جۇما, 15 ناۋرىز 2013 1:29
ۆەنانىڭ فەدەرالدىق جوعارعى جەر سوتى سۋديا كريستيانا ءدوستاليانىڭ وتكەن جىلعى 17 جەلتوقسانداعى شەشىمىمەن راحات شورازدىڭ (اليەۆ) ارەكەتىنە نەگىزدى كۇمان كەلتىرىپ, ونىڭ قورعاۋشىسى كريستيان لەسكوشەكتىڭ تىنتىلۋىنە قارسى ارىزىن قاناعاتتاندىرمادى. بۇعان قوسا جوعارعى جەر سوتى اليەۆتىڭ باسشىلىعىمەن قازاقستاندا قىلمىستىق توپ قۇرىلعاندىعىن جانە سونىڭ ناتيجەسىندە وزگەنىڭ دۇنيەسىن الاياقتىقپەن تارتىپ العاندىعىن دالەلدەۋدە. سونان كەيىن بۇل ۇرلانعان دۇنيەلەر بىرنەشە ميلليونداعان سوماعا اينالىپ, ەۋروپاعا اۋدارىلعانى بەلگىلى.
جۇما, 15 ناۋرىز 2013 1:29
ۆەنانىڭ فەدەرالدىق جوعارعى جەر سوتى سۋديا كريستيانا ءدوستاليانىڭ وتكەن جىلعى 17 جەلتوقسانداعى شەشىمىمەن راحات شورازدىڭ (اليەۆ) ارەكەتىنە نەگىزدى كۇمان كەلتىرىپ, ونىڭ قورعاۋشىسى كريستيان لەسكوشەكتىڭ تىنتىلۋىنە قارسى ارىزىن قاناعاتتاندىرمادى. بۇعان قوسا جوعارعى جەر سوتى اليەۆتىڭ باسشىلىعىمەن قازاقستاندا قىلمىستىق توپ قۇرىلعاندىعىن جانە سونىڭ ناتيجەسىندە وزگەنىڭ دۇنيەسىن الاياقتىقپەن تارتىپ العاندىعىن دالەلدەۋدە. سونان كەيىن بۇل ۇرلانعان دۇنيەلەر بىرنەشە ميلليونداعان سوماعا اينالىپ, ەۋروپاعا اۋدارىلعانى بەلگىلى.
مىنە, ەندى وسىلايشا التى جىلدان بەرى العاشقى رەت پروتسەسس بارىسىندا اۆستريالىق سوتتىڭ شەشىمى كۇشىنە ەنىپ وتىر. وندا اليەۆكە قارسى قوزعالعان ىستە ساياسي استار جوقتىعى, كەرىسىنشە اۆستريالىق تەرگەۋ ورگاندارىنىڭ انىقتاۋ بازاسىنا ساي نەگىزدەلگەنى كورسەتىلگەن. مۇنىڭ ءبارىن گەرمانيانىڭ وتستاۆكاداعى فەدەرالدىق ىشكى ىستەر ءمينيسترى وتتو شيلي ءسوز قىلادى. ولار اليەۆ 2007 جىلى ءوزىنىڭ كومەكشىلەرىمەن «نۇربانكتىڭ» ەكى مەنەدجەرىن ۇرلاپ اكەتىپ, قيناپ ولتىرگەنىن دە ايتادى. اليەۆ بۇل كەزدە اتالعان بانكتىڭ باستى اكتسيونەرى رەتىندە الگى ەكى مەنەدجەردى اقشا ۇرلادى دەپ كۇدىك كەلتىرگەن بولاتىن. ولاردان قانداي دا بولماسىن ءبىر اقپاراتتى الۋ ءۇشىن اليەۆ ءوزىنىڭ جاندايشاپتارىمەن بىرىگىپ قاماۋداعى بانك مەنەدجەرلەرىن اياۋسىز قيناپ, ءدارى-دارمەكپەن ەستەرىنەن تاندىرىپ, اقىر اياعىندا باستارىنا پوليەتيلەن قابىن كيگىزىپ تۇنشىقتىرىپ ءولتىردى. ال 2011 جىلدىڭ مامىر ايىندا مارقۇمداردىڭ ءمايىتى الماتى قالاسىنداعى, ياعني سول كەزدە اليەۆتىڭ جەر تەلىمىندەگى ءوندىرىستىك قالدىقتاردى تاستايتىن ورىندا كومىلگەن تەمىر بوشكەلەردەن تابىلدى, دەپ جازادى اۆستريالىق باسىلىمدار. ولاردىڭ قازاقستاندىق «نۇر بانكتىڭ» ەكى مەنەدجەرى دەپ وتىرعاندارى تەمىراليەۆ پەن حاسەنوۆتى 2007 جىلدىڭ 31 قاڭتارىندا اليەۆ باسشىلىعىنداعى ۇيىمداسقان قىلمىستىق توپ ۇرلاپ اكەتكەن بولاتىن. بانكيرلەردىڭ دەنەلەرىن سول كەزدە تابۋ مۇمكىن بولماعاندىقتان, ولاردىڭ ءولتىرىلۋى تۋرالى ءىس جەكە وندىرىسكە الىنعان ەدى. وسى ۋاقىتتىڭ ىشىندە ءىس بويىنشا جەدەل-ىزدەستىرۋ شارالارى جۇرگىزىلدى. تەمىراليەۆ پەن حاسەنوۆ مايىتتەرىنىڭ رەميزوۆكا شاتقالىندا كومىلگەنى تۋرالى الىنعان جەدەل اقپاراتقا سايكەس جۇرگىزىلگەن ىزدەستىرۋ شارالارى بارىسىندا اك سالىنعان 200 ليترلىك ەكى بوشكەدەن ءىشىنارا سۇيەكتەرى قالعان مايىتتەر تابىلدى.
بەلگىلەنگەن وندىرىستىك ءىس بويىنشا مولەكۋليارلىق-گەنومدىق ساراپتاۋ قازاقستاندىق, رەسەيلىك ماماندارعا, سونداي-اق گەرمانيا ساراپشىلارىنا تاپسىرىلعان بولاتىن. وسى ساراپتامالار ناتيجەسى تەمىراليەۆ پەن حاسەنوۆتىڭ دەنەلەرى تابىلعانىن ءبىراۋىزدان قۋاتتاپ بەردى. قۇقىق قورعاۋ ورگاندارىنىڭ بىرلەسكەن كۇش-جىگەرىنىڭ ناتيجەسىندە قىلمىس اشىلدى. ءىس بويىنشا جيناقتالعان ايعاقتار قىلمىستىڭ قالاي جاسالعانىن تولىق قالپىنا كەلتىردى. ماسەلەن, ۇرلاۋ كەزەڭىندە تەمىراليەۆ پەن حاسەنوۆ ناۋاي كوشەسىندە ورىن تەپكەن اليەۆتىڭ يەلىگىندەگى رەزيدەنتسياسىندا ۇستالسا, ولار سول جەردە ازاپتاۋ مەن جابىرلەۋگە سالىنعان. ۇرلاۋدىڭ ونىنشى كۇنى, 2007 جىلدىڭ 9 اقپانىندا اليەۆ بانكيرلەردى ليدوكاين سالۋ ارقىلى دارمەنسىز كۇيگە ءتۇسىرىپ, 002 ءنومىرلى «لەند كرۋزەر» كولىگىمەن رەزيدەنتسيادان الىپ شىققان.
اليەۆتىڭ تاپسىرماسىمەن تەمىراليەۆ پەن حاسەنوۆتىڭ سول جەردە بولعاندىعىن بىلدىرەتىن ءىز-ايعاقتاردىڭ ءبارى جويىلعان. باستاپقىدا ءولتىرۋ اليەۆتىڭ كولدى كەنتىندەگى اگروفيرماسىندا جوسپارلانسا, كۋالەردىڭ كوپ بولۋىنا بايلانىستى اليەۆ ۇرلانعان ادامداردى رەميزوۆكا شاتقالىنا الىپ كەتكەن. ءولتىرۋدى «كازتەلەراديو» اق-تىڭ جوعارعى الاڭىندا ورنالاسقان «كازسترويتسەنتر» جشس اۋماعى ماڭىندا جۇزەگە اسىرۋ نيەتىن ەكى مەكەمەنىڭ دە اليەۆتىڭ يەلىگىندە ەكەندىگىمەن نەگىزدەۋگە بولسا, كەشكىسىن سول جەرگە جاسىرىن كەلۋگە مۇمكىندىك مول ەدى. سونىمەن بىرگە, شىعىس جاعىندا بىرنەشە جىل بويى اليەۆتىڭ باقىلاۋىنداعى قۇرىلىس الاڭدارىنان قوقىس اكەلىپ توگىلگەن ۇرا بار بولاتىن.
قىلمىسكەرلەر تەمىراليەۆ پەن حاسەنوۆتى ۇراعا الىپ كەلگەننەن كەيىن ولاردىڭ باسىنا پوليەتيلەن پاكەتتەر كيگىزىپ, مويىندارىنا قولدا بار ماتەريالداردان تۇزاق جاساپ, قىلعىندىرىپ ولتىرگەن. بانكيرلەردىڭ ءولى دەنەلەرى 200 ليترلىك بوشكەلەرگە كۇشتەپ سالىنعاننان كەيىن مايىتتەردى كەمىرىپ, ادام تانىماستاي ەتۋ ءۇشىن ءۇستەرىنە اك قۇيعان. بوشكەلەردىڭ ءوزى قوقىسپەن جاۋىپ تاستالعان. ودان كەيىن قىلمىسكەرلەر تەمىراليەۆ پەن حاسەنوۆ مايىتتەرى جاسىرىلعان جەرگە قۇرىلىس قوقىستارىنىڭ اكەپ توگىلۋىن تۇراقتى باقىلاۋعا الادى. ناتيجەسىندە, ۇرا جەرمەن تەڭەسىپ, تەگىستەلىپ كەتەدى دە, ىشىندە بانكيرلەردىڭ ءمايىتى بار بوشكەلەر 3-3,5 مەتر تەرەڭدىكتە قالادى.
ءىس بويىنشا جيناقتالعان ايعاقتار تەمىراليەۆ پەن حاسەنوۆتى اليەۆتىڭ ۇيىمداسقان قىلمىستىق توبى ۇرلاپ اكەتىپ, ءولتىرۋى وقيعالارىنىڭ ءۇزىلىسسىز تىزبەكپەن جالعاسقانىن ايقىن كورسەتەدى. وسىعان بايلانىستى راحات اليەۆ پەن ونىڭ سىبايلاستارىنا قىلمىستىق كودەكستىڭ 96-بابىنىڭ 2-بولىگى بويىنشا – اسا اۋىر جاعدايدا ادام ءولتىردى دەگەن ايىپ تاعىلدى. سوت ولاردى تۇتقىنداۋعا سانكتسيا بەرىپ, حالىقارالىق ىزدەۋ جاريالاندى.
مىنە, وسىنداي بۇلتارتپاس ايعاقتارعا بايلانىستى بولسا كەرەك, گەرمانيانىڭ بۇرىنعى ىشكى ىستەر ءمينيسترى وتتو شيلي دە ءوز وتانىندا ەكى بانك قىزمەتكەرىن ۇرلاپ اكەتىپ, ولاردى ازاپتاپ ءولتىردى دەگەن ايىپ تاعىلعان قازاقستاننىڭ اۆسترياداعى بۇرىنعى ەلشىسى راحات اليەۆتى تۇتقىنعا الۋ ءۇشىن وردەر بەرىلۋىن تالاپ ەتتى. وتتو شيلي ولتىرىلگەن مەنەدجەرلەر جەسىرلەرىنىڭ مۇددەسىن قورعاعان ۆەنالىق ادۆوكات گابريەل لانسكيدى قولدايتىنىن ءبىلدىردى. شيلي مەن لانسكي ءىستىڭ تەرگەلۋى جانە القا بيلەر سوتى تاعايىندالۋى بارىسىندا اليەۆ پەن ونىڭ سىبايلاستارىن قاماۋعا الۋدى تالاپ ەتىپ وتىر. ويتكەنى, ولاردىڭ بىرقاتارى اۆستريادا تۇرىپ جاتىر.
ادۆوكات لانسكي تەرگەۋ جۇمىستارىنىڭ جاڭا ناتيجەلەرىن دە جاريالادى. ونىڭ ايتۋىنشا, كۇدىكتىلەردىڭ دنك-لارى, سوت-مەديتسينالىق ساراپتامالارى مەن تەلەفون ارقىلى سويلەسكەن سوزدەرى قاماۋعا الىنعان ەكى مەنەدجەردىڭ ازاپتاپ ولتىرىلگەنىن تولىق ايعاقتايدى. «ءبىرىنشى رەت بىرنەشە جىلعا سوزىلعان سوت پروتسەسىنىڭ قارالۋ شەڭبەرىندە اليەۆتىڭ اتىنا تاعىلعان ايىپتاۋلاردى اۆستريا تەرگەۋ ۆەدومستۆوسى راستاپ وتىر, مۇندا ەشقانداي ساياسي استار جوق», – دەيدى ادۆوكات. سونىمەن قاتار, ول: «ۆەنا فەدەرالدى جوعارعى جەر سوتىنىڭ 2012 جىلعى 17 جەلتوقسانداعى اليەۆتىڭ ءىسى بويىنشا شىعارعان شەشىمى, بالكىم, بۇل وقيعانىڭ جاڭا بەتبۇرىس الۋىنىڭ باسى بولىپ تابىلاتىن شىعار» دەپ ءوز ويىن تۇيىندەيدى. ءسويتىپ, جوعارىدا ايتقانىمىزداي, ءىس بويىنشا قازاقستاننىڭ اۆسترياداعى بۇرىنعى ەلشىسىنە قاتىستى كۇدىك راسقا اينالدى, مۇنىڭ ءوزى ونىڭ پاتەرىنە ءتىنتۋ جۇرگىزۋگە قارسىلىق بىلدىرگەن ادۆوكاتىنا تويتارىس بەرىلۋىنە سەبەپ بولدى. وسى ارالىقتا اليەۆتىڭ ادۆوكاتى مانفرەد اينەدتەر رەسمي ايىپتاۋ تاعىلعان جاعدايدا ءوز كليەنتىنىڭ اۆستريا زاڭىنىڭ الدىندا جاۋاپ بەرەتىنىن دە مالىمدەدى.
جالپى, اۆستريالىق بۇقارالىق اقپارات قۇرالدارىنىڭ جازۋىنا قاراعاندا, بۇدان بۇرىن گەرمانيا بيلىگى راحات اليەۆتىڭ Metallwerke Bender Rheinland مەتاللۋرگيالىق كومبيناتىن ساتىپ الۋىنا قاتىستى تەكسەرۋ جۇمىستارىن جۇرگىزۋدى قولعا العان. سودان نەمىس پروكۋراتۋراسى Bender فيرماسى ارقىلى جالپى سوماسى 9,45 ملن. ەۋرو كولەمىندەگى قارجىنى قىمقىرعان جۇزدەن استام دەرەك بار دەپ ەسەپتەدى. بۇل قىلمىستىق ارەكەتتەر راحات اليەۆ قازاقستاننىڭ ەلشىسى رەتىندە اۆستريادا تۇرعان 2005-2007 جىلدارى جاسالعان. بۇعان قاتىستى «رۋسسكايا گەرمانيا» باسىلىمى گەرمانيا وكىمەتى قازاقستاننىڭ اۆسترياداعى بۇرىنعى ەلشىسى راحات اليەۆتىڭ Metallwerke Bender Rheinland GmbH مەتاللۋرگيالىق كاسىپورنىن ساتىپ الۋى جايىن تەكسەرۋدى باستادى, دەپ حابارلادى.
بۇل مالىمەتكە قاراعاندا, اليەۆتى اقشا جاسىردى دەگەن كۇدىكپەن تەكسەرۋ گەرمانيادا 2011 جىلدىڭ ناۋرىز ايىنان قولعا الىنعان كورىنەدى. «بۇل تەكسەرىستىڭ قاق ورتاسىندا اليەۆتىڭ كرەفەلد تۇبىندەگى گاللەپ-شتراتۋم قالاشىعىندا ورنالاسقان Metallwerke Bender Rheinland GmbH مەتاللۋرگيالىق كاسىپورنىن ساتىپ الۋى تۇر. بۇل ساۋدا-ساتتىق اليەۆتىڭ Armorial Trading فيرماسى ارقىلى جۇزەگە اسىرىلعان», – دەلىنگەن جوعارىداعى حابارلامادا. جەرگىلىكتى پروكۋراتۋرانىڭ مالىمەتى بويىنشا, كاسىپورىندى جاڭعىرتۋ اليەۆتىڭ نيەتىندە بولماعان, مۇنى ول اقشا جاسىرۋدىڭ جولى رەتىندە, سونداي-اق سو2 قالدىقتارى سەرتيفيكاتتارىن زاڭسىز ساتۋ ءۇشىن عانا العان. پروكۋراتۋرا مۇندا Bender فيرماسى ارقىلى اقشا جىلىستاتۋدىڭ جۇزگە جۋىق وپەراتسياسى جاسالىپ, جالپى سوماسى 9,45 ملن. ەۋرو كولەمىندەگى اقشا قولدى بولعان, دەپ ەسەپتەيدى. ولاردىڭ ءبارى اليەۆتىڭ ۆەنادا قازاقستان ەلشىسى قىزمەتىن اتقارىپ, اۆستريادا تۇرعان 2005 جىلدان 2007 جىلعا دەيىنگى ارالىعىن قامتيدى.
وسىنداي دا سەبەپتەرگە بايلانىستى بولسا كەرەك, جوعارعى جەر سوتى اليەۆكە تاعىلعان ايىپ ساياسي ەمەستىگىن ايتادى. سوندىقتان 2008 جىلعى الماتى قالاسى المالى اۋداندىق سوتىنىڭ كۇشىنە ەنگەن ۇكىمىندە بارلىق جاعداي ناقتى تالقىلانىپ, مۇقيات قارالعاندىقتان ونىڭ قىلمىستىق توپتى قۇرعاندىعىنا كۇمان كەلمەيدى دەيدى. ۆەنا قالاسىنىڭ پروكۋراتۋراسى دا تەرگەۋ ناتيجەلەرىمەن قازاقستاندىق سوتتىڭ ۇيعارىمىن راستاي تۇسەدى. دەمەك, جوعارىدا شۋعا اينالعان ادۆوكاتتىڭ پاتەرىن ءتىنتۋ دۇرىس جۇرگىزىلگەندىگىن نىعايتا تۇسەدى.
راحات اليەۆكە قاتىستى اۆستريالىق بۇقارالىق اقپارات قۇرالدارى كوپتەگەن مالىمەتتەر كەلتىرەدى. ماسەلەن, «Die Presse» باسىلىمىنىڭ 2013 جىلعى 16 اقپانداعى سانىندا «اليەۆ كىسى ولتىرگەنى ءۇشىن ۆەنا سوتىنىڭ الدىندا جاۋاپ بەرۋگە ءازىر» دەگەن ماقالا باسىلىپتى. سوندا ۆەنانىڭ فەدەرالدىق جوعارعى جەر سوتى قازاقستاننىڭ اۆسترياداعى بۇرىنعى ەلشىسى راحات شورازدىڭ (بۇرىنعى اليەۆ) اقشا جىلىستاتۋمەن اينالىسقانىن دالەلدەدى. سونداي-اق, شورازعا قارسى كىسى ءولتىردى دەگەن كۇدىك بويىنشا تەرگەۋ جۇرگىزىلۋدە. قورعاۋشى مانفرەد اينەدتەردىڭ ايتۋىنشا, ول ءوزى ءۇشىن جاۋاپ بەرۋگە دايىن سەكىلدى كورىنەدى. مۇندا شورازدىڭ «Media Quarter Marx» (MQM) مەديا ورتالىعىن قۇرۋ جوباسىنا الاياقتىققا سالىنىپ اقشا اۋدارعانىنا كۇمان كەلتىرىلىپ وتىر. سوڭعى كەزدەرى ORF تەلەكومپانياسى سول ماڭايدا ورنالاسقان ەكەن دەگەن دە اڭگىمەلەر ءجيى ەستىلۋدە. ونىڭ ۇستىنە شوراز ەكى قازاقستاندىق بانكيردى ءولتىردى دەگەن ايىپتاۋلاردى وزىنە جابىلعان جالا دەپ تانۋدان جالىعار ەمەس. ال شوراز ەندىگى ۋاقىتتا ۆەنادا ەمەس, مالتادا جۇرگەنىنە بايلانىستى مۇنى اينەدتەر: «ول وندا جاسىرىنىپ جۇرگەن جوق, تۇرىپ جاتىر» دەپ تۇسىندىرەدى.
كىسى ءولتىردى دەپ ايىپتاۋدى دالەلدەۋ اقشانى جىلىستاتتى دەپ ايىپتاۋدى دالەلدەۋ سەكىلدى مۇمكىن ەمەس, دەيدى قورعاۋشى و.ديتريح. بۇل قورعاۋشى شورازعا قىزمەت ەتەتىن كورىنەدى. دەگەنمەن, سوت راحات شورازدىڭ بۇرىن قىلمىستىق ۇيىمدى باسقارعانى تۋرالى كۇدىكتى نەگىزدەپ وتىر. ويتكەنى, شوراز ۆەنالىق «ماركس» مەديا ورامىنىڭ قۇرىلتايشىسى دەپ سانالادى. جالپى, اۆستراليالىق بۇقارالىق اقپارات قۇرالدارىنىڭ جازۋى بويىنشا, قازاقستاننىڭ بۇرىنعى ەلشىسى راحات اليەۆكە قاتىستى ايىپتاۋلاردى سالماقتى دەپ ەسەپتەيدى. ويتكەنى, راحات اليەۆ پەن ونىڭ جاندايشاپتارىنا قاتىستى ايىپتاۋلار بويىنشا, ءوزىنىڭ بۇرىنعى بانك مەنەدجەرلەرىن ۇرلاپ اكەتىپ, قيناپ ولتىرگەندىگىنە بايلانىستى بانكيرلەردىڭ جەسىرلەرى بىرنەشە جىلدان بەرى اليەۆ اۆستريالىق سوتتىڭ الدىندا ءوزىنىڭ ارەكەتتەرى ءۇشىن جاۋاپ بەرۋىن تالاپ ەتۋدە. ال اليەۆ بولسا, مۇلدە باسقاشا سايراۋدا. ول ءوزىن جازىقسىز قۋدالانۋدا جۇرگەندەي سانايدى. اليەۆ ساياسي تۇلعا رەتىندە قاۋىپ توندىرگەندىكتەن, وسىنداي قۋدالاۋعا ۇشىرادىم دەيدى. اليەۆتى قازاقستانعا ەكستراديتسيالاۋدى اۆستريالىق بيلىك توقتاتىپ تاستادى. قازىر ول مالتادا جاسىرىنىپ جۇرگەنىن جوعارىدا ايتتىق.
مۇنىڭ ءبارى راحات اليەۆتىڭ كىسى ولتىرۋىنە قاتىستى قىلمىستى اشۋ بارىسىندا انىقتالىپ جاتقان جايلار. سونىمەن قاتار, اليەۆتىڭ اۆسترياداعى كۇمان كەلتىرەتىن فيرمالار مەن قورلار تۋرالى بولىپ وتىر. مىنە, وسىعان بايلانىستى قازاقستان اليەۆ قىلمىستىق ۇيىم قۇرىپ, وعان قوسا ميلليونداردى اۆسترياعا اۋداردى دەپ ايىپ تاقتى. وسىعان بايلانىستى وتكەن جىلى جازدا اليەۆ ءۇشىن سەنىمدى تۇلعا رەتىندە فيرمالار مەن قورلار جۇيەسىن قۇرىپ, ونى باسقارعان ادۆوكاتىنىڭ پاتەرىنە ءتىنتۋ جۇرگىزىلگەن ەدى. سوندا MEDIA QUARTER ERRICHTUNGESELLSCHAFTST كومپانياسىنا قاتىستى جايلار دا قالىس قالمادى. MARX – ۆەنانىڭ قالالىق باسقارماسى بولىپ تابىلادى. سودان اتالعان قورعاۋشى نارازىلىق بىلدىرگەنى بەلگىلى. ونىڭ تىنتۋگە قاتىستى بەرگەن ارىزىن ۆەنانىڭ جوعارعى جەر سوتى قابىلدامادى. وعان نەگىز بولعان اقشانى جىلىستاتۋعا قاتىستى ۇيىمداسقان قىلمىستىق توپتاردىڭ ءىسى ايعاق رەتىندە تارتىلدى.
ءسويتىپ, ەندى اليەۆ ولتىرگەن بانك مەنەدجەرلەرىنىڭ ەكى جەسىرىنىڭ ادۆوكاتى گابريەل لانسكي جوعارىداعى شەشىم اۆستريالىق سوت تورەلىگىنىڭ اتالعان ايىپتاۋعا جاۋاپتى قاراۋىنا ناقتى دالەل بولاتىندىعىن العا تارتادى. «اقشا قاراجاتتارىن جىلىستاتۋ مەن كىسى ءولتىرۋدى تۇتاس قاراۋ كەرەك», دەيدى لانسكي. ول ەندى اۆستريادان تۇتقىنداۋعا وردەر بەرۋىن سۇرايدى. ال اليەۆتىڭ قورعاۋشىلارى بولسا, كەرىسىنشە بۇل ايىپتاۋلاردىڭ ءبارىن جوققا شىعارىپ, نەگىزسىز دەپ ەسەپتەيدى. وسىلايشا, اليەۆ ءالى دە دەموكراتيالىق جالعان سوزدەرمەن بۇركەمەلەنە وتىرىپ, ءوز وتانىندا جاساعان قىلمىستارىنا بايلانىستى جاۋاپكەرشىلىكتەن جالتارۋ ماقساتىندا ءوزىن ساياسي كوزقاراسى ءۇشىن قۋعىنداۋعا ۇشىراعان قاشقىن رەتىندە كورسەتۋگە ۇمتىلىپ باعۋدا. ول زاڭنىڭ, ادىلدىكتىڭ الا ءجىبىن اتتاپ ءوتتى. ەلىمىزدىڭ زاڭدارىنا, مەملەكەتتىك تارتىپكە قارسى شىعۋ ەشكىمگە دە وپا بەرمەيدى. مۇنى ءاربىر قازاقستاندىق ازامات جادىنا مىقتاپ تۇيگەنى دۇرىس. كونستيتۋتسيالىق قۇرىلىمعا قارسى ارەكەت ەتۋ جاقسىلىققا اپارمايدى. سوندىقتان دا شەتەلدىك مەملەكەتتىك ايىپتاۋشىلار دا ءىستىڭ قارالۋ ناتيجەلەرىمەن كەلىسىپ وتىر.
الماس بولاتوۆ.