ايتا كەتەرلىگى, پوليتسيا تاريحىندا دەمالىستا جۇرگەن قىزمەتكەرلەرىنىڭ قىلمىسكەردىڭ جولىن كەسىپ, وزدەرى مەرت بولعان جاعدايلار از ەمەس. مىسالى, اقتوبە جۇرتشىلىعى پوليتسيا لەيتەنانتى امانگەلدى قوسجانوۆتىڭ وسىدان 20 جىل بۇرىنعى ەرلىگىن ءالى ۇمىتا قويعان جوق. كەرىسىنشە, بەيبىت ومىردە ەرلىك كورسەتكەن باتىردىڭ ەسىمى جىل وتكەن سايىن جاڭعىرىپ, ونەگەلى جولى وسكەلەڭ ۇرپاققا ۇلگى بولۋدا.
ەندى وسى قاندى وقيعانىڭ ءمان-جايىنا توقتالساق, اقتوبەدەگى تۇرار رىسقۇلوۆ كوشەسىنىڭ بويىنداعى دۇكەندەردىڭ بىرىنە بەتپەردە كيىپ, قولىنا دىبىس تۇنشىقتىرعىش ورناتىلعان قارۋ ۇستاعان ادام كىرىپ كەلىپ, ساتۋشىنى بوپسالاي باستايدى. ويدا-جوقتا قاتەر تونگەن ساتۋشى جانۇشىرا شىڭعىرىپ, دۇكەننىڭ قوسالقى بولمەسىنە تىعىلىپ ۇلگەرەدى.
بۇل شۋ سول ماڭايدا جەكە كولىگىن جوندەپ جاتقان پوليتسيا لەيتەنانتى امانگەلدى قوسجانوۆقا دا جەتىپ, انتىنا ادال قىزمەتكەر وقيعا ورنىنا قاراي تۇرا جۇگىرگەن. ەندى ءوزى باس ساۋعالاماق بولىپ, سىرتقا ۇمتىلعان قىلمىسكەر لەيتەنانتپەن بەتپە-بەت كەلدى. ا.قوسجانوۆ سول ماڭايداعى الاڭسىز ويناپ جۇرگەن بالالار جازىم بولماسىن دەگەن ويمەن شالت قيمىلداعاندا, ءوزىنىڭ قارۋسىز ەكەنىن دە ۇمىتتى. ال ءوزىنىڭ وسى ۇستەمدىگىن سەزىپ, جانتالاسقان قاسكوي تاپانشاسىن امانگەلدىگە قاراي كەزەپ, ويلانباستان وق جاۋدىردى.
قىلمىسكەر الىسقا ۇزاماي, جەدەل جەتكەن پوليتسيا جاساعىنىڭ قولىنا ءتۇستى. بىراق, ەڭ وكىنىشتىسى, قوسجانوۆ اۋرۋحاناعا دەرەۋ جەتكىزىلگەنىمەن, ونىڭ ءومىرىن ساقتاپ قالۋ مۇمكىن بولمادى. قىرشىنداي جاس ومىرمەن بىرگە لەيتەناتتىڭ اسقاق ارماندارى دا وسى جەردەن ءۇزىلدى...
بۇگىندە اقتوبەدە ا.قوسجانوۆ اتىنداعى كوشە بار, ونىڭ وتباسىنا مەملەكەت تاراپىنان بارىنشا كومەك كورسەتىلدى, ال ارىپتەستەرى ونىڭ ەرلىگىن جاس قىزمەتكەرلەرگە ايتۋدان جالىققان ەمەس.
مۇنداي باتىرلار پوليتسيا قاتارىندا كوپتەپ سانالادى جانە پوليتسيانىڭ ەرلىك ىستەرى بەيبىت جاعدايلاردا دا كورىنىس تابۋدا. ايتالىق 2017 جىلدىڭ قاراشا ايىندا كەزەكشىلىككە تۇسكەن قىزىلوردا قالالىق پوليتسيا باسقارماسىنىڭ ۋچاسكەلىك ينسپەكتورى رامازان الدابەرگەنوۆ 102 تەلەفونىنا تۇسكەن دابىل بويىنشا ءورت شىققان كوپقاباتتى ۇيلەردىڭ بىرىنە اتتانادى. پوليتسەيلەر جەتكەن ۋاقىتتا ءۇيدىڭ ەكىنشى قاباتىنان كومەك سۇراعان داۋىستى ەستيدى. سىرتقى ەسىگى جابىلىپ قالعان پاتەردە ءبىر ايلىق ءسابيى بار قورعانسىز جاس انا قالىپتى. سول ساتتە رامازان ويلانباستان قىزىل جالىنمەن ارپالىسا وتىرىپ, وتقا ورانعان پاتەردە قالعان جانداردى امان-ەسەن الىپ شىققان.
كەيىن ۋچاسكەلىك ينسپەكتور: «مەن ءتىلسىز جاۋدىڭ جالىنىن كورگەن بويدا ادامداردى – انا مەن بالانى قۇتقارۋدى عانا ويلادىم. بارلىعى ساناۋلى سەكۋندتاردىڭ ىشىندە بولدى», دەپ ەسكە الادى.
ال مۇنداي وقيعالار كۇن سايىن بولىپ جاتادى. سوندىقتان دا پوليتسيانىڭ باستى ۇرانى «مىندەت», «ابىروي», «ەرلىك» دەگەن سوزدەرمەن اسپەتتەلۋى بەكەر بولماسا كەرەك.