جاقىندا سيزيكوۆتەر اۋلەتى كۇتپەگەن قۋانىشقا كەنەلدى. وسى تەكەلىدەگى «فيرما سمر» سەرىكتەستىگىنىڭ باسقارۋشى ديرەكتورى جانبولات ءپىرجانوۆ ولارعا 4 بولمەلى باسپانانىڭ كىلتىن سىيلادى. ءۇيدىڭ ءتيىستى قۇجاتتارىن وتاعاسى الەكساندردىڭ قولىنا تابىستاعان كاسىپكەر:
- مۇقتاج وتباسىعا كومەك قولىن سوزىپ, ولاردىڭ باقىتتى جۇزدەرىن كورۋ مەن ءۇشىن ۇلكەن قۋانىش. مۇمكىندىك باردا كوپبالالى وتباسىلارعا كومەكتەسۋ كەرەك. بارشا كاسىپكەرلەر مەن قالتالى ازاماتتاردى وسىنداي يگى ىستەر جاساۋعا شاقىرامىن, -دەدى.
ال تەكەلى قالاسىنىڭ اكىمى باقتيار ونەرباەۆ قايىرىمدى كاسىپكەرلەر تاراپىنان كوپبالالى وتباسىلار مەن از قامتىلعان اۋلەتتەرگە ۇنەمى قامقورلىق جاسالىپ وتىرعانىن ايتادى. اسىرەسە, باسپانا زاردابىن تارتىپ وتىرعان وتباسىلارعا جەكە قارجىسىنا باسپانا ساتىپ الىپ بەرۋگە بەيىل كاسىپكەرلەردىڭ قاتارى ءوسىپ كەلەدى ەكەن. شاعىن قالادا وسىمەن ءۇشىنشى كاسىپكەر مۇقتاج اۋلەتكە تۇرعىن ءۇي كىلتىن تارتۋ ەتتى. جاقىندا وسى قالادا تۇراتىن كوپبالالى ماقپال كۇزدىكباەۆاعا دا جەرگىلىكتى كاسىپكەرلەر 3 بولمەلى ءۇي ساتىپ الىپ بەرگەن ەدى. ودان ءسال ارىدا قونىس تويىن «كۇمىس القالى» جاس انا نازگۇل كۇجەكەەۆا تويلاعان بولاتىن.
- بۇل ءبىزدىڭ قالادا كاسىپكەرلەردىڭ قولداۋىمەن سىيلانعان ءۇشىنشى ءۇي. سونداي-اق رەسپۋبليكالىق جانە وبلىستىق بيۋدجەتتەن كوپبالالى وتباسىلارعا ءۇي ساتىپ الۋ ءۇشىن ارنايى قاراجات بولىنگەن. بۇگىندە بىرنەشە ءۇي ساتىپ الىنىپ, قۇجاتتارى راسىمدەلۋدە. جالپى, تەكەلىدە 415 كوپبالالى وتباسىلار تىركەلگەن. ونىڭ ءجۇز جەتپىسى ۇيگە مۇقتاج بولسا, 96 وتباسى كەزەكتە تۇر. جاقىن كۇندەرى وسى كەزەك بويىنشا ءۇي بەرىلە باستايدى. بۇل باعىتتا جۇمىس ءالى دە جالعاسادى, -دەيدى باقتيار ونەرباەۆ.
جالپى, قايىرىمدىلىق كومەك كورسەتۋ مەيىرباندىق, دەمەۋشىلىك جانە مەتسەناتتىق قىزمەت تۇرىندەگى ءوز ەركىمەن, وتەۋسىز نەمەسە جەڭىلدىك تۇرىندە جۇزەگە اسىرىلاتىن ىزگىلىك قاجەتتىلىكتى قاناعاتتاندىرۋعا نەگىزدەلگەن الەۋمەتتىك-پايدالى قىزمەت ەكەنى داۋسىز. «سىيعا – سىي...» دەگەندەي شاعىن قالاداعى جومارت جانداردىڭ قايىرىمدى ىستەرى ەلەۋسىز قالعان جوق. جاقىندا تەكەلىدە «جومارت جۇرەك» سىيلىعىنىڭ لاۋرەاتتارى ماراپاتتالدى.
- تەكەلى قالاسىندا دا قايىرىمدىلىقپەن اينالىسىپ, قالامىزدى كوركەيتۋمەن قاتار, كوپبالالى وتباسىلارعا, مۇقتاج جاندارعا كومەك قولىن سوزىپ جۇرگەن ازاماتتار از ەمەس. وسى ورايدا «جومارت جۇرەك» سىيلىعىمەن لايىقتى ادامداردى ماراپاتتاۋدى ءجون كوردىك. شارا بارىسىندا بىرقاتار مەتسەناتتارعا العىس حات تابىستاپ, الداعى ۋاقىتتا دا يگى ىستەردىڭ كوشباسىندا ءجۇرىپ, ەل العىسىنا بولەنە بەرۋگە شاقىردىم, - دەيدى تەكەلى قالاسىنىڭ اكىمى.