سەنات دەپۋتاتى ولگا پەرەپەچينا 1-3 شىلدە ارالىعىندا ماسكەۋدە ءوتىپ جاتقان «پارلامەنتاريزمدى دامىتۋ» ءىى حالىقارالىق فورۋمىنىڭ جۇمىسىنا قاتىستى. بۇل تۋرالى سەناتتىڭ ءباسپاسوز قىزمەتى حابارلادى.
شارانى وتكىزۋ تۋرالى رەسەي مەملەكەتتىك دۋماسى باستاما كوتەرگەن بولاتىن. قاتىسۋشىلار حالىقارالىق قاۋىپسىزدىك پەن تۇراقتىلىقتىڭ, ساندىق ەكونوميكانى دامىتۋدىڭ, جاستار مەن ەكولوگيالىق ساياساتتىڭ وزەكتى ماسەلەلەرىن تالقىلادى. فورۋم اياسىندا «رەسەي-افريكا» پارلامەنتتىك كونفەرەنتسياسىنىڭ شارالارى ءوتتى.
شاراعا 132 مەملەكەتتەن كەلگەن 800-گە جۋىق پارلامەنتشىلەر مەن ساراپشىلار, ولاردىڭ ىشىندە ۇلتتىق پارلامەنتتەردىڭ 41 توراعاسى, سونداي-اق فورۋمعا 14 پارلامەنتارالىق ۇيىمنىڭ دەلەگاتسياسى قاتىستى.