جۇما, 8 ناۋرىز 2013 7:33
بوليۆارلىق ۆەنەسۋەلا رەسپۋبليكاسىنىڭ پرەزيدەنتى ۋگو چاۆەس قايتىس بولدى. بۇل ەل عانا ەمەس, بۇكىل لاتىن امەريكاسى بۇل قازانى ازا تۇتىپ جاتىر. الەمنىڭ بارلىق جەرىندە دە ونىڭ جارقىن بەينەسىن قادىرلەيتىن جۇرتشىلىق بار ەكەنىنە كۋا بولىپ وتىرمىز.
جۇما, 8 ناۋرىز 2013 7:33
بوليۆارلىق ۆەنەسۋەلا رەسپۋبليكاسىنىڭ پرەزيدەنتى ۋگو چاۆەس قايتىس بولدى. بۇل ەل عانا ەمەس, بۇكىل لاتىن امەريكاسى بۇل قازانى ازا تۇتىپ جاتىر. الەمنىڭ بارلىق جەرىندە دە ونىڭ جارقىن بەينەسىن قادىرلەيتىن جۇرتشىلىق بار ەكەنىنە كۋا بولىپ وتىرمىز.
ول ءبىراز اۋىردى. ونىڭ دەنساۋلىعىن بۇكىل الەم قاداعالاپ وتىردى دەسە بولادى. نەمەن اۋىردى, قالاي ەمدەلدى, اياعى نەگە سوقتىردى – بۇل جايىندا جۇيەلى ايتىلدى, جۇيەلى جازىلدى. ۆەنەسۋەلا حالقى ونىڭ جانىندا بولدى دەسەك ءلازىم. ومىردەن بۇكىل حالىقتىڭ سۇيىسپەنشىلىگىنە بولەنگەن قايراتكەر ءوتتى.مۇنداي سۇيىسپەنشىلىك جايدان-جاي كەلمەيدى. ونىڭ سىرىن الەمدىك اقپارات قۇرالدارى دا ايتىپ جاتىر. اسىرەسە, امەريكالىق, بريتاندىق, يسپاندىق باسىلىمدار بۇل قايراتكەردىڭ كەمباعال حالىق ءۇشىن ءوز ەلىنىڭ وراسان بايلىعىن وڭدى-سولدى شاشىپ جۇمساعانىنا, امەريكا قۇراما شتاتتارىنداي الىپ يمپەرياعا قاسقايىپ قارسى تۇرعان ساياسات جۇرگىزگەنىنە ايرىقشا ءمان بەرىپ وتىر.ۋگو چاۆەس ءون بويى قايشىلىققا تولى قايراتكەر بولدى. مۇناي قورى جونىنەن الەمدەگى ەڭ باي ەل سانالاتىن ۆەنەسۋەلا رەسپۋبليكاسىندا بيلىك تىزگىنىن 14 جىل ۇستاعان ول اشىق تا باتىل ساياسات جۇرگىزدى. ءوز ەلىنىڭ الپاۋىت ەلدەرگە تاۋەلدى بولماۋى جولىندا ءتۇرلى قادامدارعا باردى. پاراسات بيىگىنەن قاراعاندا, ونىڭ سول كەيبىر قادامدارىن قۇپتاۋعا دا بولمايتىنداي ەدى. ول جونىندە كەزىندە باسقالارمەن جارىسىپ ءبىز دە جازعانبىز جانە ءدال قازىر ونىمىز ورىنسىز بولعان ەكەن دە دەمەيمىز. ءار نارسەنىڭ ءوز باعاسى بار.ۆەنەسۋەلا پرەزيدەنتىنىڭ ۇستانعان ساياساتىنىڭ باستى باعىتى اقش جۇرگىزىپ وتىرعان ساياساتقا قارسىلىق ەدى. ونىڭ دوستارى دا, دۇشپاندارى دا نەگىزىنەن وسىعان وراي ىرىكتەلدى. ول اقش ىقپالىنداعى ەلدەردەن قولداۋ تاپقان جوق. ونىڭ ەسەسىنە اقش-قا قارسىلار وعان قۇشاعىن ايقارا اشتى. ول وسىلايشا رەسەي فەدەراتسياسىمەن, ونىڭ باسشىلارىمەن جاقىن ارالاستى. رەسەي ءوزىنىڭ اسكەري تەحنيكاسىن, قارۋ-جاراعىن بۇل ەلدەن اياعان جوق, بىرىگىپ اسكەري جاتتىعۋلار دا وتكىزدى. ۆەنەسۋەلا رەسەيدىڭ لاتىن امەريكاسىنداعى تىرەگىنە اينالدى. انتيامەريكالىق ساياسات اياسىندا ول يران پرەزيدەنتى ماحمۇت احمادينەجادپەن, بەلورۋسسيا پرەزيدەنتى الەكساندر لۋكاشەنكومەن, سولتۇستىك كورەيا باسشىلىعىمەن دوستاستى.ول ءوز حالقىنىڭ الەۋمەتتىك جاعدايىن جاقسارتۋ جولىندا باتىل شارالاردى جۇزەگە اسىردى. اۋرۋحانالار سالدى, مەكتەپتەر اشىپ, ساۋاتسىزدىقتى جويۋعا بايلانىستى كۋرستاردى ۇيىمداستىردى. كەدەي جۇرتشىلىقتىڭ جاعدايىن كوتەردى. ءوزى بيلىك تىزگىنىن ۇستاعان كەزدە وسىنداي باعىتتا 27 باعدارلامانى جۇزەگە اسىرىپتى. ونى حالىق سول ءۇشىن ءسۇيدى.ءوز ەلىندە عانا ەمەس, بۇكىل لاتىن امەريكاسىندا ونىڭ ورنى ۇڭىرەيىپ قالدى دەسەك بولادى. جۇرت ونى ءىزدەيتىن بولادى. مۇنىڭ ءوزى ونىمەن قوشتاسۋ كەزىندە دە اڭعارىلدى. بىراق ونىڭ ءىسى, ونەگەسىنىڭ حالىققا قىزمەت ەتەتىنى انىق. كەزىندە بوليۆاردى حالىق قالاي سىيلاسا, چاۆەستى دە سولاي سىيلايتىنى زاڭدىلىق. چاۆەس – ايرىقشا تۇلعا. ونىڭ دوستارى كوپ بولسا, دۇشپاندارى دا از بولعان جوق. الدا دا ول جالعاسادى. بىراق ەلدىڭ ەسىندە جاقسى ءىسى قالادى. قازاقستان پرەزيدەنتى نۇرسۇلتان نازارباەۆتىڭ: «ۋگو چاۆەستىڭ ۆەنەسۋەلانى جان-جاقتى دامىتۋعا جانە حالىقتىڭ جاعدايىن جاقسارتۋعا سىڭىرگەن ەرەن ەڭبەگى تاريحتا وشپەس ءىز قالدىردى. ونىڭ جارقىن بەينەسى ءبىزدىڭ ەسىمىزدە ارقاشان ساقتالاتىنىنا سەنىمدىمىن» دەگەن كوڭىل ايتۋ جەدەلحاتىنداعى سوزدەرى وسىناۋ الەمدىك قايراتكەردىڭ تۇلعاسىن شىنايى سيپاتتايدى.
ماماديار جاقىپ, «ەگەمەن قازاقستان».