بيىل بالالار ارناسىندا «ايدار» مۋلتحيكاياسىنىڭ جالعاسى, ياعني, ەكىنشى ماۋسىمى كۇتىلەدى. ءبىرىنشى ماۋسىمدا باس كەيىپكەر ايدار بابالاردان قالعان اماناتتى اقتاسا, ال ەكىنشى ماۋسىمدا ايدار «بۇگىندى» ساقتاۋ ءۇشىن كۇرەسەدى. ايتا كەتەيىك, سۋپەرقاھارمان ايداردىڭ باسىنان وتكەن وقيعالارى جاس ۇرپاقتى تابيعاتتى قورعاۋعا, ايالاۋعا باۋليدى. سونداي-اق, «التىن قازىق» ەتنوتانىمدىق رەاليتي-شوۋى جارىققا شىقپاق. بالالار كيىز ۇيدە تۇرىپ, كوشپەلى ءومىردىڭ بار قۇپياسىن ۇعىنادى. سونىمەن قاتار كىشكەنتاي كورەرمەندەرىمىز «ەرتەمىر» مەن «دالا ويىندارى» مۋلتيپليكاتسيالىق سەريالدارىنىڭ جالعاسىن كورەتىن بولادى.
ال, «جۇلدىزىم» باعدارلاماسى 12 جاسقا دەيىنگى قازاقستاندىق دارىندى بالالارعا ارنالعان. ولار – جاس چەمپيوندار, ءتۇرلى دەڭگەيدەگى عىلىمي سايىستاردىڭ جەڭىمپازدارى, بيشىلەر مەن سۋرەتشىلەر. اتالعان جوبانىڭ باستى ماقساتى – وسى دارىندى بالالاردى بارشا قازاقستانعا تانىستىرىپ, مىڭداعان ءبۇلدىرشىندى جەڭىسكە ىنتالاندىرۋ. باعدارلامانىڭ كەيىپكەرلەرى جەتىستىككە قالاي جەتكەندەرىن, ول ءۇشىن كۇندەلىكتى قالاي ەڭبەك ەتكەنىن جانە بولاشاقتا قانداي بەلەستى باعىندىرعىلارى كەلەتىنىن ايتادى. ال قۋىرشاقتاردىڭ «سەزىم قالاسى» بالالاردى مەيىرىمدى, باۋىرمال بولۋعا تاربيەلەپ, ءان مەن بي ارقىلى كوتەرىڭكى كوڭىل-كۇي سىيلايدى. سونىمەن قاتار, كەيىپكەرلەردىڭ جاساعان قاتەلىكتەرى مەن تاپقان شەشىمدەرى ارقىلى بالاعا تاربيە مەن ءبىلىمنىڭ نەگىزدەرىن, قوعامدا ءوزىن ۇستاۋ ۇلگىلەرىن كورسەتەدى.
سونداي-اق «سيقىرلى بولمە» باعدارلاماسى كىشكەنتاي كورەرمەندەرىمىزدى جاڭا دا قىزىقتى ەرتەگىلەرمەن قۋانتپاق. جوبانىڭ ماقساتى بالالاردىڭ ەرتەگى تىڭداۋعا دەگەن قۇشتارلىعىن وياتۋ. رۋحاني قۇندىلىقتارعا, وتانسۇيگىشتىككە, ادالدىققا, ۇقىپتىلىققا باۋلۋ. ەرتەگى ارقىلى دەر كەزىندە ۇيىقتاۋ مادەنيەتىن قالىپتاستىرۋ. «دوس بولايىق» باعدارلاماسى ەرەكشە بالالار مەن ولاردىڭ اتا-انالارى قاتىساتىن الەۋمەتتىك جوبا. ءار باعدارلامادا ەرەكشە كەيىپكەرلەردىڭ اياۋلى ارمانىن ورىنداۋعا قادام جاسالادى. ماقساتى – وسى قوعامنىڭ كىشكەنتاي مۇشەلەرىنىڭ «ەرەكشە» ادامدارعا دەگەن وڭ كوزقاراسىن جانە ولاردى شەتتەتپەيتىن ىزگى ورتا قالىپتاستىرۋ.
ال «ءاميان» رەاليتي-شوۋى جەتكىنشەكتەردى قارجىلىق ساۋاتتىلىققا تاربيەلەيدى. قارجىنى جۇمساۋدىڭ, ۇنەمدەۋدىڭ نەگىزگى قاعيدالارىن ۇيرەتىپ, قارجىعا جاۋاپتى بولۋعا باۋليدى.
سونىمەن قاتار, جوعارىدا ايتىلعان باعدارلامالاردان بولەك, ءارتۇرلى جانرداعى وزگە دە جوبالار جىل سوڭىنا دەيىن كورەرمەنگە جول تارتادى.