تۋرالى از-كەم ءسوز ۇزاتۋدىڭ رەتى كەلگەندە, تاعى ءبىر جايت ەسىمە ءتۇسىپ وتىر. بۇدان ون جىل بۇرىن, جىر جۇيرىگى فاريزا وڭعارسىنقىزىنىڭ 70 جىلدىعىنىڭ قارساڭىندا, ناقتىراق ايتقاندا, اپام: «جەتپىسكە كەلەم بە, كەلمەيمىن بە, 69 جاسىمدى اتاپ وتەمىن» دەپ استانا ءتورىندە داستارقان جايعانى بار ەدى. سول كەشتى جۇرگىزۋدى ادەتىنشە اپام ماعان جۇكتەگەن.
كەلەتىن قوناقتاردىڭ وتىرۋ حاتتاماسىن رەتكە كەلتىرىپ, توي يەسىنىڭ ۇسىنىسى بويىنشا اقىنداردى ۇزىننان جايىلعان ءبىر ۇستەل باسىنا وتىرعىزۋدى شەشكەنبىز. اقىنداردىڭ الدى بولىپ سەرىك كەلدى. ولەڭنىڭ بۋى مەن مىنەزدىڭ دۋى قوسىلىپ, سەكەڭ اياقتى الشاڭ باسىپ, ارقايىن كىردى. الدىنان شىعىپ: «اقىندار مىنا ۇستەلگە وتىرادى, تورلەت» دەپ قول ۇسىنىپ ەدىم, «مەنى اقىن دەپ كىم ايتتى؟» دەپ شالقايا سويلەدى. مىنەزبەن مىنەز شارپىسسا, تويدىڭ ءتۇتىنى كەرى شالقىر دەگەن ويمەن جۋاستاۋ جاۋاپ بەردىم. «اقىن ەمەسپىن دەسەڭ, ءوزىڭ ءبىل, ءبىز اقىن دەپ ءجۇرمىز» دەپ جەتەلەپ, تورگە وزدىردىم. سەرىكتىڭ مىنەزدى اقىن ەكەنىن 80-جىلداردان بەرى جاقسى بىلەم عوي, ونىڭ قاراعاندىدان جولداعان «جيىرماسىنشى عاسىردىڭ جيىرما ءساتى» دەگەن پۋبليتسيستيكالىق پاتەتيكاسىن, سەمسەردەي سەرتتى, وزەكتەي ءورتتى جىرلارىن تالاي رەت «لەنينشىل جاس» گازەتىندە جاريالاپ, ءوزىمىز دە, وزگە دە اشىق تا ايدىندى, اقيقات تا ايبىندى تۋىندىلارىنا تالاي رەت قول سوققانبىز. ونى ايتىپ جاتۋعا جەر تار بولعاسىن, ءسوزدىڭ سالەمى ءساتى ءتۇسكەندە كەلەر دەپ اۋىز باققانبىز. ءساتى ەندى كەلدى.
«دۇنيەگە كەلەر ءالى تالاي قاسىم, ولار دا بۇل قاسىمدى ءبىر بايقاسىن» دەپ قارقارالىدان قىرانشا سامعاپ بارىپ, ورالدان ولەڭ ۇشىرعان قاسىم امانجولوۆتىڭ كەرزى ەتىگىنىڭ ۋاقىت جەلى وشىرمەس ىزىمەن كەلە جاتقان ءبىر اقىن, بىرەگەي اقىن وسى – سەرىك اقسۇڭقار ۇلى. «مەنى اقىن دەپ كىم ايتتى؟» دەپ شامدانسا دا, شالقىسا دا, شىندىقتىڭ شىمىلدىعىن اشىپ, ءبىر اۋىز ءسوزىن ۇزاتىپ وتىرعان ىنىسىنە ءىرىلىك تانىتپاس دەگەن ويدامىن. مەنىكى, «جاقسىنىڭ جاقسىلىعىن ايت, نۇرى تاسىسىن» دەگەن تامسىلگە قول قويۋ. جامان جاعىنان كەلىپ, جالىنا جارماسىپ, قۇتى قاشسىن دەگەن نيەتىم جوق. كوپتەن وقىرمانىمىن.
ادەتتە, ولەڭگە پىكىر ايتۋدىڭ ماشاقاتى دا, ماراپاتى دا جەتەرلىك. ماشاقاتى – ولەڭگە تۇسىنىك جاساۋ ابىرويلى قىزمەت ەمەس. ولەڭدى كوزبەن كور دە, ىشپەن ءبىل. دۇرىسى وسى. ماراپاتى زامانداس تۋرالى جاقسى پىكىرىڭدى دەر كەزىندە ايتۋدىڭ مارحاباتتى تىرلىك ەكەنى. وسى تۇرعىدان كەلگەندە, سەرىك اقسۇڭقار ۇلى قازىرگى قازاق پوەزياسىنىڭ ازاماتتىق ليريكاسىن, ازاماتتىق كرەدوسىن, ازاماتتىق ۇستانىمىن, ازاماتتىق تۇعىرىن بيىكتە ۇستاپ كەلە جاتقان ساناۋلى اقىنداردىڭ ءبىرى.
قازىر قوعام مەن ۋاقىت تۋرالى سىن تۇرعىسىنداعى سيپاتتاما ولەڭ جازۋ دەندەپ تۇرمىسقا ەندى. ءاسىرەسە بۇل تەندەنتسيا جاستار اراسىندا دەكلاراتسيالىق دۇرلىگۋگە ۇلاسىپ, جۇرەگىن ەمەس, بىلەگىن سىبانىپ, بىلگەنىن شىنداي, بىلمەگەنىن دىڭداي ەتىپ ولەڭگە ءتۇسىرۋ جاپپاي ناۋقانعا اينالدى. قازىر ولەڭ جازۋ, ونىڭ تەحنيكاسىن ۇيرەنۋ كومپيۋتەرلىك كەشەنگە ءتۇستى. ساياسات پەن پاراساتتىڭ ارا جىگىن ماكسيماليزم مۇنارى باسىپ, «انتيديۋرينگتىك اقيقات» اگونيالىق شامشىلدىققا ۇلاستى. «نەعۇرلىم تۇسىنىكسىز جازساق, سوعۇرلىم مىقتىمىز» دەگەن تۇسىنىك تورگە شىعىپ, سەرىكتىڭ سەرتكە تاققان جىرلارىنىڭ اسپانىن «البىرت اقىنداردىڭ» انارحيالىق بۇلتى باسقاندا, تالابى مەن تالعامىن تارىنىڭ قاۋىزىنا سيعىزعان تالانتتىڭ قاراسىن ايىرىپ كورسەتۋدىڭ قاجەتتىگى تۋادى. مۇمكىن, بۇل مەنىڭ دە قولىمنان كەلە قويماس, دەگەنمەن «ارەكەتتە بەرەكەت بار» دەگەن ءسوز بار عوي. سەرىككە سەرىك قوسپاي, ولەڭىنە ورە ۇسىنسام, مۇنىم ءبىر اۋىلدىڭ كوشەسىندە وكشەلەس كەلە جاتقان ورەنگە پەيىلىم-ءدۇر.
اتا پوەزيامىزدىڭ ارعى باستاۋلارىنا وي جۇگىرتسەك, جاۋىنگەر جىرلاردىڭ كوشى سىپىرادان باستالىپ, شالكيىزگە ۇلاسىپ, بۇقارعا بۇيداسىن ۇستاتىپ, ءمارت ماديگە دەيىن ۇلاسادى. الىستان جەتكەن سارىن سوتسرەاليزم تۇسىندا داقپىرت پەن داڭعىراعا ۇلاسقاندا كوكىرەگىندەگى كوك بۇلتىن شايقاپ توگىپ, شارتا جۇگىنگەن جاس تولقىننىڭ ىشىندەگى اقسۇڭقار بالاسىنىڭ جىرسۇڭقارى تالماي قاناتىن قاققانى دا ەستە. وتكەن عاسىردىڭ وزەكتى ماسەلەلەرى قازاقى پۋبليتسيستيكانىڭ جايماسىندا جاڭا تۇسكەن جاس كەلىندەي «يبا» ساقتاعان كەزدە ولەڭى وتكىنشى داۋىلداي بۇرقىراعان سەرىكتىڭ جىرلارىن «وپپوزيتسيانىڭ» قاتارىنا قوسۋعا ارەكەت جاساعان ساتتەر دە بولدى. حالىق جىرلارىنىڭ قازىنالى كەرۋەنىن جالعاعان ۇلان جىرشىلىقتى «ۇزان» دەپ اتايتىنىمىز سەكىلدى, اشىق جىر مەن جابىق جىردىڭ شەكاراسىنا شەگەن سالعان اقىننىڭ قولتاڭباسىن قۇرمەتتەيتىن جۇرتتىڭ قاراسى كوپ ەكەنى سوندىقتان. سول كوپتىڭ ىشىندە ءبىر قالام بۇگىن تاڭباسىن سالدى.
دارىسكەر دياگنوزبەن قاراساق, قازاق ولەڭىنىڭ ازاماتتىق كوزقاراسى شيرىققان قازىرگى كەزەڭدە سەرىكشە جازارماندار دا مولايدى. تاقىرىپتى تار كەزەڭگە يەك ارتقان ۋاقىت تۋىنداتىپ وتىر. قاي زاماندا دا ۇشپا جانر – ليريكا الدىڭعى شەپكە شىعادى. قازىرگى جاستاردىڭ قالام ۇستاي سالا پروبلەمالىق پولەميكاعا قۇلاش ۇراتىنى وسىدان بولسا كەرەك. ولار ءبىر جاعىنان سەرىكتىڭ مايدانىن كۇشەيتسە, ەكىنشى جاعىنان, ارعى كەزەڭنەن بەرى اتويلاپ الدا كەلە جاتقان اقىندى دۇرمەك اراسىنا كومىپ تە كەتەدى. باجايلاپ قاراساق, جوڭكىلە شاپقان جاۋىنگەر جاستىقتىڭ قالىڭ ورتاسىندا اعالىق جاستان ابىزدىق جاسقا وتۋگە وكشە كوتەرگەن سەرىكتىڭ داۋسى ءارى بايسالدى, ءارى تەگەۋرىندى, ءارى سالماقتى, ءارى سالتاناتتى. «ءبىر توبەنىڭ توزاڭىن ءبىر توبەگە قوسىپ», تەرلىگى تەرگە بوككەن سايىن قۇلاعىن قايشىلاپ ءتورت اياعىن تەڭ تاستاپ كەلە جاتقان شالقۇيرىقتىڭ شالقۋى مەن قالقۋى نازار اۋدارارلىق.
سەرىك, ماياكوۆسكي زامانىن ەسكە الا تامسىلدەسەك, – تريبۋن اقىن. بىراق ونىڭ تريبۋندىعى جۇيەلى بيلىكتىڭ جۇگىنە جارماسقان جاندايشاپ جىرشىلدىق ەمەس, ازاماتتىق ايبار مەن اقىندىق بايلام. اسىرەسە, سوڭعى ون-جيىرما جىلدىڭ بەدەرىندە ونىڭ قالمىنان تۋعان جىرلار ۋاقىتكەر مىنەزدىڭ ءبىتىمىن انىق تانىتىپ, پوەزيالىق پاراساتتىڭ بيىگىن كورسەتەدى. ونىڭ ادەبي ءۇردىستى باعالاۋداعى شامشىلدىعى مەن شىنشىلدىعى ادەبي ورتادا كوپكە كوزايىم بولىپ تۇراتىنى راس. جاستاردىڭ اقىندى قاۋمالاپ كەلىپ, ساۋمالاپ ساۋال تاستاۋىندا دا وسى مىنەز وزىنە شاقىرىپ تۇرادى.
قالامگەردىڭ الەۋمەتتىك جەلىلەردەگى بەلسەندىلىگى مەن اشىقتىعى, قوعامدى ەلەڭدەتكەن جايلار مەن ۋاقىتتى بەبەۋلەتكەن جاعداياتتار دا ونىڭ اقىندىق ايناسىندا شارپىسىپ, قايراتكەرلىك قۋاتىن بايقاتادى. تولەگەننىڭ: «اقىن بوپ ءومىر ءسۇرۋ وڭاي دەيمىسىڭ, قاراعىم» دەپ ايتۋىن سەرىك اقىن ولەڭ ءومىربايانىندا دالەلدەپ كەلە جاتىر. اسىرەسە, ونىڭ تاريحي تانىمعا, ءدىني سەنىمگە, انتيكالىق بايلامعا بايلانىستى تۋعان ىشكى ەنەرگەتيكاسى مەن سىرتقى ديناميكاسى وقشاۋ كورىنىپ تۇراتىن جىرلارى جان الەمىندە بۋىرقانعان بوياۋلاردى جازىپ كورسەتەدى.
اقىننىڭ ادەبي-تاريحي ىزدەنىستەرى اقپاراتتىق اعىمنان گورى ادامدىق بولمىسقا كوبىرەك ۇمسىناتىن ولەڭدەرى – پاتەتيكالىق پلاتفورماسى قىزىق تا قۇندى. «اقىنعا كەرەك اقىل كوپ, اساۋلىق كەرەك ازداعان» دەپ قادىر مىرزا ءالى جازعانداي, اقىلدى بىلىمدىلىك دەپ قابىلداساق, بۇرىنعى اعالارىمىز ايتقان: «ولەڭگە وقىعان اقىندار كەلە باستادى» دەگەن ءسوزدىڭ ءبىر كەيىپكەرى سەرىك اقسۇڭقار ۇلى دەسەك, كوپ وقىرمان قارسى بولماس دەپ ويلايمىن. ويتكەنى ول ۇنەمى ىزدەنىستە. ونىڭ ولەڭدەرىن وقىعاندا وسىنى انىق سەزىنىپ وتىرامىن. ەنتسيكلوپەديالىق فاكتاجدىڭ ءيىرىمىنە ءۇڭىلۋدى ىزدەنۋدىڭ ءبىر جولى دەپ قابىلدايتىن سەرىكتىڭ پروزالىق پايىمدى پوەتيكالىق شەندەستىرۋگە قۇمارلىعى ونىڭ شىعارماشىلىق الەۋەتىنە ءار دە بەرەدى, ءنار دە بەرەدى. ونىڭ ىزدەنىستەرى ىزاشارلىق ىرگەتاس رەتىندە پوەزيا حرامىنىڭ ۇستىنىنا ۇلاسادى. موزايكالىق مونولوگتارى ويمەن قالانادى.
ال ونىڭ ءدىني ۇستانىمىن بىلدىرەتىن جىرلارى تەولوگيالىق تالعامىنىڭ تىنىسىن تانىتىپ قانا قويماي, ونىڭ ادامي-يماني بولمىستى تانىتۋداعى جانە تانۋداعى ىزدەنىستەرىن كورسەتەدى. وسى تاقىرىپتى جازىپ كورگەن ارىپتەس رەتىندە ونىڭ وسى باعىتتاعى ىزدەنىستەرىنە ءجىتى نازار اۋداردىم. قۇراننىڭ تۇلا بويى تۇتاس اقجارما جىر ەكەنىن بىزدەن بۇرىنعىلار تالاي ايتقان. ونىڭ اسا نازىك تە اسا كۇردەلى ءيىرىم ىلىمدەرىن جەتكىزۋدە بارىنشا ساقتىقپەن, دايىندىقپەن بارعان اقىن ونىڭ تىلسىم قۋاتىن جوعارى كەرنەۋلى ەنەرگەتيكالىق كۇش دەپ تۇسىنەدى دە, وسى دەڭگەيدەن ءتۇسپەۋگە تىرىسادى. بۇل ىزدەنىسىن دە قۇپتاۋعا دايىنبىز. الدا وسى باعىتتاعى قۇشتارلىعىن جالعاستىرسا, تەولوگيالىق تاقىرىپتىڭ تۋىندىگەرلىك تابىسىنا قول سوعامىز.
ونىڭ ءدىني تاقىرىپتاعى جىرلارى, نەگىزىنەن, قاسيەتتى قۇراننىڭ سۇرەلەرىن وزىنشە پايىمداۋى نازار اۋدارالىق. قۇراننىڭ سۇرەلەرىن سىرەستىرە اۋدارعان مىسالدار بىزدە جەتكىلىكتى. ءتىپتى قۇراننىڭ اسا عاجايىپ ماعىناسىن قاراپايىم جۇرەككە جەتكىزۋدە بۇعان دەيىن قازاق تىلىنە اۋدارىلعان 5-6 نۇسقانىڭ قاي-قايسىسى دا ءتىلى جاڭا شىققان ءسابيدىڭ سوزدىك قورىنان تۋعانداي اسەر بەرەتىنى شىندىق. سەرىكتىڭ مازمۇنداۋىندا «ءبالاد» سۇرەسىنەن باستالىپ, «ناس» سۇرەسىمەن اياقتالار 15 جىر ادامنىڭ تانىم-تۇسىنىگىنە قاراپايىم دا اۋەندى بولمىسىمەن سىڭەدى. قۇراندى بيسسميلاحي-راحمانير-راحيم دەپ اشىپ, پەندەنىڭ ىقىلاسىن اۋداراتىن «ىقىلاس» سۇرەسىن اۋدارعان جىرىن وقىپ كورەلىك:
ۋا, مۇحاممەد!
ايت ولارعا:
اللا – دارا!
سەرىكسىز!
مۇڭ جوق وندا!
مۇقىم عالام مۇقتاج وعان ەرىكسىز!
ول تۋعان جوق!
ءھام بىرەۋدەن تۋاتۇعىن سەن ەمەس!
ادامزاتتا,
عالامزاتتا وعان ەشكىم تەڭ ەمەس! تۇسىنىكتى مە؟ ارينە, ءسوز جوق, ءتۇسىنىكتى, ۇعىنىقتى. ارينە, قۇراندى, ونىڭ قاسيەتتى 114 سۇرەسىن پوەتيكالىق تۇرعىدان جەتكىزۋگە ۇمتىلعان اقىندار قازاق تاريحىندا بولعان, ءالى دە بار, جالعاستى جاقسى تىرلىك. بۇعان اقىننىڭ ىشكى-سىرتقى دايىندىعى عانا ەمەس, ساجدەگە باس قويىپ, اللاعا بارىنشا جاقىن بارعانداعى جان مەن ءتاننىڭ ءوزارا ۇيلەسىمى مەن ساناداعى ساۋلەنىڭ پەيىل پريزماسىندا شاعىلىسۋى دا اسا قاجەت. وسى تۇرعىدان كەلگەندە, بۇل تاقىرىپقا قىزىعا قالام ۇمسىنىپ كورگەن ارىپتەس رەتىندە سەرىكتىڭ رۋحاني تابىسىنا قوشەمەت بىلدىرەمىن.
اقىننىڭ «ۇزان» اتتى جاڭا جىر جيناعى قازىرگى قازاق جىرىنىڭ وركەشتى تۋىندىسى دەپ باعالانۋعا ابدەن لايىقتى. بۇل جيناقتاعى اۋدارما نەمەسە مازمۇنداۋ يىرىمىندەگى ولەڭدەردى اقىننىڭ ءتول تۋىندىسىنداي قابىلداۋعا تولىق بولادى. ورىس اقىندارىنىڭ جىرلارىن اۋدارۋداعى ونىڭ ءستيلى ويدى ەركىن سامعاتۋدان انىق بايقالسا, وزگە ءتىلدىڭ وزەگىندەگى وبرازدى جەتكىزۋدەگى قازاقى قۇلاش بايتاق دالانىڭ ەركىن سامالىنداي بولىپ جانىڭدى جەلپيدى. ال «قابىرىڭە قويام بەس شوق قارا گۇل» دەپ اتالاتىن جىر دەستەسى ءوزىنىڭ تۇتاستىق تۇعىرىمەن, ايتار ويىمەن, استىن سىزىپ كورسەتەر سىلتەمەسىمەن وقىرمان نازارىن ەرەكشە باۋرايدى دەپ ويلايمىن. قازاق پوەزياسىنىڭ بەس ءداۋىرىن قامتىعان, ناقتىراق ايتقاندا, قامتۋعا تىرىسقان, دەستە عىلىمي پايىمنان گورى تاريحي سانانى تۇگەندەۋدەگى جانكەشتى جورىق دەپ قابىلدانۋعا لايىقتى.
دايەكتەي ايتساق, شاكارىمگە ارناۋىندا: «ازا تۇنعان الابىم, تۇماندانىپ ساناسى, قاسقىرى ءولىپ دالانىڭ, قالدى – ءيتتىڭ بالاسى» دەپ جان قىجىلىن, قوعام عۇمىرىن بىلدىرسە, ماعجانعا باعىشتاعان ولەڭىندە: «قوش! ءومىرىم – ءوڭىم ەمەس, ءتۇس, مۇلدە! رومانوۆتان كەتىپ, تيگەن كۇش كىمگە؟ ءبىرجان سالعا قامشى الا جۇگىرگەن, قىزىل مۋندير – پوشتابايدىڭ ۇستىندە» دەپ اياقتالار رۋحشىل رەزيۋمە زۇلمات ءداۋىردىڭ قاندى تاڭباسىن قايىرا ەسكە سالىپ, ابايشىل استار كورسەتەدى. جاسىن جىردىڭ سۇڭقارى جۇبان اقىنعا ارناعان ولەڭىندەگى: «تىرشىلىك نە؟ و, تىرشىلىك – ءتۇس, بىزگە, قاۋىشپاسپىز قايتا بارىپ قىس, كۇزگە, مىيىعىنان ك ۇلىپ كىمدەر ءجۇر ەكەن, ءبىر قازاقتى ءبولىپ تاستاپ ءۇش جۇزگە» دەگەن جولداردى وسى جىردىڭ ارقاۋى دەسەك بولار. وسى ولەڭدەگى ءورىستى پىكىردى اسىرەسە, اقىندار ەستە ۇستاسا ەكەن دەپ ارماندايمىن.
جەتپىسىنشى جىلداردىڭ باسىندا, الماتىدا, قازىرگى ابىلاي حان داڭعىلى مەن بوگەنباي كوشەلەرىنىڭ قيىلىسىنداعى قاق ورتاسىندا ۇستىندە ەتەگى بەلبەۋىنەن شىعىپ كەتكەن كوك كويلەگى بار, اقشىل شالبارلى ءبىر كىسى قولىن سەرمەپ, ساڭقىلداپ سويلەپ تۇردى. تىڭداي قالدىق. «اتاڭا نالەت, الماتى تاكسيلەرى, قازاقتىڭ ۇلى اقىنىنا بىردە-بىرەۋى توقتامايدى» دەپ بوقتاپ تۇر ەكەن. قىزۋ ەكەنى بايقالىپ تۇر. ماشينالار قاشا بۇرىلىپ كەتىپ جاتىر. «كىم؟» دەپ سۇراپ جاتىرمىز جاپىرلاپ ىلعي ستۋدەنتتەر. ءبىر جىگىت اعاسى: «بۇل اتاقتى اقىن تولەۋجان ىسمايىلوۆ» دەپ جانىمىزدان وتە بەردى. «كوزىمنەن جاڭبىر جاۋعانىن, كوردىڭ بە, تۋعان تاۋلارىم, باۋىرىڭا جەتىپ, لاۋلادىم, قىزارىپ كۇندەي باتقالى, وزىڭە كەلىپ جاتقالى» دەپ جاڭعىرتىپ جىر وقىعان تولەۋجان اقىننىڭ بولمىسىن تانىتۋداعى سەرىكتىڭ جىرى وسى ءبىر ءساتتى كوز الدىما قايىرا الىپ كەلدى. قيلى تاعدىردىڭ قىسپاعىندا قالىپ, قازاعا ۇشىراعان اقىننىڭ لاۋلاعان جىر-كەرۋەنى قازاق ولەڭىنىڭ كوشىندە ءالى جەلىپ كەلەدى. سەرىك وسى ويدى جىر تىلىنە قاپىسىز تۇسىرگەن ەكەن. قازاق پوەزياسىنىڭ بەس ءداۋىرى دەپ اتاعان دەستەنىڭ سوڭىنداعى كەڭشىلىك مىرزابەكوۆ تۋرالى جىرىن وقىعاندا كەڭكەڭنىڭ: «قاراعىم, ءبىزدىڭ باستا دا, قارلىعاش داۋرەن كوپ تۇرماس, قاناتسىز قالساق ماسقارا, قاناتى بارلار جاقتىرماس» دەگەن عاجايىپ جىرى جادىما سان رەت ورالىپ, سەرىكتىڭ ادەبي ديسسەرتاتسياسىنا ارىپتەس تىلەكشى بولىپ شىعا كەلدىم.
بۇل ماقالادا, ءبىر ماقالادا, سەرىكتىڭ جىر الەمىن تۇتاس ايتىپ, تولعاپ شىعۋ قيىن بولار. وزىنە ءسوز بەرەيىن:
ءومىر سۇرەم ولەڭسىز-اق,
وزگە كاسىپ باستاپ ءبىر.
امەريكا – گومەرسىز-اق,
ابايسىز-اق اسقاق تۇر...
ءومىر ءسۇرىپ ولەڭسىز-اق,
بولام, مەيلى, باسپاق ءبىر.
قازاق جىرى نوبەلسىز-اق,
اقسۇڭقارسىز دا اسقاق تۇر؟ وسى سوزگە سەنۋگە بولا ما, قادىرلى ولەڭسۇيەر قاۋىم. سىزدەردى بىلمەيمىن, مەن سەنبەيمىن. ءبىز بىلەتىن سەرىك اقسۇڭقار ۇلى بولسا, ول ولەڭسىز ءومىر سۇرە المايدى. ۇلىق جىردىڭ ۇزانى, استارلى ويدىڭ الشاڭى, تەگەۋرىندى جىردىڭ تۋماسى شامىرقانعان ءبىر ساتىندە وسىلاي جازعان بولار. مەن بىلسەم, ول قازىر قاناتىن قومداپ, قالامىن جۇرەك سياسىنا مالىپ, قارقارالىنىڭ قالىڭ قاراعايىنا قاراي ماڭدايىن بەرىپ, جازۋ ۇستەلىندە وتىر. ەندى نە جازار ەكەن؟ وقۋعا ق ۇلىقتىمىز.
وتەگەن ورالباي ۇلى,
مەملەكەتتىك سىيلىقتىڭ لاۋرەاتى