قازىر قوستانايلىقتار كوبىنە نىسانداردى پۋلتپەن كۇزەتۋ قىزمەتىن كوبىرەك سۇرايدى. اۋدان, قالا ورتالىقتارىندا وتىرعان تۇرعىندارعا دا ۇيالى بايلانىستىڭ قىزمەتىن پايدالانۋعا مۇمكىندىك تۋدى. بيىل كۇزەتتە تۇرعان پاتەرلەر سانى 17,4 پروتسەنتكە كوبەيدى, ياعني 135 پاتەر كۇزەتكە الىندى.
جىل باسىنان بەرى پوليتسەيلەر جەكە مەنشىك كۇزەت ۇيىمدارىنىڭ قىزمەتكەرلەرىمەن بىرىگىپ, كۇزەتكە الىنعان نىساندارداعى 37 ۇرلىققا جول بەرمەدى. 9 قىلمىستىڭ بەتى اشىلدى, 19 اكىمشىلىك ەرەجە بۇزعاندار انىقتالدى. قۇقىق بۇزعان 66 ادام ۇستالدى. تسيفرلاندىرۋ اياسىندا دابىل بەرۋدى موبيلدىك قوسىمشا ارقىلى باسقارۋ كۇزەت قىزمەتىندەگى جاڭا بەلەس بولىپ تابىلادى.
كۇزەت قىزمەتىن باقىلاۋ ءبولىمى ماماندارىنىڭ ايتۋىنشا, قوسىمشا تۇرعىنداردىڭ پلانشەتىنە نەمەسە سمارتفونىنا ورناتىلادى. وسى قوسىمشا ارقىلى پاتەر نەمەسە باسقا دا نىسان يەسى پريبوردى ورناتۋعا, الۋعا, مونيتورينگ جۇرگىزۋىنە بولادى. بۇگىندە وسىنداي قىزمەت تۇرىنە 296 نىسان يەسى قوسىلدى.
دەگەنمەن, پوليتسەيلەر نىساندار مەن پاتەرلەردىڭ قاۋىپسىز قورعالۋى ءۇشىن تۇرعىندار كۇزەت دابىلى قۇرالىن ورتالىق كۇزەتتىڭ پۋلتىنە قوسقانى دۇرىس دەپ سانايدى. بۇل ءوز مۇلكىن ۇرى-قارىدان قورعاۋدىڭ ەڭ ءتيىمدى ءتۇرى.
قوستاناي