«بالام 15 جاسىندا ماعان جۇرتقا كۇن كورسەتپەگەن توناۋشىنى ۇستاۋعا كومەكتەسكەن ەدى. ءجاسوسپىرىم ۇلىمنىڭ ەشنارسەدەن قورىقپاي, قايسار شەشىم قابىلداعانىنا تاڭقالىپ ەدىم» دەيدى اكەسى پوليتسيا ارداگەرى باۋىرجان دوسىمحانوۆ. مەدەت جوعارى وقۋ ورنىن بىتىرگەننەن كەيىن ءوزىنىڭ تۋعان وڭىرىندە قىزمەتىن باستايدى. تاران اۋداندىق ىشكى ىستەر بولىمىندە قىلمىستىق بولىمشەنى باسقاردى. نەبارى 28 جاسىندا شەكتەن شىققان تالاي بۇزاقىنى تەزگە سالدى, ۇرىلاردى ۇستادى. 2009 جىلى ءساۋىر ايىندا مەدەت جىلقى ۇرلاعان سۇعاناقتاردىڭ ءىزىن كەسىپ, كورشى اۋدانعا بارادى. ۇرىنىڭ اۋلاسىنا كىرە بەرگەندە ونىڭ اعاسى جانە سىبايلاسى ۇيدەن قارۋمەن جۇگىرىپ شىعادى دا, پوليتسەيلەردى كوزدەپ شۇرىپپەنى باسىپ سالادى. جانىنداعى دوستارىن دەنەسىمەن وقتان قالقالاعان مەدەت اۋىر جاراقات الادى, كۇرە تامىرىن وق ءۇزىپ جىەرگەن ونى دارىگەرلەر اجالدان امان الىپ قالا المايدى. مەدەتتى جەرلەستەرى ۇمىتپايدى, ونى ەسكە الۋ ءۇشىن جىل سايىن سپورت, تاعى باسقا دا شارالار ءوتىپ تۇرادى. بۇل جولى اۋىلداعى وبلىستىق دەڭگەيدە وتكەن تۋرنيرگە 6 كوماندا قاتىستى. ءداستۇرلى شارانى وبلىستىق پوليتسيا دەپارتامەنتى باستىعىنىڭ ورىنباسارى ارداق ىنتىقباەۆ اشتى. ءسوز العان «دينامو» دەنەشىنىقتىرۋ-سپورت قوعامى باستىعىنىڭ ورىنباسارى ۆيكتور چەرنياۆسكي جاستار جىلى جاس ۇرپاقتى پاتريوتتىق سەزىمگە تاربيەلەيتىن مۇنداي شارالاردىڭ ءوتۋى وتە دۇرىس, مەدەت سەكىلدى باتىرلاردى جاستار ءبىلۋى, ۇمىتپاۋى, ۇلىقتاي بەرۋى ءتيىس ەكەنىن ايتتى.
تۋرنيردە ءبىرىنشى ورىندى وبلىستىق پوليتسيا دەپارتامەنتىنىڭ كومانداسى, 2-ءشى ورىندى رۋدنىيلىق پوليتسەيلەر, 3-ءشى ورىندى تاران اۋدانى پوليتسيا ءبولىمىنىڭ كومانداسى جەڭىپ الدى.
قوستاناي وبلىسى
تاران اۋدانى