ەستافەتاعا قاتىسۋشىلاردىڭ اراسىنان تاراز قالاسىنىڭ تۇرعىنى ۆيكتوريا ۆياچەسلاۆوۆنا ترەگۋبوۆا اباي قۇنانباەۆتىڭ «ولەڭ – ءسوزدىڭ پاتشاسى» ولەڭىن وقىپ, كوپشىلىك كوزايىمىنا اينالدى. الەۋمەتتىك جەلىدە جوعارى تانىمالدىققا يە بولىپ, قحا ءباسپاسوز قىزمەتى تاراتقان بەينەجازباعا 1500-گە جۋىق رەپوست جاسالىپ, كورۋشىلەر سانى 65 مىڭنان استى.
بەلگىلى اقىن, مەملەكەتتىك سىيلىقتىڭ يەگەرى تىنىشتىقبەك ابدىكاكىم ۇلى, اقىن «پلاتينالى تارلان» سىيلىعىنىڭ يەگەرى يسرايل ساپارباي, كورنەكتى كۇيشى, قازاقستاننىڭ ەڭبەك سىڭىرگەن قايراتكەرى جانعالي جۇزباەۆ, كينورەجيسسەر, قازاقستاننىڭ ەڭبەك ءسىڭىرگەن قايراتكەرى ساتىبالدى نارىمبەتوۆ, ءدۇلدىل ءانشى, قازاقستاننىڭ ەڭبەك سىڭىرگەن قايراتكەرى ەرلان رىسقالي جانە باسقا اقىن-جازۋشىلار مەن باق وكىلدەرى, سونداي-اق الەۋمەتتىك جەلى قولدانۋشىلارى ۆيكتورياعا قازاق تىلىنە دەگەن قۇرمەتى ءۇشىن ەرەكشە العىس ايتىپ, زور ريزاشىلىعىن ءبىلدىردى.
وسى ورايدا جاقىنىراق تانىستىرا كەتسەك, ۆيكتوريا ۆياچەسلاۆوۆنا ترەگۋبوۆا – 1998 جىلى 1 ماۋسىمدا رەسەي فەدەراتسياسى ۋليانوۆسك وبلىسىندا دۇنيەگە كەلگەن. 2000 جىلى جامبىل وبلىسى مويىنقۇم اۋدانى ۇلانبەل اۋىلىنا قونىس اۋدارعان. م.اۋەزوۆ اتىنداعى ورتا مەكتەپتى بىتىرگەن. 2015-2019 جىلى م.ح.دۋلاتي اتىنداعى تاراز مەملەكەتتىك ۋنيۆەرسيتەتىنىڭ جۋرناليستيكا فاكۋلتەتىن بىتىرگەن.
قازىرگى كەزدە تاراز قالاسىندا تۇرادى, قاڭتار ايىنان باستاپ جامبىل وبلىستىق تەلەارناسىنىڭ «Tuski time» باعدارلاماسىنىڭ تالىمگەر-جۇرگىزۋشىسى. جامبىل وبلىستىق قازاقستان حالقى اسسامبلەياسى «رادانەج» ورىستار قوعامى بىرلەستىگىنىڭ مۇشەسى جانە قحا جاڭعىرۋ جولى جاستار قوزعالىسىنىڭ بەلسەندىسى.
– وتباسىندا ەكى اعايىندىمىز. وزىمنەن ءۇش جاس ۇلكەن اعام ۆلاديسلاۆ تا قازاق مەكتەبىن بىتىرگەن, قازاق تىلىندە ەركىن سويلەيدى. انام سۆەتلانا ستەپانوۆنا – مەتەورولوگ, اكەم ۆياچەسلاۆ الەكساندروۆيچ جامبىل وبلىستىق وباعا قارسى كۇرەس ستانساسىنىڭ قىزمەتكەرى. ناعاشى جۇرتىم – جامبىل وبلىسىنان, انام ۇلانبەل اۋىلىندا تۋىپ-وسكەن. رەسەيگە قىدىرىپ بارىپ, اكەممەن تانىسىپ, ەكەۋى شاڭىراق كوتەرگەن. ارادا 6-7 جىل وتكەندە انام اكەمە تۋىپ-وسكەن جەرىن كورسەتپەكشى بولىپ, ەكى بالاسىمەن توركىنىنە قىدىرىپ كەلەدى. اكەمە قازاقستاننىڭ ۇناعانى سونشالىق, ءبىز رەسەيگە قايتا ورالمادىق.
اۋىلدا ءبىر عانا قازاق مەكتەبى بولعاندىقتان, ۇيدەگىلەر ءبىزدى امالى جوقتىعىنان سول ءبىلىم وشاعىنىڭ پارتاسىنا وتىرعىزعان بولار. بىراق ءبىز قازىر مەملەكەتتىك ءتىلدى جوعارى دەڭگەيدە بىلەتىنىمىز ءۇشىن ماقتانامىز. قازاقى ورتادا تاربيەلەنۋىمە مۇمكىندىك جاساعان اكە-شەشەمە مىڭ العىس ايتامىن. ءوزىمدى كوپشىلىككە ورىستىڭ قازاق قىزىمىن دەپ تانىستىرامىن, – دەيدى ۆيكتوريا ترەگۋبوۆا.