ۆ.نوروۆ شانحاي ىنتىماقتاستىق ۇيىمى بايقاۋشىلار ميسسياسى قازاقستان رەسپۋبليكاسىنىڭ سىرتقى ىستەر مينيسترلىگىنىڭ شاقىرتۋىمەن نۇر-سۇلتانعا كەلگەنىن اتاپ ءوتتى. وسى شاقىرتۋعا بايلانىستى قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋى بارىسىن بايقايتىن شىۇ بايقاۋشىلار ميسسياسى قۇرىلعان كورىنەدى. بۇل ورايدا شىۇ-عا جۇكتەلىپ وتىرعان مىندەتتەردىڭ ءبىرى – پرەزيدەنتتىك جانە پارلامەنتتىك سايلاۋلارعا, رەفەرەندۋمدارعا باقىلاۋ جۇرگىزۋ.
«بۇل جۇمىس ءبىزدىڭ ۇيىمدا 2006 جىلى قابىلدانعان تارتىپكە ساي جۇرگىزىلەدى. جالپى, شانحاي ىنتىماقتاستىق ۇيىمى بايقاۋشىلار ميسسياسى جۇمىسىن ەڭ العاش 2004 جىلى قازاقستاندا باستادى. شانحاي ىنتىماقتاستىق ۇيىمى بايقاۋشىلار ميسسياسى 25 مۇشە مەملەكەتتىڭ وكىلدەرىنەن تۇرادى. ولار – ءوز ەلدەرىنىڭ زاڭنامالىق, قۇقىقتىق سالالارىنان كەلىپ وتىرعان جوعارى ساناتتى ساياساتكەرلەر. ءبىزدىڭ ميسسيا ءبۇگىنگى كۇنى قازاقستاندا جۇمىسىن باستاپ كەتتى», دەدى ۆ. نوروۆ.
ۆلاديمير ءيماموۆيچتىڭ ايتۋىنشا, شانحاي ىنتىماقتاستىق ۇيىمى بايقاۋشىلار ميسسياسىنىڭ وكىلدەرى قازاقستاننىڭ 7 قالاسىندا, اتاپ ايتقاندا: نۇر-سۇلتان, الماتى, شىمكەنت, ءتۇركىستان, قاراعاندى, اتىراۋ جانە وسكەمەن قالالارىندا جۇمىس جۇرگىزىپ جاتقان كورىنەدى. سونىمەن قاتار ولار 6 ايماقتى – اقمولا, الماتى, قاراعاندى, اتىراۋ, تۇركىستان جانە شىعىس قازاقستان وبلىستارىن دا قامتىماق. ءسويتىپ شىۇ بايقاۋشىلار ميسسياسى سايلاۋدىڭ ءادىل وتەرىنە بەك سەنىمدى. ويتكەنى قازاقستانداعى پرەزيدەنتتىك سايلاۋ جوعارى دەڭگەيدە زاڭعا تولىق ساي ۇيىمداستىرىلىپ وتىر. ونىڭ ۇستىنە ولار قازاقستاننىڭ سايلاۋ زاڭناماسىندا ءبىرشاما جاڭاشىلدىقتار بار ەكەنىن دە جاسىرمادى. سوعان ساي بۇل جاڭاشىلدىقتار شىۇ ەلدەرىنە ۇلگى بولاتىندىعىن دا اتاپ ءوتتى.
ال وسىنىڭ الدىندا ورتالىق سايلاۋ كوميسسياسىنىڭ مۇشەسى ءلاززات سۇلەيمەننىڭ باسشىلىعىمەن الماتى وبلىسىندا «2019 جىلعى 9 ماۋسىمعا تاعايىندالعان قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋىن ازىرلەۋ مەن وتكىزۋ كەزەڭىندە سايلاۋ كوميسسيالارىنىڭ جۇمىسى تۋرالى» تاقىرىبىندا ەكى سەمينار-ترەنينگ ءوتتى. ماسەلەن, سونداي كەزەكتى سەمينارعا اتالعان وبلىستىڭ اۋماقتىق جانە ۋچاسكەلىك سايلاۋ كوميسسيالارىنىڭ توراعالارى, توراعالارىنىڭ ورىنباسارلارى, حاتشىلارى مەن مۇشەلەرى, ەلەكتورالدى وقىتۋ بويىنشا سەرتيفيكاتتالعان جاتتىقتىرۋشىلار, الماتى وبلىسى اكىمى اپپاراتى باسشىسىنىڭ ورىنباسارى, سونداي-اق قاپشاعاي قالاسى اكىمىنىڭ ورىنباسارى جانە اپپارات باسشىسى, جەرگىلىكتى اتقارۋشى ورگاندار مەن بۇقارالىق اقپارات قۇرالدارىنىڭ وكىلدەرى قاتىستى.
ەكى وڭىردە دە ورتسايلاۋكوم مۇشەسى ل.سۇلەيمەن سايلاۋعا ازىرلىك جانە داۋىس بەرۋ كۇنى سايلاۋ كوميسسيالارى قىزمەتىنىڭ ماسەلەلەرىنە ەگجەي-تەگجەيلى توقتالدى. سەمينار بارىسىندا قاتىسۋشىلار سايلاۋ زاڭناماسىنداعى وزگەرىستەرمەن, سايلاۋ ناۋقانىنىڭ نەگىزگى كەزەڭدەرىمەن, كانديداتتاردىڭ سايلاۋ الدىنداعى ۇگىتتى جۇزەگە اسىرۋ شارتتارىمەن, سايلاۋ كوميسسيالارىنىڭ سايلاۋدى ازىرلەۋ مەن وتكىزۋ جونىندەگى وكىلەتتىكتەرىمەن, اۋماقتىق سايلاۋ كوميسسيالارىنىڭ جانە جەرگىلىكتى اتقارۋشى ورگانداردىڭ مۇمكىندىكتەرى شەكتەۋلى ازاماتتاردىڭ قۇقىقتارىن قامتاماسىز ەتۋ جونىندەگى مىندەتتەرىمەن تانىستىرىلدى. سونداي-اق بارلىق سايلاۋ كوميسسيالارىنىڭ قىزمەتى اشىقتىق جانە جاريالىلىق نەگىزىندە ءجۇزەگە اسىرىلاتىنىن, سايلاۋ تۋرالى قولدانىستاعى زاڭناما تالاپتارىن قاتاڭ ساقتاۋعا, سايلاۋ كوميسسيالارىنىڭ مۇشەلەرىن كاسىبيلەندىرۋگە ەرەكشە كوڭىل بولىنەتىنىن اتاپ ءوتتى.
الماتى وبلىسى اكىمى اپپاراتى باسشىسىنىڭ ورىنباسارى ج.الىمبەكوۆ جانە قاپشاعاي قالاسى اكىمى اپپاراتىنىڭ باسشىسى ە.قوجاحمەتوۆ سايلاۋشىلاردىڭ ءتىزىمىن جاساۋ بويىنشا جۇرگىزىلگەن جۇمىستار, سايلاۋ ۋچاسكەلەرىن ماتەريالدىق-تەحنيكالىق جابدىقتاۋ, ونىڭ ىشىندە مۇمكىندىكتەرى شەكتەۋلى ادامدارعا جاعداي جاساۋ بويىنشا قابىلدانعان شارالار تۋرالى باياندادى.
وبلىستىق سايلاۋ كوميسسياسىنىڭ توراعاسى ت.داۋتوۆ, قاپشاعاي قالالىق سايلاۋ كوميسسياسىنىڭ توراعاسى م.ايتوۆا, ىلە اۋداندىق سايلاۋ كوميسسياسىنىڭ توراعاسى گ.چيناەۆا, تالدىقورعان قالالىق سايلاۋ كوميسسياسىنىڭ توراعاسى ە.قوشانبەكوۆ, سارقان اۋداندىق سايلاۋ كوميسسياسىنىڭ ءتوراعاسى و.تەرتيۋباەۆ سايلاۋ ناۋقانىن ءوتكىزۋ, سايلاۋ ۋچاسكەلەرىن داۋىس بەرۋ كۇنىنە ازىرلەۋ, سايلاۋ كوميسسيالارىنىڭ مۇشەلەرىن كاسكادتىق ادىسپەن ءارى قاشىقتىقتان وقىتۋ جانە تەستىلەۋ ادىسىمەن وقىتۋ جاعدايى تۋرالى حاباردار ەتتى.
ورتسايلاۋكوم اپپاراتىنىڭ سايلاۋ پروتسەسىن ۇيىمداستىرۋ ءبولىمىنىڭ باس ساراپشىسى مىندەتىن اتقارۋشى ب.بايسەيىتوۆ 2019 جىلعى 9 ماۋسىمدا سايلاۋعا ازىرلىك جانە ونى وتكىزۋ كەزەڭىندە ۋچاسكەلىك سايلاۋ كوميسسيالارى قىزمەتىنىڭ نەگىزگى باعىتتارى تۋرالى بايانداما جاسادى. وقىتۋ سەمينارلارىن وتكىزۋ كەزىندە قاتىسۋشىلار سايلاۋ ناۋقانىنىڭ نەگىزگى كەزەڭدەرىن وتكىزۋ بارىسى, سايلاۋشىلار تىزىمدەرىمەن جۇمىس ىستەۋ, سايلاۋ كوميسسيالارىنىڭ سايلاۋدى ازىرلەۋ مەن وتكىزۋ, سايلاۋ تۋرالى زاڭنامانىڭ ورىندالۋىن قامتاماسىز ەتۋ بويىنشا وكىلەتتىكتەرى تۋرالى سۇراقتار قويدى. ورتسايلاۋكوم مۇشەسى ل.سۇلەيمەن 2019 جىلعى 9 ماۋسىمعا تاعايىندالعان قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋىن ازىرلەۋ مەن وتكىزۋ كەزەڭىندەگى سايلاۋ كوميسسيالارىنىڭ جۇمىسى تۋرالى كەڭىنەن ايتىپ بەردى.