توتەنشە جاعدايدان زارداپ شەككەن ارىس قالاسىنا ەلىمىزدىڭ ءار ايماعى قول ۇشىن سوزىپ, قايعى مەن قيىندىقتى ءبولىسىپ الىپ كەتتى. سونىڭ ءبىر كورىنىسىندەي, ارىس قالاسىنداعى ورتا مەكتەپتەردىڭ 50 وقۋشىسى باتىس قازاقستان وبلىسىنا دەمالۋعا كەلدى. ولاردى ورال تەمىرجول ۆوكزالىنان «دارىن» قوسىمشا ءبىلىم بەرۋ ورتالىعىنىڭ ديرەكتورى گۇلسىم عابدۋلعازيزقىزىنىڭ ءوزى قارسىلاپ الدى.
ارىس بالالارى ون كۇن بويى دەمالاتىن بۇل لاگەر – ەرەكشە ورىن. تابيعاتتىڭ اسەم مۇيىسىندە ورنالاسۋىنان بولەك, لاگەردە وقۋشىلار قازاق, ورىس, اعىلشىن تىلدەرىن ۇيرەنىپ, شەتەلدىك دوستار تابادى. شەتەلدىك دەپ وتىرعانىمىز, رەسەي فەدەراتسياسىنىڭ سامارا وبلىسىندا تۇراتىن قانداستارىمىزدىڭ «اقجول» ايماقتىق قازاق ۇلتتىق-مادەني اۆتونومياسى رەسەيلىك قازاق بالالارىن جازعى كانيكۋل كەزىندە اتاجۇرتقا جىبەرۋدى داستۇرگە اينالدىرعان. بۇل جولى ولاردىڭ قايماعى بۇزىلماعان تۇركىستاندىق بالالارمەن بىرگە دەمالۋى ەكى جاققا دا پايدالى بولارى انىق.
- ارىستان كەلگەن بالالاردىڭ جازعى دەمالىسىن ۇيىمداستىرۋعا «جايىق مۇناي گاز» جشس, «»اقجايىق» فۋتبول كلۋبى, «ريامير», «Kinoplexx West» جشس-لارى, «ورال زەنيت زاۋىتى» اق, باتىس قازاقستان وبلىستىق قازاقستان حالقى اسسامبلەياسى جانە قادىر مىرزا ءالي اتىنداعى مادەنيەت جانە ونەر ورتالىعى دەمەۋشىلىك كورسەتتى, - دەيدى وبلىستىق ءبىلىم باسقارماسىنىڭ ءباسپاسوز حاتشىسى ءۇمىت جاڭگىروۆا.
ارىستىق جانە رەسەيلىك وقۋشىلار وسى كۇندەرى ورال قالاسىنىڭ كورنەكى جەرلەرىن ارالاپ, مۋزەيلەرمەن دە تانىسادى.
باتىس قازاقستان