– وبلىس وڭىرىندە بي-اعانىڭ اتىمەن 22 كوشە, 4 مەكتەپ, 1 اۋىل, 1 ستانسا جانە 1 مۋزەي اتالادى. بەيىمبەت مايليننىڭ تۋعانىنا 125 جىل تولۋى قارساڭىندا بيىل 24 ماۋسىمدا پرەزيدەنت قاسىم-جومارت توقاەۆ تاران اۋدانىن بەيىمبەت مايلين ەسىمىمەن اتاۋ تۋرالى جارلىققا قول قويدى. بي-اعانىڭ مەرەيتويىنا وراي وبلىستا كوپتەگەن شارا بەلگىلەنگەن, ءمۇشايرا سول تويدىڭ باسى دەپ بىلىڭىزدەر, – دەدى گۇلجان ەرماشقىزى.
وتكەن عاسىردىڭ باسىنداعى قازاق ادەبيەتىندە بي-اعا قالام تارتپاعان جانر كەمدە-كەم. سوندىقتان بي-اعانىڭ تويىن جىر بايگەسىنىڭ باستاۋى دەۋ زاڭدى دا ەدى. مۇشايراعا تۇسكەن 30 جۇمىستان ىرىكتەلىپ, جامبىل, اقتوبە, الماتى, باتىس قازاقستان, پاۆلودار, تۇركىستان, قوستاناي وبلىستارىنان, نۇر-سۇلتان قالاسىنان 12 اقىن قاتىستى.
جىر دەسە ىشەر اسىن جەرگە قويىپ, سۋساپ وتىراتىن قوستانايلىقتار ون ەكى جاس اقىننىڭ ولەڭىن تىڭدادى. اقىندار ۇلى دالا پەرزەنتتەرى, بي-اعا اڭساعان تاۋەلسىزدىك, ۇلتتىڭ ۇلى مۇرالارى مەن مۇراتتارىن ولەڭ ورنەگىنە اينالدىرا ءبىلىپتى. جۇيرىكتەن جۇيرىك وزۋ – بايگەنىڭ سالتى. جازۋشى عۇمار احمەتچين باستاعان قازىلار القاسىنىڭ شەشىمىمەن ءۇشىنشى ورىندى نۇر-سۇلتان قالاسىنان كەلگەن جۇلدىزاي ىسقاقوۆاعا, ەكىنشى ورىندى اقتوبەلىك گ ۇلىماي قۋانىشەۆاعا, ءبىرىنشى ورىندى رۋدنىي قالاسىنان قاتىسقان عالىمكەرەي كەنجەبوزينگە بەردى. ال ءمۇشايرانىڭ باس جۇلدەسىن نۇر-سۇلتان قالاسىنان كەلگەن اقىن ءابىلماجىن سەرىكباي جەڭىپ الدى. سونىمەن قاتار مۇشايراعا ليساكوۆ قالاسىنان بەيىمبەت مايلين تۋرالى ولەڭىن جولداعان 84 جاستاعى ءمور تىلەۋباەۆا قارياعا دا قۇرمەت كورسەتىلدى.
بەيىمبەت ءمايليننىڭ ۇرپاقتارى, جيەن نەمەرەلەرى ءدامەتەر سەيىتجانوۆا, سالتانات مۇستافينا ءمۇشايرانىڭ قوناعى بولدى. اقىندار مەن بي-اعانىڭ نەمەرە, شوبەرە, شوپشەكتەرى ونىڭ كىندىك قانى تامعان بەيىمبەت اۋدانىنا, جالشى اۋىلىنا بارىپ, اتا رۋحىنا تاعزىم ەتتى. ءمۇشايرا سوڭىندا ءسوز العان جازۋشى عۇمار احمەتچين بي-اعا رۋحىن ۇلىقتاۋدا ەسكەرىلەر ماسەلە دە جوق ەمەس ەكەنىن ايتتى.
– تاۋەلسىزدىك العان 28 جىل ىشىندە ەلىمىزگە بەلگىلى بي-اعانىڭ شىعارمالارىنا قانىق ادامداردىڭ بارلىعى دا ونىڭ ەسىمى تاران اۋدانىنا بەرىلسە ەكەن دەگەن نيەتتە ەدى, ونىڭ قابىل بولعانىنا شۇكىرلىك ەتەمىز. قوستانايدا بەيىمبەت ءمايليننىڭ مۋزەيىن اشۋ تۋرالى حاتقا بۇدان ءبىراز جىل بۇرىن حالقىمىزدىڭ ءىرى تۇلعالارى, زيالىلارى: مۇزافار الىمباەۆ, زەينوللا قابدولوۆ, ءابدىجامىل نۇرپەيىسوۆ, سەرىك قيراباەۆ, تۇرسىنبەك كاكىشەۆ, تۇمانباي مولداعاليەۆ, ءومىرزاق سۇلتانعازين, كەڭەس نۇرپەيىسوۆ, گەرولد بەلگەر, شەريازدان ەلەۋكەنوۆ, جۇماعالي ىسماعۇلوۆ, عابباس قابىشەۆ قول قويعان. گەرولد اعامىز ورىس تىلىندە جازعان «بي-اعانىڭ ءومىرى مەن قىزمەتى تۋرالى» دەگەن ماقالاسىندا: «بي اعانىڭ تۋعان جەرىندە, قوستانايدا ونىڭ مۋزەيى جوق. ال تاران اۋدانىنداعى مەن كورگەن مۋزەيدى مۋزەي دەپ ايتۋ قيىن. كەش بولماي تۇرعاندا ادىلەتتىلىكتى ورنىنا كەلتىرۋ ءبىزدىڭ پرەزيدەنتىمىز باستاعان, ۇكىمەتىمىز جاساپ, قابىلداعان «مادەني مۇرا» باعدارلاماسىنىڭ جۇزەگە اسۋ كورىنىسىنىڭ ءبىرى بولار ەدى. قوستانايعا مۋزەي كەرەك, ايتپەسە ول ءبىزدىڭ تاريحىمىزعا, ۇلتتىق رۋحاني مۇرامىز جانە قازاق حالقىنىڭ داڭقتى ۇلدارىنىڭ ءبىرى بەيىمبەتكە دەگەن قۇرمەتتىڭ جوقتىعى بولادى» دەپ جازعان ەكەن. گەرولد بەلگەردەن اسىرىپ ايتا المايمىز. بي-اعانىڭ بيىلعى مەرەيتويى جىلى وسى تىلەك جۇزەگە اسسا قۇبا-قۇپ بولار ەدى, – دەدى عۇمار عاريف ۇلى.
بۇل كەمنىڭ ورنى تولسا, رۋحاني دۇنيەمىز دە تولىعا بەرمەك تە.
قوستاناي