وتىرىسقا كەڭەس توراعاسى – قر پرەمەر-ءمينيسترى اسقار مامين, قر قارجى ءمينيسترى ءاليحان سمايىلوۆ, ۇلتتىق ەكونوميكا ءمينيسترى رۋسلان دالەنوۆ, ۇلتتىق بانك توراعاسى ەربولات دوساەۆ, احقو باسقارۋشىسى قايرات كەلىمبەتوۆ, سونداي-اق كەڭەس مۇشەلەرى: ەۋروپالىق قايتا قۇرۋ جانە دامۋ بانكىنىڭ پرەزيدەنتى سۋما چاكرابارتي, JP Morgan Chase International ديرەكتورلار كەڭەسىنىڭ توراعاسى دجەيكوب فرەنكەل, رەسەي سبەربانكىنىڭ پرەزيدەنتى جانە باسقارما توراعاسى گەرمان گرەف, يسلام دامۋ بانكى توبىنىڭ پرەزيدەنتى باندار حادجار, «ياندەكس» كومپانيالار توبىنىڭ باسشىسى جانە نەگىزىن قالاۋشىلاردىڭ ءبىرى اركادي ۆولوج, Citigroup ينۆەستيتسيالىق جانە كورپوراتيۆتىك بانكىنىڭ ۇكىمەتتەر مەن مەملەكەتتىك سەكتور جونىندەگى جاھاندىق بلوگىنىڭ باسشىسى دجۋلي موناكو.
قاسىم-جومارت توقاەۆ ءوز سوزىندە كەڭەستىڭ جاڭا مۇشەلەرىنە ريزاشىلىعىن ءبىلدىرىپ, شەتەلدىك ينۆەستورلاردىڭ كۇش-جىگەرى مەن قولداۋىنىڭ ارقاسىندا «استانا» حالىقارالىق قارجى ورتالىعىنىڭ (احقو) الداعى جۇمىسىنا نەگىز قالانعانىن اتاپ ءوتتى.
– رەسمي تۇردە ىسكە قوسىلعاننان بەرى ءبىر جىل ىشىندە حالىقارالىق قارجى ورتالىعى بەدەلدى قارجى ورتالىقتارىنىڭ جاھاندىق يندەكسى بويىنشا 37 پوزيتسياعا كوتەرىلىپ, 51-ءشى ورىنعا يە بولدى. احقو تابىستى جۇمىس ىستەۋى ءۇشىن بارلىق جاعداي جاسالعان, قاجەتتى ينفراقۇرىلىم بار. ەندى بىزگە ناقتى ناتيجەلەرگە قول جەتكىزۋ كەرەك, – دەدى مەملەكەت باسشىسى.
قاسىم-جومارت توقاەۆ نۇر-سۇلتان قالاسى الەمگە تانىمال حالىقارالىق قارجى ورتالىعىنا اينالىپ كەلە جاتقانىن اتاپ ءوتتى.
– الەمنىڭ جەتەكشى ساۋلەتشىلەرى ەلوردانىڭ بىرەگەي بەينەسىن جاسادى. ەندى دۇنيەجۇزىنىڭ بەلگىلى قارجىگەرلەرى وسى جەردە تابىستى قارجى ورتالىعىن قالىپتاستىرۋعا اتسالىساتىن كەز كەلدى. ورتالىق قارجى سەكتورىن دامىتۋمەن قاتار, ەكونوميكاعا ينۆەستيتسيالار تارتۋى ءتيىس. احقو بازاسىندا كەلەشەگى زور جوبالاردى قارجىلاندىرۋ جونىندەگى نەگىزگى مامىلەلەر جاسالۋى قاجەت. بۇل جەردە «قازاقتەلەكوم», «قازمۇنايگاز», قتج, «ەير استانا» سىندى ۇلتتىق كومپانيالاردىڭ IPO-سى وتەدى, – دەپ اتاپ ءوتتى قازاقستان پرەزيدەنتى.
وتىرىس بارىسىندا احقو-نىڭ جىلدىق ەسەبى بويىنشا رەسمي تانىستىرىلىمى ءوتتى.