سارسەنبى, 13 ناۋرىز 2013 7:07
ءتورت ت ۇلىك يەسىن كۇتەدى
امانگەلدى اۋدانى قوستاناي وبلىسىنىڭ وڭتۇستىگىندە, شالعايدا جاتىر. تورعايدىڭ كەڭ دالاسى كەشەگى كەڭەس زامانىندا مىڭعىرعان ءتورت ت ۇلىك مال بولاتىن. الدىمەن اۋىلدى تىقسىرا نارىق كەلگەندە جوسپارلى ەكونوميكاعا نەگىزدەلگەن اۋىل شارۋاشىلىعىنىڭ تۇرالاعانى جۇرتتىڭ بارلىعىنا بەلگىلى. ەلىمىزدىڭ ەكونوميكاسى كوتەرىلگەن بۇگىنگى كۇنى اۋىل شارۋاشىلىعىنا سونى لەپ كەلدى دەۋگە بولادى.
سارسەنبى, 13 ناۋرىز 2013 7:07
ءتورت ت ۇلىك يەسىن كۇتەدى
امانگەلدى اۋدانى قوستاناي وبلىسىنىڭ وڭتۇستىگىندە, شالعايدا جاتىر. تورعايدىڭ كەڭ دالاسى كەشەگى كەڭەس زامانىندا مىڭعىرعان ءتورت ت ۇلىك مال بولاتىن. الدىمەن اۋىلدى تىقسىرا نارىق كەلگەندە جوسپارلى ەكونوميكاعا نەگىزدەلگەن اۋىل شارۋاشىلىعىنىڭ تۇرالاعانى جۇرتتىڭ بارلىعىنا بەلگىلى. ەلىمىزدىڭ ەكونوميكاسى كوتەرىلگەن بۇگىنگى كۇنى اۋىل شارۋاشىلىعىنا سونى لەپ كەلدى دەۋگە بولادى.
ول دامۋدىڭ كەپىلىنە اينالعان يننوۆاتسيالىق-ينۆەستيتسيالىق باعدارلامانىڭ اۋىل شارۋاشىلىعىنا بۇرىلعاندىعىنان كورىنەدى. مەملەكەت بۇل سالاعا ەرەكشە نازار اۋدارىپ, شارۋا جاعدايىن بىلەتىن ادامدارعا جەڭىلدىكپەن بەرىلەتىن قارجى-كومەكتى پايدالانۋعا مۇمكىندىك بەرىپ وتىر. وسى ورايدا, امانگەلدى اۋدانىندا زور مۇمكىندىكتەر بار. بۇل جونىندە اۋدان اكىمى جانسۇلتان تاۋكەنوۆپەن ءبىزدىڭ ءتىلشىمىز تىلدەسكەن ەدى.
– جانسۇلتان قوڭىرتاي ۇلى, امانگەلدى اۋدانى ەكونوميكاسىنىڭ بۇگىنگى دامۋ ەكپىنى قالاي؟
– اۋدانىمىز وبلىس ورتالىعىنان شالعايدا جاتقانىمەن, ونىڭ الەۋمەتتىك-ەكونوميكالىق دامۋى كوشتەن قالىپ وتىرعان جوق. اڭگىمەمىزگە دەرەك پەن دايەكتى تۇزدىق ەتە سويلەر بولسام, وتكەن جىلى اۋدان ەكونوميكاسىنىڭ نەگىزگى سالاسى – اۋىل شارۋاشىلىعىندا وندىرىلگەن ءونىم 4 ميللياردتان استام تەنگە قۇرادى. اۋىل شارۋاشىلىعىندا 1778 ادام ەڭبەك ەتتى, ولاردىڭ ورتاشا ايلىق ەڭبەكاقىسى 45000 تەڭگەنى قۇرادى. شارۋاشىلىقتىڭ بارلىق تۇرلەرىندە جانە جەكە سەكتوردى قوسىپ ەسەپتەگەندە اۋداندا 18500 باس ءىرى قارا, 54545 باس قوي-ەشكى, 9393 باس جىلقى, 74115 باس قۇس بار. وتكەن جىلى عانا اۋداندا 4240,5 توننا ەت, 14184,3 توننا ءسۇت, 4323,1 مىڭ دانا جۇمىرتقا ءوندىرىلدى.
بۇل مال شارۋاشىلىعىندا جەتكەن تابىس. ال ەگىن شارۋاشىلىعىندا دا قاراپ وتىرعانىمىز جوق. بىلتىر 85987 گەكتار القاپقا ءتۇرلى داقىلدار ەگىلدى. ءارينە, ونىڭ باسىم بولىگى ءداندى داقىل دا, 805 گەكتارى مايلى داقىلعا تيەسىلى. 63,5 گەكتار جەرگە كوكونىس ەگىلدى. وتكەن جىلعى قۋاڭشىلىقتان وبلىستىڭ وڭتۇستىك اۋداندارىندا استىق شىعىمدىلىعى وتە ناشار بولدى, اۋدان بويىنشا 21000 گەكتاردىڭ ەگىنى كۇيىپ كەتتى. نەگىزى امانگەلدى اۋدانىنىڭ توپىراعى وبلىستىڭ سولتۇستىك اۋداندارىنداعىداي ەگىن ءۇشىن اسا قۇنارلى ەمەس. سوندىقتان, جىل جاڭبىرلى بولعان جىلداردىڭ وزىندە شىعىمدىلىق قارا توپىراقتى اۋداندارمەن سالىستىرۋعا كەلمەيدى, جەردى كوپ وڭدەۋگە, زيانكەستەرمەن كۇرەسۋگە شىعىن كوپ كەتەدى. سوندىقتان, مال شارۋاشىلىعىنا باسىمدىق بەرەمىز.
– ەلباسى مال شارۋاشىلىعىن دامىتۋعا باسىمدىق بەرۋ, كورشى ەلگە ەت ەكسپورتتاۋ كەرەكتىگىن ايتتى. امانگەلدى اۋدانى وسى تاپسىرما ۇدەسىنەن شىعا الا ما؟ كەڭەس وداعى جىلدارى وبلىس بويىنشا 1 ميلليون 468 مىڭ ءىرى قارا بولدى, بۇگىندە ونىڭ سانى 398 مىڭدى عانا قۇرايدى. ال ءوزىڭىز ايتقانداي, امانگەلدى اۋدانى مالعا قولايلى بولعانىمەن, ءتۇلىك باسىنىڭ كوبەيۋى كوڭىلگە قونا ما؟
– نارىقتىڭ الدىنداعى 90-شى جىلدارى امانگەلدى اۋدانىندا جيىرما شاقتى كەڭشار بولدى, سونىڭ ءار بولىمشەسىنەن باسقا ت ۇلىكتى ايتپاعاندا, 15 مىڭداي ۇساق مال ورەتىن. بۇل سالىستىرۋ وتكەندى اڭساۋ ەمەس, مال باسىن كوبەيتۋگە اۋدانداعى مۇمكىندىكتىڭ مول ەكەنىن ەسكە سالۋ عانا. باتپاققارا وڭىرىندە ءازىر وركەنىن جايار ءوندىرىس كاسىپورىندارىن كورىپ وتىرعانىمىز جوق. جەراستى بايلىعى بولعانىمەن, ول ءالى زەرتتەلىپ, بەلگىلى ەكونوميكالىق شەشىمدەر جاسالۋعا ۋاقىت كەرەك. بۇل جەردى قاشاننان مال تۇياعى تاپتاعان. قازىر اۋدانداعى ەلدى مەكەندەردەن سىرتقا كوشى-قون توقتاعان. مال ۇستاپ وتىرعان اعايىننىڭ جاعدايى جامان ەمەس. جاقىندا, اۋدانداعى 12 اۋىلدىق وكرۋگتىڭ بارلىعىندا تۇرعىندار جيىنى بولىپ ءوتتى. ءار اۋىلعا بارعان سايىن تۇرعىندار سۇرانىسىن, قاجەتىن سۇراستىرىپ وتىردىم. سوندا اۋىلداعى اعايىن ۇن جوق, ماي جوق دەمەيدى, ۇيالى تەلەفون جەلىسىنىڭ كەلۋىن, قولجەتىمدى نەسيەلەر الۋدى سۇرايدى. وسىنىڭ وزىنەن ولاردىڭ الەۋمەتتىك جاعدايىنىڭ جاقسى ەكەنىن بايقاۋعا بولادى. مالىنىڭ ارقاسىندا بالالارىنا ماماندىق يگەرتىپ, وقىتىپ جاتىر. قالالىقتار ءمىنىپ جۇرگەن شەتەلدىك جەڭىل جۇردەك كولىكتەر دە اۋىلداعىلاردان تابىلادى. مىسالى, ەكى مىڭعا تارتا ادام تۇراتىن ۇرپەك اۋىلدىق وكرۋگىندە جۇزدەن اسا جەڭىل كولىك بار. وسىدان 5-6 جىل بۇرىن مۇنىڭ جارتىسى دا بولمايتىن. ءبارى دە قوراداعى مالىنىڭ ارقاسى. جالپى, اۋداننىڭ الەۋمەتتىك الەۋەتىن وسال دەمەس ەدىم. مەكتەپتەر, فەلدشەرلىك پۋنكتتەر جوندەلگەن, بايلانىس بار.
قازىر اۋداندا 2 ميلليون 250 مىڭ گەكتار جەر بار. ونىڭ 1 ميلليون 800 مىڭ گەكتارى جايىلىم جانە شابىندىق جەرلەر. وسىندا كەلىپ, مال وسىرەمىن دەگەن ادامعا بۇل زور مۇمكىندىك. مال ءوسىرۋ ءۇشىن ەڭ قاجەتى جەر, ياعني جايىلىم مەن شابىندىق ەمەس پە؟ وبلىستىڭ سولتۇستىك اۋداندارىندا مال وسىرۋگە جايىلىمنىڭ تارلىق ەتەتىنى ايتىلىپ ءجۇر. ويتكەنى, كوپ جەردى ەگىن القابى الىپ جاتىر. مالعا ۇزاپ جايىلاتىن جايىلىم كەرەك. سونىمەن قاتار, وبلىستىڭ سولتۇستىك اۋداندارىندا قىس ماۋسىمىندا مال قورادا ۇزاق تۇرادى. ال, تورعاي ءوڭىرى ىقتاسىن, كۇنگەي بولعاندىقتان, مۇندا مال قوراعا قاراشا ايىنسىز كىرمەيدى, ءتىپتى, كەيبىر جىلدارى شارۋا جەلتوقساندا عانا اقىرعا ءشوپ سالادى. وعان دەيىن مال سىرتتا جايىلادى. جىلقى قىس بويى تەبىندەيدى. كوكتەمدە ناۋرىز ايى اياقتالماي-اق مال ورىسكە شىعىپ كەتەدى. دالانىڭ كوگى مالدىڭ جالاۋىنا جاراپ قالادى. مۇنىڭ ءوزى مال وسىرەمىن دەگەننىڭ بەينەتىن دە, شىعىنىن دا جەڭىلدەتەدى.
– ەلباسىنىڭ تاپسىرماسىنا سايكەس, 2015-2020 جىلدار ارالىعىندا مال باسىن كوبەيتىپ, قوستاناي وبلىسى جىل سايىن رەسەيگە 4400 توننا ەت ەكسپورتتاۋى ءتيىس. سىرتقا ارتاتىن ەتتىڭ ساپاسى تالاپقا ساي بولۋى كەرەك. وسى ىسكە امانگەلدى اۋدانى قانداي ۇلەس قوسار ەدى؟
– «سىباعا» باعدارلاماسى مال باسىن كوبەيتۋدىڭ جاقسى جولىنىڭ ءبىرى دەر ەدىم. امانگەلدى اۋدانىندا باعدارلاما جۇمىس ىستەي باستاعاننان بەرى شارۋالار 100 ميلليون تەڭگەدەن اسا نەسيە الىپ, وعان 490 باس سيىر, 19 باس اسىل تۇقىمدى اۋليەكول, قازاقتىڭ اق باس بۇقالارىن ساتىپ الدى. امانگەلدى اۋدانىنىڭ ەلدى مەكەندەرىندە كوشپەي وتىرعان اعايىننىڭ تابىس كوزى – قولىنداعى مالى. سوندىقتان, ولار «سىباعا» باعدارلاماسىنىڭ جەڭىلدىكتەرىن پايدالانىپ, قولداعى مالدى اسىلداندىرۋعا جانە ونىڭ باسىن بارىنشا كوبەيتۋگە تىرىسۋدا. الداعى ۋاقىتتا وسى باعدارلاما بويىنشا شارۋالار تاعى دا 283 ميلليون تەڭگەدەن اسا نەسيە قارجى الىپ, وعان بيىل 214, كەلەسى جىلى 341, ارعى جىلى 341 باس ءىرى قارا الىپ, ءوسىرۋدى مەجەلەپ وتىر.
دەگەنمەن, مال شارۋاشىلىعىن دامىتۋعا ءىرى ينۆەستورلار كەلمەي, جالعىز «سىباعامەن» بۇل سالانى سىباعالى ەتە الماسىمىز انىق. سوندىقتان, مەن تەك وبلىستاعى عانا ەمەس, جالپى, ەلىمىزدىڭ ءار شالعايىنداعى قالتالى, مۇمكىندىگى بار ازاماتتاردى ءبىزدىڭ اۋدانعا ينۆەستيتسيا اكەلۋگە شاقىرعىم كەلەدى. تورعاي ءوڭىرى تابيعاتىنىڭ مال شارۋاشىلىعىنا قولايلىلىعى تۋرالى ايتىپ ءوتتىم. بۇل سالاعا مەملەكەت تاراپىنان دا زور قولداۋ بولىپ وتىر. ونىڭ ۇستىنە اۋدانعا كەلىپ, مال شارۋاشىلىعىن دامىتۋعا ينۆەستيتسيا قۇيۋ تىڭنان تۇرەن سالۋ ەمەس. ونىڭ اۋداندا جارقىن مىسالدارى دا بار. مىسالى, وڭتۇستىك قازاقستان وبلىسىنان كەلگەن كاسىپكەر رۋسلان ءسارسەنوۆ امانگەلدى اۋدانىنداعى ۇرپەك اۋىلدىق وكرۋگىنە قاراستى ك ۇلىك ەلدى مەكەنىندە « ۇلى دالا» شارۋا قوجالىعىن قۇردى. ونىڭ ينۆەستيتسيالىق جوباسى 2016 جىلعا دەيىن تولىق قۋاتىندا پايدا بەرەتىن بولادى. رۋسلان ازىرگە 150 جىلقى, 100 ءىرى قارا, 300 باس ۇساق مال الدى, ولارعا قورا-قوپسى سالدى, التى پاتەرلىك ءۇي تۇرعىزدى. وسىنىڭ بارلىعىنا 96 ميلليون تەڭگە ينۆەستيتسيا قۇيدى. ماشينا-تراكتورلارىن الىپ جاتىر, قانشا ادامعا جۇمىس بەرىپ وتىر, ادامدارعا جاعداي جاساۋ ءۇشىن ينفراقۇرىلىم قۇرىلىسىن دا توقتاتپايدى. جوبانىڭ جالپى قۇنى 200 ميلليون تەڭگەنى قۇرايدى.
اتالارىمىز «مال باققانعا بىتەدى» دەگەن عوي. ينۆەستيتسيا سالعان مال شارۋاشىلىعىنان ەشكىم ەگىن سياقتى سول جىلى پايداسىن كورمەيدى. قانداي ت ۇلىكتىڭ دە تولىق قايتارىمىن ءۇش-ءتورت جىل كۇتۋى ءتيىس. ال قازىر مالدىڭ تىرىلەي سالماقتاعى باعاسى دا جامان ەمەس. جىلقى ورتا ەسەپپەن 350-360 مىڭ تەڭگە, ءىرى قارا 250 مىڭ تەڭگەگە وتەدى.
– مالدىڭ ءونىمىن وڭدەۋدى ويلاستىرماسا, تىرىدەي ساتىپ نەمەسە ەتكە وتكىزۋمەن قۇرىق ۇستاعان مالشىنىڭ ماڭداي تەرى قۇرعاي قويار ما ەكەن؟ كورشى رەسەيدىڭ چەليابى وبلىسىندا مىڭ جىلقى, ەكى جارىم مىڭ ءىرى قارا, وسىنشا قوي ءوسىرىپ وتىرعان قانداسىمىز ايدارحان قارساقباەۆ ءبىر كيلوگرامم دا ەت ساتپايدى. مالدان تۇسكەن ەتتى دە, ءسۇتتى دە دۇكەن سورەسىنە تەگىس ۇقساتىپ, جارتىلاي وڭدەپ شىعارادى. اي سايىن ماسكەۋگە 15 توننا قىمىز جونەلتەدى. تورعاي ءوڭىرىنىڭ شالعىنىنا جايىلعان مالدىڭ ءسۇتى مەن ەتىن ۇقساتا السا, سودان كەم تۇسەر مە ەدى؟
– دۇرىس ايتاسىز. تورعايدىڭ قىمىزىن برەند جاساۋعا بولار ەدى. سونىڭ بارلىعىن ۇقساتۋعا ينۆەستيتسيا قاجەت. بيە بايلايتىن كىسىلەر جاز ايلارىندا قىمىزدى سۋدان بوساعان پوليەتيلەن شولمەكتەرگە قۇيىپ, ارقالىققا, قوستانايعا, استاناعا قاتىناعان كولىكتەردەن بەرىپ جىبەرىپ جاتادى. اۋدان ورتالىعىنا اكەلىپ ساتادى. وڭتۇستىك وبلىستاردان كەلىپ, ەتكە سوياتىن مالدى ءتىرىلەي ارتىپ اكەتەدى. مۇنىڭ بارلىعىن وندىرىستىك جولعا قويۋ ءۇشىن قالتالى ازاماتتار, ءىس تەتىگىن بىلەتىن كاسىپكەرلەر ينۆەستيتسيا سالۋى ءتيىس. جەر, جايىلىم, شابىندىق جەتەدى. جىلدا وبلىستىڭ وزگە ايماقتارىنىڭ شارۋاشىلىقتارى ءبىزدىڭ اۋداننان كەلىپ, ءشوپ شاۋىپ اكەتەدى. مۇنىڭ ءوزى بايلىقتىڭ كوزى ەمەس پە؟ مال شارۋاشىلىعىنا قاجەتتىڭ ءبىرى اۋىز سۋ ماسەلەسى بولسا, ونىڭ جاعدايى دا ءبىزدىڭ اۋداندا جامان ەمەس. وڭىردەگى تورعاي, قابىرعا, سىنتاستى, جالداما وزەندەرى مال شارۋاشىلىعىن دامىتۋعا قولايلىلىق تۋعىزادى. ءتىپتى, وسى وزەندەردىڭ بويىن جايلاپ وتىرعان اۋىلدار كوكونىس, باقشا شارۋاشىلىعىمەن دە اينالىسادى. ونىڭ كولەمىن وسىرۋگە دە بولادى. قارجى تاپساق بۇرىنعى قۇدىقتاردى دا قالپىنا كەلتىرۋگە تولىق مۇمكىندىك بولار ەدى.
شارۋاشىلىقتىڭ قاي سالاسى دا ادام ەڭبەگىمەن داميدى. ءبىر ايتا كەتەرىم, ءبىزدىڭ امانگەلدى اۋدانى شارۋانىڭ قولىنان قۇرىعى تۇسپەگەن ءوڭىر. اۋىلدا ءوندىرىس, كاسىپورىن جوق, كۇنكورىس كوزى نەگىزىنەن مال بولعاندىقتان, اۋىلدا تۇرعان اعايىننىڭ بارلىعى دا شەتىنەن شارۋا. مالدىڭ جاعدايىن جاقسى بىلەدى. سوندىقتان, مال شارۋاشىلىعىنا ينۆەستيتسيا سالعان كاسىپكەرگە مالشى تابۋ دا قيىندىققا سوقپايدى. اۋىلداردا 90-شى جىلدارى ناشارلاپ كەتكەن ۆەتەرينارلىق جۇمىستار قايتا جانداندى. قازىر ەلدى مەكەندەردە مال اۋرۋلارىنا جول بەرمەيمىز. تۇرعىنداردىڭ وزدەرى دە تۇسىنگەن, بۇرىنعىداي اۋرۋ مالدى ۇستاپ وتىرا بەرمەيدى.
– كەڭەس وداعى كەزىندە ايتىلعان ءبىر انەكدوت ەسكە تۇسەدى. كومسومولدىق جولدامامەن لەنينگرادتان ءبىر جۇمىسشى قازاقستانعا مال باعۋعا كەلىپتى. الدىنا ءبىر وتار قوي سالىپ بەرەدى. الگى لەنينگرادتىق مالدى ورىسكە تاڭەرتەڭ ساعات 8-دە شىعارىپ, تۇستە ەكى ساعات قاماپ قويىپ, كەشكە ساعات 6-دا ورىستەن ايداپ اكەلگەن ەكەن. حالقىمىزدىڭ قانىنا سىڭگەن شارۋاقورلىقپەن باقسا, وسىدان نە ءبارى جيىرما جىلداي عانا بۇرىن تورعاي دالاسىندا قاپتاپ ورگەن مالدى قالاي قالپىنا كەلتىرمەسكە؟ بۇل قازاق ءۇشىن الىنبايتىن قامال ەمەس سياقتى.
– ارينە, اتادان كەلە جاتقان قۇرىعى ءالى شارۋانىڭ قولىندا ەكەنىن شۇكىرشىلىكپەن ايتقىم كەلەدى. سوناۋ شالعايداعى ءوندىرىسى, كاسىپورىندارى جوق ۇلان دالادا اعايىن قوراداعى مالىنا سەنبەسە نەگە وتىر؟ دەگەنمەن, جەكەنىڭ قوراسىنداعى مال مەن مال شارۋاشىلىعىن ءوندىرىستىك جولعا قويۋ ەكى باسقا ۇعىم. بۇل ءۇشىن ءوزىڭىز ايتىپ وتىرعان شارۋاقورلىقتىڭ ۇستىنە ۆەتەرينارلىق, زووتەحنيكالىق جۇمىستاردى دا قالپىنا كەلتىرۋ قاجەت. ءشوپتى تەحنيكاسى دايىن بولعان كەزدە ەمەس, قۇنارى كەتپەي تۇرىپ, بابىنداعى كەزىندە ورىپ, كەپتىرىپ, جيناپ السا, جەمدى بۋلاپ بەرسە, ونىڭ قۇرامىندا مينەرالدىق تۇزدار مەن ۆيتاميندەردى تۇگەندەپ قاداعالاسا, سۇرلەم جاساۋدى قالپىنا كەلتىرسە نەگە بولماسىن. مۇنىڭ بارلىعىن ءبىز ۇيرەتپەي-اق, قارجى سالعان ينۆەستورلار مامانداردىڭ ارقاسىندا ءوزدەرى-اق ورنىنا كەلتىرەدى دەپ سەنەمىن. ينۆەستورلار كەلسە, ەلدى مەكەندەردىڭ ينفراقۇرىلىمى دا جاڭعىرتىلار ەدى. مال تۇقىمىن اسىلداندىرۋعا الىستان اربالاماي-اق, وبلىستاعى, رەسپۋبليكاداعى اسىل تۇقىمدى مال وسىرەتىن شارۋاشىلىقتاردان ءىرى قارانىڭ سولتۇستىكتىڭ ايازىنا, سۋىعىنا ءتوزىمدى, ءمارمار ەتتى توننالاپ اۋداراتىن اۋليەكول, قازاقتىڭ اق باس سيىرى تۇقىمدارىن الۋعا بولادى. تورعايدا جىلقىنىڭ ءبىرالى جابىسى دەگەن تۇقىمى بولعان ەكەن. ونى نەگە قالپىنا كەلتىرمەسكە؟ ءىستىڭ كوزىن تاپقان كىسىگە دالا تۇلەگەلى تۇر.
– ۇلان-بايتاق دالانى شاشىراي جايلاعانمەن, قۇلىنداي شۇرقىراسىپ, ءتىلىمىزدە ديالەكت, سالتىمىزدا ەرەكشەلىگىمىز بىلىنبەگەن قاتىقتاي ۇيىعان حالىقپىز. تورعاي دالاسى جەلدىڭ ءوتى, ەلدىڭ شەتى ەمەس, شارۋامىزدا دا اسا وزگەشەلىك بولا قويمايدى. ونىڭ ۇستىنە بۇگىن وزىق تەحنولوگيالار زامانىندا ءومىر ءسۇرىپ وتىرعانىمىزدى ىزدەنىس ۇستىندە جۇرەتىن ينۆەستورلار ءبىز ايتپاي-اق بىلەدى. ەندەشە, ەلىمىزدىڭ قاي شالعايىنان بولسىن تورعاي دالاسىنا مال وسىرەمىن دەپ قارجى سالعان كاسىپكەردىڭ قۇرىعى مايلانارىنا ءسىز كەپىل, ءبىز تىلەكتەس بولىپ, اڭگىمەنى بىتىرەيىك.
اڭگىمەلەسكەن
ءنازيرا جارىمبەتوۆا,
«ەگەمەن قازاقستان».
قوستاناي وبلىسى,
امانگەلدى اۋدانى.