حالىقارالىق اۆتوشەرۋ اتىراۋعا كەلدى

9 شىلدەدە ماسكەۋدەگى «زاريادە» ساياباعىنان باستالعان حالىقارالىق اۆتوكولىك ەكسپەديتسياسىنا قاتىسۋشى­لار قازاقستان شەكاراسىنان ءوتىپ, اتىراۋ ايماعىنا كەلدى. وبلىس ورتالى­عىنداعى دوستىق ۇيىندە قوناقتاردى شاشۋ شاشىپ قارسى العان شاراعا اتىراۋ وبلىسى قازاقستان حالقى اس­سامب­لەياسى, «قوعامدىق كەلىسىم» مەكە­مەسىنىڭ ۇجى­مى, اتىراۋ قالالىق اكىم­دىگىنىڭ, بۇقارا­لىق اقپارات قۇرال­دارىنىڭ وكىلدەرى, ەتنومادەني بىرلەستىك مۇشەلەرى قاتىستى. 

– قازاق ەلىنىڭ مۇنايلى استاناسى اتانعان اتىراۋدا 80-نەن استام ەتنوس وكىلدەرى تۇرادى, 19 ەتنو­ما­دەني بىرلەس­تىك بار, – دەدى اتىراۋ قالا­سى اكىمى­نىڭ ورىنباسارى ۇلىقبەك ءتىنا­ليەۆ. – بۇل اۆتوشەرۋدىڭ ماقساتى دا ەلدەر­دىڭ اراسىن جاقىنداتىپ, حالىق­ارا­لىق بايلانىستى نىعايتۋ. وسى ماقسات­­تارى­ڭىزدىڭ ورىندالۋىن, قايدا بارسا­ڭىز­دار دا جولدارىڭىز اشىق بولۋىن تىلەيمىز.

ەكسپەديتسياعا قاتىسۋشىلار اتى­نان ءسوز العان «ەدينستۆو» جۋرنالىنىڭ باس رەداكتورى الەكساندر شين: «ەكىن­شى دۇنيەجۇزىلىك سوعىس ۋاقىتىندا, دەپورتاتسيا كەزىندە كورەي حالقىن باۋىرىنا باسىپ, جاقسىلىعىن اياماعان, تورىنەن ورىن بەرگەن قازاق ەلىنىڭ دارحان پەيىلىن ەشقاشان ۇمىتپايمىز. سول قازاقى قوناقجايلىلىقتى بۇگىن دە كورىپ, سەزىنىپ وتىرعانىمىزعا قۋانىشتىمىز. سىزدەردىڭ اق كوڭىلدەرىڭىز جولىمىزعا تىلەكشى بولادى دەگەن ويدامىز. ۇزاق ساپارعا بەت العان بىزگە دەگەن قۇر­مەت­تەرىڭىزگە العىسىمىز شەكسىز», – دەپ ريزا­شىلىعىن جەتكىزدى. اۆتوجورىققا 10 كولىك قاتىسادى. 

«رەسەي حالىقتارىنىڭ اسسامب­لەياسى», جالپىرەسەيلىك قوعامدىق ۇيىمداردىڭ باستاماسىمەن جولعا شىققان اۆتوشەرۋ ماسكەۋ – نۇر-سۇلتان – تاشكەنت – ۇلان-باتىر – پحەنيان – بەيجىڭ – سەۋل – ماسكەۋ باعىتى بويىنشا جۇرەدى. قۇرامىندا رەسەيلىك جانە كورەيلىك قوعامدىق ۇيىمداردىڭ باسشىلارى, سايا­حاتشىلار مەن بلوگەرلەر, جۋرناليس­تەر, فوتوگرافتار بار ەكسپەديتسيا جەتى مەملەكەتتىڭ 41 قالاسىندا بولادى. جەتپىس كۇن بويى جولدا ءجۇرىپ, 15 قىركۇيەكتە ماسكەۋدە اياقتالاتىن ساپاردىڭ ءساتتى بولۋىن تىلەگەن اتىراۋلىقتار جولاۋشىلاردى اق باتامەن شىعارىپ سالدى. الدا ولاردى 30 000 شاقىرىمعا جۋىق جول كۇتىپ تۇر.