وبلىس ورتالىعىنا جاقىن, جايىق وزەنىن جاعالاي ورنالاسقان اۋداندا 15 اۋىلدىق وكرۋگ, 52 ەلدى مەكەن, 38 مىڭنان اسا تۇرعىن بار. وسى حالىقتىڭ 60 پايىزى, ياعني 22 603 ادام ەكونوميكالىق بەلسەندى تۇرعىندارعا جاتادى. ولاردىڭ دەنى اۋىل شارۋاشىلىعى, كاسىپكەرلىك سالالارىندا ەڭبەك ەتىپ, ءوزىنىڭ دە, ەلدىڭ دە ەكونوميكالىق دامۋىنا ۇلەس قوسىپ ءجۇر.
ارينە ەل ىشىندە ءتۇرلى تاعدىر كەزدەسەدى. ءارتۇرلى سەبەپپەن جاعدايى ناشار, اۋقاتى تومەن بولعان وتباسىلار دا بار. ەرتە زاماندا مۇنداي ادامدارعا اۋىل اقساقالدار, ەل اعالارى, ءتىپتى اۋىل بولىپ كومەكتەسەتىن. جەتىمدى جەبەپ, جالعىزدى دەمەپ, باسىنا ءۇي ءتىگىپ, الدىنا مال جيىپ بەرگەن وقيعالاردى كونە اڭگىمەلەردەن تالاي ەستىدىك. بۇگىندە بۇل فۋنكتسيانى مەملەكەت اتقارادى.
– كۇنى بۇگىن تەرەكتى اۋدانىندا 431 ادام رەسمي تۇردە جۇمىسسىز رەتىندە تىركەلگەن. ال مەملەكەتتەن اتاۋلى الەۋمەتتىك كومەك الاتىندار سانى اۋدان بويىنشا 847 وتباسى. بۇل وتباسىلاردا 4216 ادام تۇرىپ جاتىر. سونىڭ 2435-ءى – جاسى 18-گە تولماعان بالالار, – دەيدى تەرەكتى اۋداندىق جۇمىسپەن قامتۋ جانە الەۋمەتتىك باعدارلامالار ءبولىمى باسشىسىنىڭ مىندەتىن اتقارۋشى ءاليما لۇقپانوۆا.
ءاليما ابىلايقىزىنىڭ ايتۋىنشا, جوعارىداعى توپتىڭ ىشىندە 239 شاڭىراق كوپ بالالى وتباسى سانالادى. ياعني, بۇل ۇيلەردە 4 جانە ودان دا كوپ بالا تاربيەلەنىپ جاتىر.
مىنە, وسىنداي جۇمىسسىز ءجۇرگەن تەرەكتىلىكتەردى سۇرانىسقا يە ماماندىقتارعا وقىتۋ, كاسىپكەرلىككە باۋلۋ اۋداندا جاقسى جولعا قويىلعان. بۇل كومەك ەڭ الدىمەن اتاۋلى الەۋمەتتىك كومەك الۋشى وتباسى مۇشەلەرىنە ۇسىنىلادى. بيىلدىڭ وزىندە وسىنداي وتباسىلاردان 37 ادام اقىلى قوعامدىق جۇمىسقا, 8 ادام الەۋمەتتىك جۇمىسقا, 1 ادام جاستار ءتاجىريبەسىنە تارتىلىپتى. 9 ادام قىسقا وقىتۋ كۋرستارىنا جولدانعان.
2018 جىلى «ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋ» باعدارلاماسى اياسىندا اۋدان بويىنشا 365 397 000 تەڭگەگە 96 نەسيە بەرىلگەن ەكەن. ال «باستاۋ بيزنەس» باعدارلاماسى تىڭداۋشىلارى 289 645 000 تەڭگەگە 74 نەسيە العان. بۇدان بولەك «اۋىل شارۋاشىلىعىن قارجىلاي قولداۋ قورى» ارقىلى 249 145 000 تەڭگەگە 64 نەسيە, «اگرارلىق نەسيە كورپوراتسياسى» اق-ى ارقىلى 40 500 000 تەڭگەگە 10 نەسيە بەرىلگەن. 2019 جىلدىڭ 5 ايىندا اۋدان بويىنشا جالپى كولەمى 24 000 000 تەڭگەنىڭ 5 نەسيەسى يەسىن تاۋىپتى. مۇنىڭ ءبارى ءوز كاسىبىن ءوسىرىپ, وركەندەتەم دەگەن اۋىل تۇرعىنى ءۇشىن ناقتى كومەك ەكەندىگى ءسوزسىز.
ءبىر ءتاۋىرى, مەملەكەتتىڭ كومەگىن ورايىمەن پايدالانىپ, ناقتى كاسىپكە اينالدىرعان وتباسىلار دا كوبەيىپ كەلەدى ەكەن. سولاردىڭ ءبىرى – توقتاروۆتار وتباسى تۋرالى ءا.ابىلايقىزى ءسۇيسىنىپ ايتادى.
ءيا, بارباستاۋ اۋىلىندا تۇراتىن توقتاروۆتار وتباسىندا جيىرمانىڭ ۇستىندە جان تۇرادى ەكەن. اۋلەتتىڭ ۇلكەنى جۇما اپاي – ءۇش بالاسىنىڭ وتباسىن ءبىر شاڭىراق استىندا تاتۋ-ءتاتتى ۇستاپ وتىرعان بەرەكەلى بايبىشە بولىپ شىقتى. كەلىندەرىنىڭ ءبىرى گۇلايمان – جەتى بالانىڭ, ال سامانتا – بەس بالانىڭ اناسى ەكەن.
– ۇكىمەتتەن اتاۋلى الەۋمەتتىك كومەك العاندا ابدەن قۋاندىق. ءبىرىنشى العان سوما قوماقتى بولدى. ۇيدە اقىلداسا كەلىپ, اقشانى بوسقا شاشپاي, مال الايىق دەدىك. ءسويتىپ, ارقايسىسىن 170 مىڭنان ەكى تانا الدىق. ەكىنشى ايدىڭ اقشاسى كەلگەندە ويلانباستان ءۇش بۇزاۋ الدىق. باعىپ وتىرعان قاز-ۇيرەكتىڭ بالاپانى تاعى بار. ۇكىمەت بالالارعا كومەك بەرىپ تۇرعان كەزدە سولارعا ازىق-ناپاقا, ەت-ءسۇت بولاتىن مال جيناپ الساق, الداعى ۋاقىتتا ەشكىمگە الاقان جايماس ەدىك, – دەيدى جۇما اپاي. جۇما اپايدىڭ نەمەرەلەرىنىڭ ەڭ ۇلكەنى ستۋدەنت بولسا, ەڭ كىشىسى قىرقىنان دا شىقپاعان ءسابي. تاتۋلىعى جاراسقان وتباسى مۇشەلەرىنىڭ ءارقايسىسى ءوز قولىنان كەلەتىن ءمىندەتتى ءبولىسىپ الىپ, شارۋانى دوڭگەلەتىپ وتىر. كىشكەنتاي ناريمان باتىردىڭ ءوزى قولىنا شىبىعىن الىپ, قاز باعادى. ۇلكەندەر اۋلادا جاڭا ءۇيدىڭ قۇرىلىسىن باستاپ كەتكەن... P.S. وتكەندە باتىس قازاقستان وبلىسى اكىمى جانىنداعى ينۆەستيتسيالىق كەڭەستىڭ كەزەكتى وتىرىسى بولعاندا تەرەكتى اۋدانىنىڭ اكىمى ءادىل جولامانوۆ ارنايى بايانداما جاسادى. وسى باياندامادا اقسۋات اۋىلدىق وكرۋگىندە يندۋستريالىق ايماق سالىناتىنى حابارلاندى. 281 گا جەردى الىپ جاتقان بۇل ايماقتا ماشينا جاساۋ, بىلعارى وڭدەۋ, توقىما ءوندىرىسى, قۇرىلىس ماتەريالدارى, جيھاز, ءتىپتى رەزينا مەن پلاستماسس ءوندىرىسى دە جولعا قويىلماق. ارينە بۇل وبلىستىق دەڭگەيدە قولعا الىنعان ءىرى جوبا ەكەنى ءتۇسىنىكتى. ءبىراق مۇنىڭ يگىلىگى الدىمەن جەر يەلەرى – تەرەكتى اۋدانى تۇرعىندارىنا دا تيەتىنى ءسوزسىز.