بۇگىن «نازارباەۆ زياتكەرلىك مەكتەپتەرى» دەربەس ءبىلىم بەرۋ ۇيىمىندا تۇڭعىش رەت شەتەلدەگى قازاق بالالارىنا ارنالعان « ۇلى دالا ۇرپاعى» دەگەن اتپەن جازعى مەكتەپ اشىلدى. ءۇش جاقتىڭ كۇش سالۋىمەن اشىلعان لاگەردە رەسەي, يران, موڭعوليا, تۇرىكمەنستان, تاجىكستان, وزبەكستان جانە قىرعىزستان سياقتى ەلدەردەن كەلگەن 150 جەتكىنشەك ەكى اپتا بويى قازاقستان تاريحى, ۇلتتىق ءان-بي, سالت-داستۇردەن جانە تۋعان تىلدەن ءدارىس الادى.
«بۇل ءبىزدىڭ «وتانداستار قورى» جانە دۇنيەجۇزى قازاقتارى قاۋىمداستىعىمەن ءبىرلەسىپ قولعا العان تۇڭعىش جوبامىز. شەتەلدەگى قازاق بالالارىنا قازاق ءتىلىن, قازاقستاننىڭ تاريحىن وقىتۋعا اكادەميالىق قولداۋ كورسەتىپ قانا قويماي سالت-داستۇرلەرىمىزدى كورسەتەتىن, ۇلتتىق قولونەرىمىزبەن تانىستىراتىن ءۇيىرمەلەر ۇيىمداستىرىپ وتىرمىز. ەڭ باستىسى تاۋەلسىزدىك العاننان بەرگى ەلىمىزدىڭ جەتىستىگىن, ەلوردامىز نۇر-سۇلتان قالاسىنىڭ دامۋىن جانە قۇلاشىن كەڭگە جايعان قازاقستانداعى ءبىلىم بەرۋ سالاسىنىڭ مۇمكىندىكتەرىن كورسەتۋدى ماقسات تۇتتىق. نازارباەۆ زياتكەرلىك مەكتەپتەرىندە تاربيە جۇيەسىنە ارنالعان كونتسەپتسيا بار. سونىڭ نەگىزىندە ۇلتتىق قۇندىلىقتارىمىزعا باعىتتالعان ۇيىرمەلەر جۇمىس ىستەيدى. بۇل جولى شەتەلدەن كەلگەن 150 بالا مەن ءوز مەكتەبىمىزدىڭ 50 وقۋشىسى ۇلتتىق اسپاپتار, ۇلتتىق قولونەر/ارت-ديزاين, روبوتوتەحنيكا, اەروعارىش, دراما سياقتى كوپتەگەن ۇيىرمەلەرگە قاتىسادى. باعدارلاماعا قازاقتىڭ «100 كۇيى», «100 ءانى» بويىنشا ءان مەن كۇيدىڭ تاريحى دا ەنگىزىلدى. بۇدان بولەك حيميا, بيولوگيا, ماتەماتيكا, فيزيكانى بىرىكتىرىپ وقىتاتىن STEM باعدارلاماسى بويىنشا كەڭەيتىلگەن زەرتحانالىق جۇمىستارعا دا قاتىسادى. بالالار ەل استاناسىنداعى بارلىق مادەني, تاريحي نىساندارمەن تانىساتىن بولادى. سونداي-اق ولاردى «بۋراباي» مەملەكەتتىك ۇلتتىق تابيعي ساياباعىنا, «بوتاي-بۋراباي» اسپان استى مۇراجايىنا جانە «الجير» مەموريالدى-مۇراجاي كەشەنىنە اپارامىز. ۇيىرمەلەر تەك قازاق تىلىندە جۇرەدى. سوندىقتان پارسى جانە ورىس ءتىلىنىڭ اۋدارماشىلارىن دا الدىق. ءتىپتى بەس ۋاقىت بەرىلەتىن تاماقتارعا دا ۇلتتىق تاعامدار ءتۇرىن تاڭدادىق», دەيدى نازارباەۆ زياتكەرلىك مەكتەپتەرىن دامىتۋ دەپارتامەنتىنىڭ ديرەكتورى جۇلدىز سۇلەيمەنوۆا.
بۇل جولى الەمنىڭ ءار قيىرىنان قازاق ەلىنىڭ باس قالاسىندا باستارى قوسىلعانداردىڭ كوپشىلىگى اتاجۇرت توپىراعىنا تابانى تۇڭعىش تيگەندەر بولىپ شىقتى. نۇر-سۇلتانعا يراننان ەلىمىزدىڭ باتىس وبلىستارى ارقىلى جەتكەن 15 جاستاعى الانياز شادكام جول بويى تۇمسا تابيعات پەن ءوز ۇلتىنىڭ دارقاندىعىنا ءتانتى بولعان تەبىرەنىسىن تولقىپ تۇرىپ جەتكىزدى. اۋىلداعى اجەسىنىڭ اتاجۇرتقا سالەمىن امانات ەتىپ ارقالاپ كەلگەن بالا بولاشاعىن تاريحي وتانىمەن بايلانىستىرعىسى كەلەتىنىن دە جاسىرمادى. يراننان كەلگەن 15 جاستاعى ءرابيا ديۆال «مەن اتاجۇرتقا ءبىرىنشى رەت كەلىپ تۇرمىن. قازاق جەرىنە كەلگەندە ءوزىمدى جانناتقا كىرىپ بارا جاتقانداي كۇيدە سەزىندىم. مەنىڭ اتا-بابام وسىندا ءومىر سۇرگەن. ال مەن يرانعا قالاي كەتتىم؟ سونى ءبىلۋ ءۇشىن, ءوزىمدى تانۋ ءۇشىن كەلدىم. مەن قازاق بولىپ تۋعانىما قۋانامىن جانە قايدا جۇرسەم دە قازاق بولىپ قالامىن. ءوزىم الىستا, يراندا بولعانىممەن قازاقستان جۇرەگىمنىڭ تورىنەن ورىن العان. باسقا ەلدەن كەلگەن قاتارلاستارىممەن تانىسقانىما وتە قۋانىشتىمىن. مەكتەپ ءبىتىرگەن سوڭ استاناعا كەلىپ وقىعىم كەلەدى», دەيدى.
بۇل شەتەلدەگى قازاق بالالارىنا ارنالعان وسى جازداعى جۇمىستىڭ ءبىر پاراسى عانا. «اقمولا وبلىسى زەرەندى كەنتىندە ءوتىپ جاتقان «زەرەن-2019» رەسپۋبليكالىق تانىمدىق جاستار لاگەرىنە جالپى 30 جاس قاتىساتىن بولسا, «تۋعان ەلگە ساياحات» بالالار تۋريستىك پويىزى جوباسى اياسىندا ەلىمىزدىڭ 5 قالاسىن وتاربامەن ارالاپ وتكەن 200 بالانىڭ 25-ءى شەتەلدىك قازاق بالا. 28 شىلدە كۇنى بۋرابايداعى «بالداۋرەن» رەسپۋبليكالىق بالالار لاگەرىنە قانداستارىمىزدىڭ 300-گە جۋىق بالاسى اتتانادى», دەدى «وتانداستار قورى» كەاق ۆيتسە-پرەزيدەنتى ماعاۋيا سارباسوۆ.
بۇدان بولەك «وتانداستار قورى» كەاق شەتەلدەگى قازاق جاستارى ءۇشىن «Jas Qazaq» كلۋبىن قۇرماق. بۇل قۇرىلىمنىڭ مىندەتى – جاس بۋىنعا قازاقتىڭ ءتىلى مەن ءداستۇرىن ۇيرەتۋ. ول قاشىقتىقتان ينتەراكتيۆتىك سىنىپتار اشۋ, ءتىل ۇيرەتۋگە ارنالعان موبيلدى قوسىمشالار جاساۋ, قازاقستاندىق وقۋ ورىندارىمەن بىرلەسىپ قازاق ءتىلى مۇعالىمدەرىنە ارنالعان ينتەرنەت پلاتفورما قۇرۋ جانە ادىستەمەلىك قۇرال ازىرلەۋ سياقتى جولدارمەن ىسكە اسپاق. كەلەسى ءبىر ىرگەلى جوبا – شەتەلدەگى قازاقتار ءۇشىن «Qazaq uyi» جانە «اباي» مادەني ورتالىقتارى, «اتامەكەن» ىسكەرلىك ۇيلەرىن اشۋ. بۇل قانداستارىمىزدىڭ قازاق ۇلتىنىڭ قادىر-قاسيەتىن ۇعىنىپ, سالت-ءداستۇرىن بويىنا سىڭىرۋىنە كومەكتەسەدى.
مايگۇل سۇلتان,
«Egemen Qazaqstan»