مينيستر ارىس قالاسىنداعى مەديتسينالىق نىسانداردىڭ احۋالىنا توقتالدى.
«قالالىق ەمحانا مەن اۋرۋحانا دا جارىلىس كەزىندە ب ۇلىنگەن بولاتىن. ۇساق-تۇيەك جوندەۋ جۇمىستارىنان كەيىن ەمحانا قايتا قولدانىسقا بەرىلدى. قازىر جۇمىس ىستەپ تۇر. اپات كەزىندە ناۋقاستاردى ورداباسى اۋداندىق اۋرۋحاناسى مەن تۇركىستانداعى وبلىستىق اۋرۋحانا قابىلداعان بولاتىن. قازىر حالىققا ەم-دوم جاساۋ ءۇشىن قالانىڭ 17 شتابىندا جىلجىمالى مەديتسينا جاساعى, 5 جىلجىمالى كەشەن جۇمىس ىستەپ تۇر», دەدى ەلجان ءبىرتانوۆ.
ونىڭ ايتۋىنشا, ۇكىمەت باسشىسى اسقار مامين ارىسقا جاساعان ساپارىندا قالاداعى ەكى مەديتسينالىق نىساننىڭ جاعدايىمەن ارنايى بارىپ تانىسقان.
«ەمحانانىڭ دا, اۋرۋحانانىڭ دا توزىعى جەتكەنىن اسقار ۇزاقباي ۇلى ءوز كوزىمەن كورىپ, ورنىنا جاڭا عيماراتتار سالۋدى تاپسىردى. قازىردىڭ وزىندە قاجەتتى جوبالىق-سمەتالىق قۇجاتتامالاردى دايىنداپ جاتىرمىز. تەك جاڭا عيمارات سالىنىپ قانا قويمايدى. قوس نىسان دا بارلىق زاماناۋي قوندىرعىلارمەن جابدىقتالادى», دەدى مينيستر.
ايتا كەتسەك, Nur Otan پارتياسى توراعاسىنىڭ ءبىرىنشى ورىنباسارى باۋىرجان بايبەك ارىس قالاسىنا ىسساپارمەن بارىپ, تۇرعىندارمەن كەزدەسكەن بولاتىن.