5-ماۋسىم كۇنى 66/55 اسكەري بولىمىندە 2016 جىلدىڭ 5- ماۋسىمدا لانكەستىك شابۋىلدا قازا تاپقان اسكەري قىزمەتشىلەردى ەسكە الۋ ءراسىمى ءوتتى. قايعىلى وقيعانى ەسكە الۋ شاراسىنا وبلىس اكىمى وڭداسىن ورازالين ارنايى قاتىستى. سونىمەن قاتار, جيىندا قۇقىق قورعاۋ جانە قاۋىپسىزدىك ورگان باسشىلارى بولدى. ايماق باسشىسى لانكەستىك شابۋىلدان قازا تاپقان جانداردىڭ قۇرمەتىنە گۇل شوقتارىن قويىپ, ەسىمدەرى ماڭگى ەل ەسىندە قالاتىنىن جەتكىزدى.
«بەيبىت كۇنى قىلمىسكەرلەردىڭ قولىنان پوليتسيا, اسكەري قىزمەتكەرلەرمەن بىرگە تۇرعىندار دا قازا تاپتى. قىلمىسكەرلەردىڭ ارامزا ويلارىن ورىنداۋعا قۇقىق قورعاۋ ورگاندارىنىڭ جەدەل شارالارى مۇمكىندىك بەرگەن جوق. حالىقتىڭ تىنىشتىعىن قورعاۋ جولىندا 66/55 اسكەري ءبولىمىنىڭ ساربازدارى مايور دانيەل مايلىباەۆ, كىشى سەرجانت بەرىكجان قاليەۆ, قاتارداعى جاۋىنگەر دوسبول ساپاردىڭ قازالارى ورنى تولماس وكىنىش. اتالعان ازاماتتاردىڭ جانكەشتىلىكپەن جاساعان ارەكەتتەرى لايىقتى باعاسىن الىپ, تاۋەلسىز قازاقستاننىڭ ەرلىكتەر جىلناماسىندا جازىلىپ قالدى. بۇل وقيعا بارلىعىمىز ءۇشىن ۇلكەن ساباق بولىپ, قوعامعا ەنگەن دەرتپەن تەك مەملەكەتتىك ورگاندار عانا ەمەس, جالپى قوعام بولىپ كۇرەسۋىمىز قاجەت»,-دەدى وبلىس اكىمى وڭداسىن ورازالين.