باسقارمانىڭ ەسەبىنە قاراعاندا, وتكەن جىلى وڭىردە 2982 سپورتتىق-بۇقارالىق ءىس-شارا وتكەن ەكەن. ياعني, جىل بويى ءۇزىلىسسىز كۇن سايىن 8-9 شارا ءوتىپ تۇرعان. بۇل جارىستارعا 155 340 ادام قاتىسىپتى. ال 2019 جىلدىڭ ءى توقسانىندا 51772 ادام قاتىسقان 1052 سپورتتىق-بۇقارالىق ءىس-شارا وتكەن.
– وتكەن جىلدىڭ وسى كەزەڭىمەن سالىستىرعان وتكىزىلگەن ءىس-شارانىڭ سانى 380-گە, ال قامتىلعان ادام سانى 12291-گە ارتتى, – دەيدى ءاسيا راحىمقىزى.
سوڭعى كەزدە بۇقارالىق سپورتتى دامىتۋ ماقساتىندا كوپشىلىك جۇگىرۋلەر مەن ءتۇرلى سپارتاكيادالار كوبەيدى. مىسالى, جەڭىس كۇنىنە ارنالعان كوپشىلىك جۇگىرۋگە 1000-عا جۋىق ادام قاتىسسا, قازاقستان رەسپۋبليكاسىنىڭ مەملەكەتتىك قىزمەتشىلەر كۇنى مەرەكەسىنە ارنالعان كوپشىلىك جۇگىرۋ سىنى 600 سپورتشىنىڭ باسىن قوستى. سونداي-اق استانا قالاسىنىڭ 20 جىلدىعىنا ارنالعان «اقجايىق دۋاتلون-2018» جارىسى سپورتسۇيەر قاۋىمنىڭ ۇلكەن قىزىعۋشىلىعىن تۋعىزدى. بۇل جارىستا 500 سپورتشى باق سىنادى.
سپورتشىنىڭ ۆەلوسپورت پەن جەڭىل اتلەتيكانىڭ قوسىندىسى سانالاتىن دۋاتلون جارىستارى الداعى ۋاقىتتا ءداستۇرلى تۇردە وتكىزىلمەك.
بيىلعى التى ايدىڭ وزىندە وبلىستا بوكستان وليمپيادا چەمپيونى د.ەلەۋسىنوۆتىڭ جۇلدەسىنە حالىقارالىق تۋرنير, ۆولەيبولدان جوعارى ليگا ەرلەر جانە ايەلدەر كوماندالارى اراسىندا قازاقستان رەسپۋبليكاسى چەمپيوناتىنىڭ ءىىى تۋرى, سامبو, دزيۋدو, بايداركا مەن كانوە ەسۋدەن جانە ۆولەيبولدان ەرلەر مەن ايەلدەر كوماندالارى اراسىندا قازاقستان رەسپۋبليكاسىنىڭ V جازعى سپارتاكياداسى سىندى سپورتتىق شارالار ءوتتى.
باسقارما باسشىسى ايتقانداي, اۋدانداردا بۇقارالىق سپورتتى دامىتۋ جولعا قويىلعانى بايقالادى. بىلتىر استانا قالاسىنىڭ 20 جىلدىعىنا وراي بارلىق اۋداندا ۆەلوەستافەتا ۇيىمداستىرىلىپ, مارەسى «AQJAIYQ DUATHLON-2018» جارىسىمەن تامامدالعان ەدى.
– اۋدان تۇرعىندارىن دەنەشىنىقتىرۋ جانە سپورتپەن اينالىسۋعا تارتۋ, مەكتەپ وقۋشىلارىنىڭ سپورتقا قىزىعۋشىلىعىن ارتتىرۋ ماقساتىندا اۋدان ورتالىقتارىندا وبلىس چەمپيوناتتارىن, رەسپۋبليكالىق تۋرنيرلەردى وتكىزۋ تاجىريبەسى قولعا الىندى, – دەيدى ءاسيا امانباەۆا.ماسەلەن, 2018 جىلى ءبورلى اۋدانى سامبودان 2002-2003 جىلدارى تۋعان جاسوسپىرىم ۇلدار مەن قىزدار اراسىنداعى قازاقستان رەسپۋبليكاسىنىڭ چەمپيوناتىن جانە اۋىل جاسوسپىرىمدەرىنىڭ ءىى جازعى ويىندارى جانە ۆولەيبولدان ايەلدەر اراسىنداعى وبلىس بىرىنشىلىگىن, «قازاقستان بارىسى» ءتۋرنيرىنىڭ وبلىستىق كەزەڭىن ۇيىمداستىردى. ال بايتەرەك اۋدانى ۆولەيبولدان ەرلەر, ايەلدەر كوماندالارى اراسىندا, گىر سپورتىنان جاستار اراسىندا جانە سپورتتىق كاراتەدەن وبلىس چەمپيوناتتارىن جوعارى دەڭگەيدە وتكىزدى. اقجايىق اۋدانى ۆولەيبولدان ءجاسوسپىرىم قىزدار جانە ايەلدەر اراسىندا, تاۋ ءتۋريزمى تەحنيكاسى مەن سپورتتىق شىڭعا ورمەلەۋ سپورتىنان, جاڭاقالا اۋدانى توعىزقۇمالاقتان جاسوسپىرىمدەر اراسىندا, جانىبەك اۋدانى ۆولەيبولدان ءجاسوسپىرىم ۇلدار اراسىندا, قازتالوۆ پەن سىرىم اۋداندارى اۋىر اتلەتيكادان جاسوسپىرىمدەر اراسىندا, تاسقالا اۋدانى ۆولەيبولدان ءجاسوسپىرىم ۇلدار اراسىندا, شىڭعىرلاۋ اۋدانى ۇلتتىق ات سپورت تۇرلەرىنەن وبلىس چەمپيوناتتارىن وتكىزدى. بۇل چەمپيوناتتاردىڭ ءاربىرى جەرگىلىكتى جانكۇيەرلەردىڭ ىقىلاسىنا بولەندى.
اۋىلدىق جەردە سپورت ۇيىمدارىنىڭ ماتەريالدىق-تەحنيكالىق بازاسىن نىعايتۋعا دا كوڭىل ءبولىنىپ كەلەدى. 2018 جىلدىڭ قازان ايىندا كپو ب.ۆ. كومپانياسىنىڭ ەسەبىنەن ءبورلى اۋدانى ءبورلى اۋىلىندا دەنەشىنىقتىرۋ-ساۋىقتىرۋ كەشەنى سالىنىپ, پايدالانۋعا بەرىلسە, سول جىلى جەرگىلىكتى بيۋدجەت ەسەبىنەن 49 سپورتتىق الاڭ سالىندى. ونىڭ 36-سى اۋدانداردا. مىسالى, اقجايىق اۋدانىندا – 8 الاڭ, بوكەي ورداسى اۋدانىندا – 1 الاڭ, ءبورلى اۋدانىندا – 3 الاڭ, جاڭاقالا اۋدانىندا – 4 الاڭ, جانىبەك اۋدانىندا – 1 الاڭ, بايتەرەك اۋدانىندا – 6 الاڭ, قازتالوۆ اۋدانىندا – 5 الاڭ, سىرىم اۋدانىندا – 2 الاڭ, تاسقالا اۋدانىندا – 6 الاڭ جانە ورال قالاسىندا 13 الاڭ پايدالانۋعا بەرىلگەن.
قازاقستان رەسپۋبليكاسى مادەنيەت جانە سپورت مينيسترلىگى ەلىمىزدە 2019-2021 جىلدارى كەزەڭ-كەزەڭىمەن 100 دەنەشىنىقتىرۋ-ساۋىقتىرۋ كەشەنىن سالۋ جوباسىن بەكىتكەن بولاتىن. بقو-دا بۇل جوسپارعا سپورتتىق ينفراقۇرىلىمدى دامىتۋعا مۇقتاج 7 ەلدى مەكەن ەنگەن. سونىڭ ىشىندە جانىبەك جانە جاڭاقالا اۋداندارىندا 2 كەشەن قۇرىلىسى قپو ب.ۆ. كومپانياسى ەسەبىنەن سالىناتىن بولدى.2020-2021 جىلدار ارالىعىندا چاپاەۆ, قازتالوۆ, تاسقالا كەنتتەرىندە 320 ورىندىق دەنەشىنىقتىرۋ-ساۋىقتىرۋ كەشەنى, جالپاقتال سەلوسىندا 160 ورىندىق دشسك,
شىڭعىرلاۋ كەنتىندەگى 160 ورىندىق اشىق ستاديون سالىنباق. بۇدان بولەك, سايحىن جانە پودستەپنىي اۋىلىنا 160 ورىنعا ارنالعان دەنەشىنىقتىرۋ-ساۋىقتىرۋ كەشەنىن سالۋ بويىنشا جوبالىق-سمەتالىق قۇجات جاساقتالۋدا.
– ءبىز 2019 جىلدىڭ سوڭىنا دەيىن وبلىس اۋماعىندا 76 سپورتتىق الاڭ سالىپ, پايدالانۋعا بەرەمىز. ونىڭ 66-سى اۋدانداردا جانە 10 الاڭ وبلىس ورتالىعىندا بولادى, – دەيدى باتىس قازاقستان وبلىستىق دەنەشىنىقتىرۋ جانە سپورت باسقارماسىنىڭ باسشىسى ءاسيا امانباەۆا. باتىس قازاقستان وبلىسىندا سپورتتىڭ 77 ءتۇرى دامىپ كەلەدى. ونىڭ 32-ءسى وليمپيادالىق سپورت تۇرىنە كىرەدى. سونداي-اق بالالار-جاسوسپىرىمدەر سپورت مەكتەپتەرىندە 47 سپورت ءتۇرى جۇمىس جاسايدى. ونىڭ 30-ى – اۋىلدىق جەردە.وڭىردەگى ءبىر جاڭالىق – 2017 جىلدىڭ سوڭىنان باستاپ سپورت تۇرلەرىن سارالاۋ جۇيەسى ىسكە قوسىلدى. بۇل جۇيەنىڭ باستى ماقساتى سىبايلاس جەمقورلىقتىڭ الدىن الىپ,
بولىنگەن قارجىنىڭ اشىقتىعىن كورسەتۋ جانە سپورتشىلاردىڭ دايىندىعىن جۇيەلەۋ. وسى ارالىقتا ءوڭىر سپورتشىلارى قاتىساتىن جارىستار بىرىزدەندىرىلدى. سپورت تۇرىمەن اينالىسۋشىلار سانى, ماتەريالدىق بازاسىنىڭ بولۋى, باپكەرلىك قۇرامنىڭ تولىقتىعى جانە جەتىستىگىنە قاراي سارالانىپ, «ا», «ۆ», «س» توبىنا ءبولىندى. «بۇل جۇيە قازىردىڭ وزىندە جەمىسىن بەردى. ەڭ باستىسى جۇيەسىزدىكتەن قۇتىلدىق. سونداي-اق باپكەرلەر قۇرامى دا جىلىنا نەشە جارىسقا باراتىنىن جوسپارلاپ, شاكىرتتەرىنىڭ بابىن قاداعالاۋعا مۇمكىندىك الدى», دەيدى باسقارما باسشىسى.
وبلىس بويىنشا سپورت ۇيىمدارىندا 569 جاتتىقتىرۋشى قىزمەت اتقارادى. ونىڭ 316-سى اۋىلدىق جەردەگى 23 بالالار-جاسوسپىرىمدەر سپورت مەكتەبىندە اۋىل بالالارىنا قىزمەت ەتەدى. اۋىل سپورتىنا كوڭىل ءبولىنىپ, جۇيەلى جۇمىس ءجۇرۋىنىڭ ناتيجەسىندە ولارعا سپورتتىق رازرياد بەرىلۋى ارتتى. ايتا كەتسەك, بوكەي وردا اۋدانى 2017 جىل بويى بار-جوعى 13 سپورتتىق رازرياد الىپ, ەڭ تومەن ورىندا بولسا, 2018 جىلى 179 سپورتتىق رازرياد بەرىلىپ, وبلىستاعى ەڭ جوعارعى كورسەتكىشكە قول جەتكىزدى.اۋىل سپورتى دەمەكشى, بىلتىر اقجايىق اۋدانىندا تاەكۆوندو, گرەك-ريم, دوپتى حوككەي بولىمشەلەرى اشىلسا, ءبورلى اۋدانىندا دوپتى حوككەي, شاڭعى سپورتى, جەڭىل اتلەتيكا, بوكەي ورداسى اۋدانىندا اسىق اتۋ, جانىبەك اۋدانىندا بوكس جانە اۋدارىسپاق بولىمشەلەرى, جاڭاقالا اۋدانىندا ۇلتتىق سپورت تۇرلەرى, جەڭىل اتلەتيكا, ەركىن كۇرەس, قازتالوۆ اۋدانىندا ەركىن كۇرەس, دزيۋدو, بايتەرەك اۋدانىندا سپورتتىق باعدارلاۋ, قول كۇرەسى, تاسقالا اۋدانىندا بادمينتون, ۇلتتىق جەكپە-جەك بولىمشەلەرى, تەرەكتى اۋدانىندا قول دوبى, دوپتى حوككەي, سىرىم اۋدانىندا ۆولەيبول, قول كۇرەسى, شىڭعىرلاۋ اۋدانىندا دوپتى حوككەي, فۋتبول, ورال قالاسىندا ساداق اتۋ, بەلبەۋ كۇرەسى, ترياتلون بولىمشەلەرى اشىلدى. بۇل سپورت تۇرلەرىنە 1000-عا جۋىق بالا تارتىلعان.
بۇگىنگى تاڭدا وبلىستا قازاقستان رەسپۋبليكاسىنىڭ ۇلتتىق قۇراما ساپىنا ەنگەن 433 سپورتشى بار. ولاردىڭ 350-ءى – جازعى, 83-ءى – قىسقى سپورت تۇرلەرىنەن.
جالپى 2018 جىلى وبلىس سپورتشىلارى سپورت تۇرلەرى بويىنشا رەسمي رەسپۋبليكالىق جانە حالىقارالىق جارىستاردا, اتاپ ايتقاندا, الەم, ازيا, قازاقستان رەسپۋبليكاسىنىڭ چەمپيوناتتارىنان 647 مەدال جەڭىپ العان. ونىڭ 218-ءى – التىن بولسا, 178-ءسى – كۇمىس, 251-ءى – قولا. ال بيىلعى جىلدىڭ بەس ايىندا سپورتشىلارىمىز بارلىعى 572 مەدال جەڭىپ ۇلگەردى. ولاردىڭ 215-ءسى – التىن, 153-ءى – كۇمىس, 204-ءى – قولا.
– جوعارى جەتىستىكتەر سپورتىنىڭ الداعى باستى جوسپارى – 2020 جىلى توكيو قالاسىندا وتەتىن ءحححىى جازعى وليمپيا ويىندارىنا ليتسەنزيا ۇتىپ الۋ. بۇگىندە وبلىستا توكيوعا بارادى دەگەن 14 ۇمىتكەر بار. ولار – بايداركا مەن كانوە ەسۋ شەبەرلەرى الەكسەي دەرگۋنوۆ پەن اندرەي ەرگۋچەۆ, اكادەميالىق ەسۋ سپورتىنىڭ بىلگىرلەرى ەۆگەني تاتسەي مەن دانيل ساۆچەنكو, ساداقشى اناستاسيا باننوۆا, الينا يلياسوۆا جانە ءاليحان مۇستافين. وليمپيا ويىندارىنىڭ قولا جۇلدەگەرى ەكاتەرينا لاريونوۆا دا ءوزىنىڭ ەكىنشى وليمپياداسىنا بارعىسى كەلەدى. سونداي-اق دزيۋدوشى اڭساربەك عاينۋللين مەن تەمىرلان كولباي دا ەل نامىسى سىنعا تۇسەر شاقتا ايانىپ قالمايتىنى انىق. جەڭىل اتلەتتەرىمىز گريگوري شەيكو مەن پولينا رەپينانىڭ دا وليمپيا ويىندارىندا ەل نامىسىن قورعاي الاتىنداي قاۋقارى بار. ۇستەل تەننيسىنىڭ شەبەرلەرى گۋلچيحرا حۋسەينوۆا مەن ايدوس كەنجەعۇلوۆ وليمپيادا جولداماسىن الار دەگەن سەنىم مول, – دەيدى ءاسيا راحىمقىزى قوشتاساردا.
باتىس قازاقستان وبلىسى